بلوچ اسٹوڈنٹس ایکشن کمیٹی اوتھل ہنکین ءِ ہنکینی لس دیوان برجم دارگ بوتگ۔

بلوچ اسٹوڈنٹس ایکشن کمیٹی اوتھل ہنکین ءِ ہنکینی لس دیوان برجم دارگ بوتگ۔ شفقت بلوچ ہنکینی کارمستر ءُ شاہ زیب بلوچ کارگُشاد گچین کنگ بوتگ اَنت۔

بلوچ اسٹوڈنٹس ایکشن کمیٹی

بلوچ اسٹوڈنٹس ایکشن کمیٹی اوتھل ہنکین ءِ ہنکینی لس دیوان گوستگیں کارمستر بلوچ خان ءِ سروکی ءَ برجم دارگ بوتگ۔ دیوان ءِ ھاسیں مھمان بُنجاہی کُمک کارگُشاد تنویر بلوچ بوتگ۔

دیوان ءَ بُنجاہی سرکیولر، ہنکینی اھوال، نگد کاری، گلکاری، ھندی ءُ میاں استمانی سیاسی جاورھال ءِ بُنگپانی سرءَ دلجمیں باوست ءَ پد گُڈی بُنگپ آوکیں گامگیج ءَ گوستگیں کابینہ ھلاس کنگ بوتگ ءُ پہ نوکیں کابینہ ءَ گچینکاری کنگ بوتگ اَنت۔

نگدی بھر ءَ سنگتاں نگد ءِ ارزشت، نازُرکی ءُ زلورتانی سرءَ تران کنان ءَ گوشتگ، چوشکہ سیاسی عمل مُدام تچکیں لکیرے ءِ سرءَ نہ جُنز ایت۔ ہمُک وھد ءُ جاورانی بنیات ءَ آھانی تہ ءَ مٹی ءُ بدلی وھد ءِ ارزشت داریں زلورت اِنت۔ وھدے ما مٹی ءِ سرءَ ھبر کنیں گُڑا سیاسی ادارھانی تہ ءَ مٹی بیدے جاندار ءُ سائنسی نگد ءَ ھچ پیم ءَ سرجم نہ بنت۔ ہمُک مٹی ءَ گوں گوستگیں رھبند بے سان بنت ءُ پہ دیمی اھد ءَ وھد ءِ کُلیں گٹ ءُ پیچانی ٹپاسگ ءُ نگدی چمے ءَ چارگ ءَ رند نوکیں ترزکار ءُ پروگرام دیم ءَ آرگی اَنت۔ اگاں ہمے جاورانی مٹیاں گوں اداراتی پروگرام ہمدپ مہ بنت گُڑا سیاسی تک ءَ وتی مھلوک ءَ یکجاہ ءُ تربیت کنگ گران بیت۔

ہمے سرھال ءِ سرءَ سنگتاں گیش ھبر کنان ءَ گوشتگ، استیں سیاسی جاوراں اگاں کسے وتی دیم ءَ ایر کنت گُڑا آئی ءَ ہمے پیمیں جاورے گندگ ءَ کئیت کہ ہمُک شئے گوں گُشادی ءَ مٹی ءِ راہ ءَ سپر کنان اِنت۔ اے ابرمی راستی اگاں کسے ہمے مٹیاں گوں وت ءَ ہمدپ کُت نہ کنت گُڑا وھد ءِ مُجاں گار بیت۔ استیں جاورانی تہ ءَ گوست ءِ جاور کہ مٹ اَنت گُڑا پہ ادارہ ءِ دیم ءَ برگ ءُ توانگر کنگ ءَ ہمک تک ءَ شہمیں نگدی چمشانکے ءِ دیگ ھژدری اِنت۔ سنگتاں گیش تران کنان ءَ گوشتگ، استیں وھد ءَ بلوچ ڈیہہ ءِ سرءَ زانندہیں ورنا ءُ باندات ءِ پدریچ ءِ وانگی ادارہانی تہ ءَ آیگ ءُ بھر زیرگ ءِ رواج سک نزور ترتگ کہ آئی سبب ءَ مزن شاہ دربرجاہانی تہ ءَ نودربرانی کچ سال پہ سال نزور تران اِنت۔ اشاں ابید سنگتاں گوشت کہ بلوچ نودربر سیاست ءِ گردانک ءِ تہ ءَ المی وانگ ءِ رواج ہم نزور تران اِنت کہ بیدے ایشی ءَ چاگرد ءِ سازگ گران اِنت۔

