چمشانکار: شفقت بلوچ
نگوگی وتھیانگو یک اپریکی زانتکار ءُ پد نوآبادی نبشتکارے بوتگ کہ آ 1938 ءَ کینیا ءِ یک کسانیں میتگ “کامیراتھو” ءَ ودی بوتگ۔ ہمے وھد ءَ کہ نگوگی ماں اے جہان ءَ وتی چماں پچ کنت، آ وھد ءَ کینیا برتانیہ ءِ کوزہ ءَ بوتگ۔ نگوگی اپریکی لبزانک ءِ پِڑ ءَ بلاھیں نامے زانگ بیت۔ اپریکی لبزانک ءِ تہ ءَ نوکیت آرگ ءُ آئی ءَ گوں چاگردی جاوراں ھمدپ کنگ ءَ نگوگی ءِ بلاھیں کردے بوتگ۔ آئی ءَ وتی نبشتہ کتگیں نکانانی تہ ءَ مدام ایردستیں اپریکی مھلوک ءِ درد ءُ رنج، چاگردی جیڑہ، زبان ءُ ربیدگ ءِ سرءَ کپتگیں نوآبادیاتی سانانی سرا گپ کتگ۔ نگوگی ءَ وتی مھلوک ءِ چہ زہنی ءُ جسدی ایردستی ءِ سانکلاں کشگ ءِ ڈُبہ وتی کوپگاں زرت ءُ ھمے جیڑہانی سرءَ نبشتہ کُتگ۔ پمشکا آئی ءَ کوزہ گیر ءِ کتگیں زلم ءُ زوراکی ءُ آھانی سوب ءَ چاگرد ءِ سرءَ کپتگیں سانانی سرا یکشل ءَ نبشتہ کتگ۔ آ اپریکی لبزانک ءِ مستریں گِدار نویسانی تہ ءَ یکّے زانگ بیت۔
“Weep Not Child” نگوگی ءِ نبشتہ کتگیں گِدارے کہ آئی ءَ 1952ءَ کینیا ءِ ناموریں جنز “ماؤ ماؤ جُنز” ءِ پُژدر ءَ نبشتہ کتگ۔ اے گِدار ءِ تہ ءَ نگوگی ءَ برتانیہ ءِ جبر، مھلوک ءِ ایردستی، ڈگار ءُ مڈیانی پُلگ، اِشی ءِ ھلاپ ءَ گھگیری ءُ ہمشی ءِ سبب ءَ ماؤ ماؤ انسرجنسی ءُ لس مھلوک ءِ سرءَ کپتگیں سان باوست کتگ اَنت۔
گدار ءِ بنجاھی کارست نجروگے ءُ آئی ءِ کہول اِنت۔ آئی ءِ پت نگوتھو یک دھکانے۔ نگوتھو ءِ دو جنین اَنت۔ آھانی تہ ءَ یکے نیوکابی کہ نجروگے مات اِنت ءُ دومی نجیری کہ ایشی ءِ سئے زھگ بورو، کماؤ ءُ کوری اَنت۔ برتانیہ ءِ کوزہ ءَ چہ پد مسٹر ھالینڈ کہ یورپی آبادکارے، آ کیت ءُ نگوتھو ءِ پت ءُ پیروکی زمینانی سرءَ کوزہ کتگ۔ وھدے کہ دری آبادکار نگوتھو ءِ زمینانی سرءَ کبزہ کن اَنت گُڑا آ وتی پت ءُ پیروک ءِ زمینانی سرءَ چو بزگر ءِ وڑ ءَ کار کنت۔
نجروگے وھدے کہ کسان بیت گڑا آ مدام وتی کش ءُ کرّ ءِ مھلوک ءِ بزگی ءُ زورآور ءِ کتگیں زلم ءُ زوراکیاں وتی چماں گند ایت۔ چہ درکسانی ءَ آئی ءَ وانگ ءِ سک باز واھشت بیت ءُ ہمے وانگ ءِ ھُب آئی ءَ ایندگہ گونڈواں گوں ھوار اسکول ءَ رھادگ کنت۔ وھدے آ وانگجاہ ءَ روت گُڑا اودا وانگی زُبان انگریزی بیت۔ چوشکہ آ انگریزی نزانت گڑا سک تکانسر بیت۔
انچوش گشگ بیت کہ ایردستی ءَ ھاسیں اُمر نیست ءُ ھردیکہ ایردستیں مھلوک جیڑگ بندات کنت گڑا زورآور ءِ ہما زمین ءِ سرءَ روچ ہم کم بوان بنت۔ برتانیہ ءِ ایردستی ءِ بنداتی وھدءَ لھتیں مردم ایردستی ءِ ھلاپ ءَ گھگیری کنان ءَ وتی آسودگ ءُ وشھالیں زنداں یلہ کن اَنت ءُ دیم پہ کینیا ءِ جنگلاں رو اَنت۔ ھمدا کینیا ءِ مھلوک زورگیریں تاگت ءِ ھلاپ ءَ زرمبشتے بندات کن اَنت کہ اے رند ءَ “ماؤ ماؤ انسرجنسی” نام ءَ زانگ بیت۔ دیر نہ گوز اِیت کہ ھمے جنز ءِ سان کینیا ءِ لس مھلوک ءِ سرا کپ اَنت ءُ نجروگے ءِ ھلک ہم چہ اے زرُمبشت ءِ ساناں رکت نہ کنت۔
