بلوچ اسٹوڈنٹس ایکشن کمیٹی تُربت ھنکین ءِ نیمگ ءَ چہ یک مزنیں ھیلکاری دیوانے ھنکینی کارمستر سعد بلوچ ءِ سروکی ءَ برجم دارگ بوتگ۔

بلوچ اسٹوڈنٹس ایکشن کمیٹی تُربت ھنکین ءِ نیمگ ءَ چہ یک مزنیں ھیلکاری دیوانے ھنکینی کارمستر سعد بلوچ ءِ سروکی ءَ برجم دارگ بوتگ۔ دیوان ءِ مھمانِ ھاس بُنجاھی ھالرسانی کارگُشاد سنگت فہد بلوچ بوتگ، دیوان ءِ سرھال “انڈرسٹینڈنگ بَرن آؤٹ سوسائٹی” بوتگ کہ آئی ترانکار بنجاہی سنگت فہد بلوچ بوتگ۔

سنگت ءَ وتی گپ بندات کناں ءَ گشت کہ اے سرھال یک کتابے ءَ چہ زورگ بوتگ کہ آئی نبشتہ کنوک یک کورین نبشتہ کارے ءُ آئی نام “بی ینگ-چُل-حَین” انت، ءُ آئی وتی کتاب بَرن آؤٹ چاگرد ءِ نام داتگ بزانکہ دم بُرتگیں چاگرد۔ آئی گُشگ انت کہ آئی اے کتاب ماں جہاں ءِ تہ ءَ سئے مزنیں مٹی ءِ سوب ءَ نبشتہ کتگ کہ آ مٹی فائنانشل کرائسز، رائیز آف انٹرنیٹ ءُ پوسیٹوو کلچر ءُ اچیوومنٹ سوسائٹی اَنت؛ کہ ھمیشانی سوب ءَ چاگرد چہ ڈسئیپلینری چاگرد ءَ در آیاں ءَ اچیوومنٹ چاگردے جوڑ بوتگ؛ کہ ادا نوں واجہ ءُ مزدور یاکہ بُوس ءُ ایمپلائی والا ھیال نزور انت ءُ مردم وت ءَ وت کنٹرول کنگ ءَ اَنت ءُ وت ءَ وت ایکسپلوئٹ کنگ ءَ انت۔ چہ دو ہزار ءَ پیش ءِ وھد کہ انڈسٹریل زمانگ ءِ نام ءَ زانگ بیت آ ڈسپلئینری چاگرد اِنت ءُ آئی مہلوک اوبی-ڈیئنٹ سبجیکٹ ءِ نامہ زانگ بنت کہ مزدور ءُ ایمپلائی بوتگ اَنت اودا فورس، آئیڈیاز، واجہ، بوس، بندیگجاہ ءُ ایندگہ ترز ءِ پابندی بوتگ اَنت ءُ اودا مردماں گشگ بوتگ کہ “شمارا اے کار کنگی انت۔” بلے چہ دوہزار ءَ رند کہ بیست ءُ یکمی کرن ءِ نامہ زانگ بیت ایش نیو-لبرل ءُ اچیوومنٹ چاگرد انت ءُ ایشی مردم اچیوومنٹ سبجیکٹ گشگ بنت۔ ایشی تہ ءَ مردماں اے گشگ نہ بیت کہ شما اے کار ءَ بکن ات، بلے مردماں گشگ بیت کہ “شما کُت کن ات۔” ءُ مردم ھمے چیز زُرتگ ءُ روان اَنت کہ آ ھمک چیز ءَ کُت کن اَنت، گڑا ھر ھما چاگرد کہ آ گُشیت ھچ کنگ ناممکن نہ انت، اودا گڑا ھمک چیز ءِ کنگ ناممکن زانگ بیت انت۔