گلکاری ءِ بُنگپ ءَ سنگتاں تران کنان ءَ گوشتگ، گوست ءِ رواجانی سرءَ نگدی چمشانکے دیگ ءَ پد ما وھدے استیں ھالتاں وتی دیم ءَ ایر کنیں گُڑا پہ آھاں توجیل سازی مئے مستریں ڈبہ اِنت۔ اے جاوراں کہ سیاسی جاورھال جُتائیں مٹیانی آماچ اَنت گُڑا مارا لوٹیت کہ ہمُک ورنا ہمے مٹیانی ہمرائی ءَ وتی کِرد ءَ شئے بہ دنت دانکیں مٹ بیوکیں جاورانی ہمرائی ءَ وت ءَ ساٹت ءُ دیم ءَ بُرت بہ کن اَنت۔ پرچاکہ گندگ بیت مئے ورنا ہمے داب ءَ کمفرٹ زون ءِ آماچ اَنت کہ پہ آھاں جاوری مٹی چو ابکہ بوگ ءِ مانزمان جوڈ بوگ ءَ اَنت۔ سنگتاں گوشتگ، سیاسی سنگت ءُ ورناہاں پہ الّمی اِنت کہ آ مرچگیں اھد ءِ زلورتانی بنیات ءَ وت ءَ گوں المی ءُ زانشتی وانگ ءَ پیوست بہ کن اَنت دانکیں باندا روچ آ بلوچ چاگرد ءِ ساٹگ ءَ کردے پیلو کُت بہ کن اَنت۔

گلکاری ءَ دیمترا سنگتاں تران کُت ءُ گوشتگ کہ بلوچ ڈیہہ ءِ جُتائیں ھنداں وانگجاہانی بندش ءُ بے آسراتی ءِ سبب ءَ مزنیں ھدے ءَ گونڈل چہ وانگ ءَ گستہ اَنت۔ ہمیشی ءِ سبب ءَ باز کم ورنا پہ وانگ ءَ شاہ دربرجاہاں سر بنت ءُ آھانی تہ ءَ ہم بازینے جُتائیں جیڑھانی سبب ءَ وتی وانگ ءَ یلہ کن اَنت۔ بلوچ راجمان ءَ زندگ ءُ سرپدیں ورنائے ءِ بستار ءَ مارا اے جیڑھانی گیشواری ءَ مزنیں تگ ءُ تاچ ءِ کنگی اِنت ءُ بلوچ ءِ ہمُک ورنا ءُ گِس ءَ اے سرپدی سرکنگی اِنت دانکیں آ وتی چُکاں بہ وانین اَنت۔ اشاں ھوار وانگی ادارہانی تہ ءَ نودربرانی جیڑھانی سرءَ عملی گامگیج زیرگی اِنت۔ اے سرھال ءِ گُڈسر ءَ وانگی ادارہانی تہ ءَ استیں ایندگہ جیڑھانی سرءَ مزنیں ءُ دلجمیں باوستے ءَ پد اے بُنگپ آسر کنگ بوتگ۔

دیوان ءِ گُڈی بُنگپ، آوکیں گامگیج، ءَ گوستگیں کابینہ ھلاس کنگ ءُ پہ نوکیں کابینہ ءَ سنگت گچین کنگ بوتگ اَنت۔ نوک گچین بوتگیں زمہ وارانی تہ ءَ شفقت بلوچ کارمستر، تاھر بلوچ کُمک کارمستر، شاہ زیب بلوچ کارگُشاد، مھر بکش بلوچ کُمک کارگُشاد ءُ کرم بلوچ ھالرسانی کارگُشاد گچین کنگ بیت اَنت۔ گُڈسرءَ بُنجاہی سنگت ءَ نوک گچیں بیتگیں زمہ واراں سوگند داتگ ءُ دیوان آسر کنگ بوتگ۔

بنجاہی جارکش: بلوچ اسٹوڈنٹس ایکشن کمیٹی