دومی نیمگ ءَ نجروگے ءِ پت ءُ مات ھمے سرپد بنت کہ آئی ءِ وانگ پہ ھاندان ءَ یک شریں بانداتے آؤرت کت کنت۔ بلے ایردستیں چاگرد ءِ وانگی ادارہ سرجم ءَ زورگیر ءِ دست ءَ بنت ءُ آ کدی ھم مردماں زورگیری ءِ پندلاں چہ درکپگ ءَ نئیل اَنت۔ پمیشکہ نجروگے ءِ انگلش وانگ پہ آئی کھول ءَ ھچ درد ءِ دوا نہ بیت۔ نگوگی دیماترا گُشیت کہ کینیا ءِ تہ ءَ نشتگیں مھلوک ءَ گوں وتی زمین ءَ سک مھر بوتگ۔ آیانی نزّ ءَ زمین تہنا نندگ ءُ کشت ءُ کشار ءِ وسیلہ ءِ ناں بلکیں زمین پہ آیاں مزھبی، روھانی ءُ دودمانی یاداشت ءِ بوتگ۔ آیاں زمین واجہ ھدا ءِ نیمگ ءَ چہ داتگیں دادے لیک اِتگ ءُ آئی ءِ پاھازگ ءَ پہ وت یک راجی ءُ چاگردی زمہ واریے سرپد بوتگ اَنت۔ آیاں اے گپ سک تورتگ کہ آھانی زمین ءِ سرءَ درآمداں کوزہ کتگ۔ پمشکہ آیاں زورگیر ءِ ھلاپ ءَ گھگیری بندات کتگ۔ وھدے آ زھرشانی کن اَنت گڑا زورگیر ءِ لشکر آیانی سرا اُرش کنت ءُ آیاں لٹ ءُ کٹ کنت بلے لٹ ءُ کُٹ اے گھگیری ءِ جمبوریں آس ءَ سارت کُت نہ کن اَنت۔ وھدے گھگیری ودّان کنت گڑا برتانیہ ءِ ھکومت کرپیو جنت ءُ کسّ ءَ ھم گس ءَ در آھگ ءَ نئیل ایت۔ نجروگے ءِ پت ءُ برات دزگیر کنگ بنت۔ آئی ءِ جند ھم دروگیں بہتام جنگ گرگ ءُ لٹ ءُ کٹ کنگ بیت۔ زورآور ءِ سرکار کینیا ءِ مردماں کُشیت ءُ آیانی جوناں ما گیابان ءَ دور دنت۔ آ کینیا ءِ مردماں ترسینگ ءُ وتی بیانیہ ءِ مھکم کنگ ءِ ھاترا ھرچ وڑیں زلم ءُ زوراکی کنت۔ بلے کینیا ءِ مھلوک وتی جھد ءَ چہ دزکش نہ بیت ءُ 1963 ءَ چہ برتانیہ ءِ زورگیریں پنجگاں وت ءَ آجو کنت۔
نگوگی ءَ وتی نبشتہ کتگیں گدار ءِ تہ ءَ ایردستیں راج ءِ جاورھال شریں وڑے ءَ گیشنتگ اَنت۔ آ گُشیت کہ مگربی تاگتاں وتی نپ ءُ سیتانی پیلو کنگ ءَ اپریکی راج ایردست کتگ اَنت۔ آیاں وتی کبزہ ءِ برجم دارگ ءِ ھاترا ایردستیں مھلوک وڑ وڑیں گپتمان ءُ پندلانی آماچ کتگ۔ آیاں ایردستیں مھلوک ءَ ھمے باور کنائینگ ءِ کوشست کتگ کہ شما بے دود اِت ءُ ما شمارا شریں دودمان ءِ واھند کنگ ءَ اتکگیں۔ زورگیر ءَ وتی مزھب ایردستیں مھلوک ءِ سرءُ مُشت ءُ آئی ءِ زبان ھم مٹ کتگ۔ زورگیر ءَ کدی ھم ایردستیں مھلوک ءَ یکجا بوھگ ءُ گھگیری کنگ ءِ اجازت نہ داتگ۔ اِشی ءِ درور گدار ءِ تہ ءَ “جیکوبو” نامیں کارست ئیگ اِنت کہ آ مدام مردماں رد دنت ءُ آیاں چہ جھد ءَ دلپروش کنت۔
اگاں ما بلوچ راج ءَ بچار ایں گڑا اِد ءَ ھم ہمُک ھلک ءُ میتگ ءَ جتائیں پندل راجی تاوان دیان اَنت۔ نجروگے ءِ وڑ ءَ مئے ھزاراں ورنا یک شوکیں بانداتے ءِ امیت ءَ بازیں اڑاندانی دیمپانی ءَ رند وھدے کالج ءُ مزن شاہ دربرجاہاں سر بنت گڑا تاکتور چوں آیانی دیم ءَ اڈاند ءَ اوشتاتگ۔ چو کینیا ءِ پیم ءَ بلوچ سرزمین ءِ سرءَ ہم بلوچ ورنایانی بیگواھی، جنگ ءُ کشگ نوں ھمک روچی ایں گپے جوڈ بوتگ۔ ہلک ءُ میتگاں استان ءِ داشتگیں “کشندہ ٹولی” بلوچ ءِ چکچینی کنگ ءَ اَنت۔ اے گدار ءِ وانگ ءَ پد سما بیت کہ ایردستیں چاگرد ءِ تہ ءَ مردم ءِ زند چہ جناور ءَ ھم گنتر بیت۔ تانکہ گلامیں راج یکمشت ءُ ھمکوپگ مہ بیت آ وت ءَ چہ زورگیری ءِ سانکلاں آجو کت نہ کنت۔