سنگت ءَ گشت کہ کتاب وت ھشت بہر ءَ اِنت کہ جتائیں بہراں چاگرد ءِ نفسیاتی نادراہیانی سر ءَ گپ جنت ءُ گشیت کہ ھمک نسل ءَ وتی یک سیگنیچر نادراہی ءِ گوں بیت انت، ءُ پیسریگیں نادراہی جسدی رنگ ءَ بوتگ اَنت بلے اے چاگرد ءِ تہ ءَ نادراہی نفسیاتی اَنت، ءُ ایشی سیگنیچر نادراہی چاگردی دم برگ اِنت۔ کتاب ءِ اولی بہر ءِ نام نیورونل پاور انت کہ ایشی تہ ءَ گُشیت کہ گیش پوسیٹوو بوگ ءِ جیڑہ مردم ءَ محروم نہ کنت بلکیں نفسیاتی ھوالہ ءَ ایگزھاسٹ کنت۔ گڑا پمیشکہ اودا سیاست ءُ سیاسی چست ءُ ایر یا وا گار بنت یاکہ سیاسی چست ءُ ایر گوں نپری پائدگ ءَ بندوک بنت اودا مچانکی جہد گار بیت اِنت۔ دیمتر ءَ نبشتہ کار کتاب ءِ تہ ءَ بیونڈ ڈسپلئینری سوسائٹی ءِ سر ءَ گپ کنت؛ گشیت کہ ھنوگیں چاگردانی تہ ءَ فوکو ءِ ڈسلیئنری سوسائٹی ءِ ھیال (کہ اودا جیل ءُ رول-بیسڈ نظامے بیت) ھلاس اِنت، ءُ ما ھما جاہ ءَ اھتگیں کہ مارا گشگ بیت “شما کت کن ات” ءُ شما بکن اِت؛ وھدے کہ یک نودربرے وانگ ءَ انت آ وتی اسکور ءِ واستہ تہی ھوالہ ءَ یک وسوسے یاکہ پریشر ءِ آماچ انت بلے آ انگت ءَ سرپد بیت کہ بس منا کنگی انت۔ بزانکہ مئے گورا “نا” کنگ ءِ فیکٹر ھلاس بوتگ، ءُ جہاں ءِ تہ ءَ یونین ءِ ھیال، سیاسی گلانی ءُ سیاسی مزاحمت ءِ ھیال چہ “نا” (بزانکہ چہ انگریزی ءِ “نُو”) ءَ اھتگ۔ وھدے کہ “نا” ھلاس بیت اودا زھرشانی نہ بیت، بائیکاٹ نہ بنت ءُ مزاحمت نہ بیت، گڑا ھمک مردم وتی نپری پائدگ ءِ ھاتر ءَ یکے دومی ءِ بگیری ءَ کوشست کنگ، ءُ مچانکی جہد ءِ ھیال ءُ احساسات ھلاس بنت، چشکہ مروچی مئے چاگردے یک تہلیں راستی ءِ ھمیش انت۔

سنگت ءَ دیمتر ءَ گپ کناں ءَ گشت کہ کتاب ءِ دگہ بہرے چیزانی ھوالہ ءَ گوں جُہلانکی ءَ ھیال درگیجگ ءِ سر ءَ اِنت کہ ایش ءَ واجہ حَین پروفاؤنڈ بورڈم ءِ نام ءَ دنت ءُ گُشیت کہ ماں جہاں ءِ تہ ءَ نوکیں ءُ مستریں آئیڈیاز چیزانی سر ءَ گوں جُہلانکی ءَ ھیال گور کنگ ءَ چہ اھتگ، بلے مروچی مردم بورڈم ءَ چہ بیزار اَنت، مزنیں کتاب ونت نہ کن اَنت، بیست تاک ءِ چیزے یک بر ءَ کس وانگ نہ لوٹیت، نہ کہ کس ءِ سئے کلاک ءِ لیکچر ءِ گوشدارگ لوٹیت۔ اے کُل چیزانی سوب ایش اِنت کہ ما بور بوگ نہ لوٹ ایں، وھدے کہ یک انسانے بور مہ بیت، آئی گورا جہلانکی ھیال ودی بوت نہ کنت۔ پمیشکہ ما مدُام وائیٹا ایکٹویوا بزانکہ ایکٹوو لائیف ءِ نیمگ ءَ شُتگیں ءُ کنٹیمپلیشن گار کتگ، وھدے کہ انسان کنٹیمپلیشن ءَ گار کنت گڑا آئی گورا مدام ھمے ھیال وجود داریت کہ وت ءَ پیشدارگی انت بزانکہ، ھمک جاگاہ ءَ ءُ ھمک کار ءِ تہ ءَ ایکٹوو بوگی اِنت، پمیشکہ مردم گڑا کار وا کن اَنت بلے نوکیں ھیال نہ جیڑ اَنت ءُ سیاسی کاراں چہ دُور تچ اَنت ءُ ہوار نہ بنت۔ سنگت ءَ گُشت کہ چشکہ ما شما گندیں کہ وانگ، سیاست کنگ ءُ ہیلکاری ءُ تربیت ءِ ھوالہ ءَ یک دم برگ والا ھیالے یاکہ چاگردے وجود دارگ ءَ اِنت ھمک مردم ءَ گندئے داں سما بیت کہ دم برتگ ءِ یاکہ ھچ کنگ نہ ءَ انت اوں انگت ءَ کنگ ءَ انت ءُ دز گٹ انت۔ ھمے چاگردی دم برگ ءِ سوب ءَ مردم چو تیز ءُ اشتاپ بُواں اَنت یک چیزے اوں چو جہلانکی ءَ چارگ نہ بیت بلکیں تہنا سر سری چارگ بنت، سوشل میڈیا ءَ نبشتانک وانگ نہ بنت بس تہنا ویژول رنگ ءَ چارگ بنت، ءُ سیاست تہنا لہتیں سان دؤر دیوکیں اوگامانی سر ءَ بیت اِنت۔

سنگت ءَ گشت کہ کتاب ءِ گڈی بہر چاگرد ءِ دم برگ ءِ سر ءَ انت ءُ اے بہر ءَ واجہ حَین گشیت کہ اے چاگرد ءِ تہ ءَ ھمک مردم چہ وت ءَ دم بُرتگ یاکہ چہ وت ءَ بیزار انت، ءُ انسان ءِ ھما سیگمنڈ والا ایگو فرد ءِ وتی زیر دست ءَ نہ انت، بزانکہ انسان سرپد بیت کہ من دم برتگ بلے انگت ءَ کار کنگ ءَ اُوں۔ دم برتگیں چاگرد ءِ تہ ءَ دم برتگیں مردم مزاحمت کت نہ کنت، بلکیں چیزاں قبول کنت، مردم بائیکاٹ نہ کنت بس زہن ءَ داریت کہ ہئو اے بس مئے سر ءَ اتک ءَ، گڑا زہنی دم برگ انسان ءَ چہ جسدی کاراں دُور کنت ءُ سیاست ءُ سیاسی عمل تہنا پہ نام پَشت کپ اَنت۔ ءُ دیمتر ءَ واجہ حَین گشیت کہ برن آؤٹ چاگرد ءِ تہ ڈپریشن، بَرن آؤٹ سینڈروم نپری نہ بنت بلکیں چاگردی نادراہی بنت، ءُ سوپر ایگو نوں تہنا کامیابی ءِ لوٹ ءَ کنت ءُ سوپر ایگو ءِ لوٹانی سرجم کنگ ءَ پہ ایگو نوں دم بارت ءُ اوشتیت۔ اچیوومنٹ چاگردے تہ ءَ نپر وتی زالم اوں وت ایں ءُ وتی زُلم کنوک ھم وت ایں، پمیشکہ ھنو مئے وھد ءِ بزانکہ مئے چاگرد ءِ سیگنیچر نادراہی بَرن-آؤٹ ءُ ڈپریشن اَنت۔ سنگت ءَ وتی گڈی تران ءَ گپ کناں ءَ گُشت کہ مروچی مئے سرجمیں چاگرد ھمے نادراہیانی آماچ بُواں ءَ وتی راجی، سیاسی، علمی ءُ چاگردی لوٹ ءُ زرورتاں چہ سِداں ءُ دُور بُواں اَنت ءُ ھنچیں لہتیں چاگردی نارداہی ءُ سیلکاریانی آماچ بُواں اَنت کہ آ پہ مئے راج ءُ راجمان ءَ شوکیں پالے نہ اِنت۔ اے کتاب ءِ سر ءَ گپ کنگ ءِ مکسد ھمیش انت کہ ما چاگردی دم برگ، بَرن آؤٹ سینڈروم ءُ ڈپریشن وڑیں نادرہیاں چہ وت ءَ بہ پہریز آں ءُ وت ءَ وتی چاگردی ءُ راجمانی لوٹانی سرجم کنگ ءَ جاڑیگ بکن آں۔

بلوچ اسٹوڈنٹس ایکشن کمیٹی