ایسپ بلوچ
پیش دانک
اے نبشتانک تھنا سردار عطا اللہ مینگل ءِ بابت ءَ دزکپتگیں چندیں گلگدار، سئے ءُ چار واقعات ءُ آئی ءِ سیاسی سپر ءِ بابت ءَ نبشتہ بوتگیں چندیں اھوال ءُ کسّہانی بلوچی اَنت۔ بدبہتی ءَ ھما کہ سردار عطا ءَ قائدِ بلوچستان گوش اَنت، اربابہِ ثلاثہ ءُ باز براں وت ءَ آئی ءِ سیاسی وارث گوش اَنت، ھمایانی گور ءَ ھم سردار عطا ءِ بابت ءَ نبشتہ بوتگیں لبزانک چندیں یاداشتانی رد ءُ بند داتگیں یک موومنٹ یے۔ راستی ھمیش انت کہ مئے مردمانی سر ءَ گیشتر کار مئے جاہ ءَ دگہ راجانی اھوالکار ءُ زانتکاراں کتگ انت ءُ ما ھم انچو دزگٹّ بوتگیں کہ دری مردمانی کار ناں بلوچی ءَ ترّینتگ اَنت ءُ نئیکہ ایشانی سرا تجزیاتی پٹّ ءُ پول کتگ۔ ھمے تب ءَ لھم لھم ءَ مارا انچیں مقامے ءَ آؤرت ءُ سر کتگ کہ ما عطا اللہ مینگل ءِ فکری ءُ سیاسی کد ءُ بالاد ءِ پھمگ ءِ ھاترا یک الکاپیں کارے ءَ چہ ھم زبہر ایں۔ اے کسانکیں نبشتانک ءِ واستہ منی منتواری گوں دری راجانی اھوالکاراں بندوک انت کہ آھاں عطا اللہ مینگل ءِ گومہ گلگدار کتگ، پٹّ ءُ پول کتگ ءُ بلوچاں عطا اللہ مینگل ءِ زانگ ءِ ھاترا کمک کتگ۔
پجّار؛
بیستمی کرن ءِ نیام ءَ بلوچ سیاست ءِ گہیں نام سردار عطا اللہ مینگل 13 جنوری 1930 ءَ بلوچستان ءِ تْیاب دپی شہر لس بیلہ ءَ سردار رسول بخش مینگل ءِ لوگ ءَ ودی بوتگ۔ چوناھا سردار مینگل ءِ پِت ءُ پیرکی بُندر وڈھ انت بلے لس بیلہ ءِ جام ءُ حان کلات ءِ میان ءَ اڑ ءُ کڑانی سوب ءَ رسول بخش مینگل ءَ کلات استان ءِ مزن وزیر وڈھ ءَ چہ گلّین ایت ءُ پدا آ لس بیلہ ءَ جاھمنند بیت۔ اے زمانگ ءَ عطا اللہ مینگل وتی ورنائی ءِ دور ءُ زمانگاں کئیت تہ آئی ءِ وڈھ ءِ روگ ءِ سرا بندش بیت بلے ھمے میان ءَ آ مینگل تمن ءِ آدگہ ٹک ءُ کُٹمانی گوما نزّیکی کنت ءُ وڈھ ءَ پہ وت دوبر سازگار کنت۔ رسول بخش مینگل ءِ لڈّ ءُ بار ءَ پد کرم خان مینگل تمن ءِ سردار بیت بلے عطا اللہ مینگل اردیں بیست ءُ پنچ سال ءِ اُمبر ءَ کئیت داں آ دوبر مینگل تمن ءِ سرداری ءَ وتیگ کنت ءُ ھمے وڑا وھدے پہ سرداری ءَ عطا اللہ ءِ پاگ بندی بیت تہ اے زمانگ ءَ آ کراچی ءَ ہائیر سیکنڈری اسکول ءِ نودربرے بیت۔ عطا اللہ مینگل ءِ وانگی سپر ءِ آسر ایچن سن کالج ءِ جاہ ءَ اسلامیہ کالج کراچی انت۔ آئی ءِ گیشتریں وانگ ماں کراچی ءَ بوتگ۔
ما اے نبشتانک ءِ وسیلہ ءَ عطا اللہ مینگل ءِ سیاسی سپر ءِ سرا یک نگاہے ایر کن ایں ءُ اے زانگ ءِ جہد ءَ کن ایں کہ بلوچانی اربابِ ثلاثہ ءُ بہ گُپتء استان بلوچستان ءِ دیمروئی ھلاپیں لاگر بالادیں سردار ءَ وتی سیاسی سپر کجام ترُپش ءُ تہلیانی نیام ءَ گوازینتگ۔
عطا اللہ مینگل ءِ سیاسی سپر
سردار مینگل وتی سیاسی سپر ءِ بنیات ءَ یک کسّہے ءَ گوں بندوک کنت۔ آ گشیت “پنجاہ ءِ دھک ءَ منء سردار عطا مینگل وتی میتگ ءِ ھاترا پکّائیں سڑک ءِ جوڑ کناں ءُ ایشی ءِ بنگیج ءَ کلات استان ءِ مزن وزیر ءَ لوٹکی کن انت۔ من مہماناں وش اتک کناں ءُ دیم پہ میتگ ءَ روگ ءَ باں کہ نیم راہ ءَ مہمان کِشک ءَ گار بنت، من اردیں بیرہ کناں ءُ دوبر پہ مہمانانی کشک ءِ شوھازگ ءِ کمک ءَ کایں، من مہمانانی گاڑیاں کراس کناں ءُ اشارہ کناں کہ منی پُشت ءَ آیان بئے، وھدے ما لوگ ءَ سر بیں، روچ ءِ ورگ بندات بیت گڑا ڈپٹی کمشنر کئیت ءُ من ءَ گشیت کہ من مزن وزیر ءِ پرسنل اسسٹنٹ ءَ نان ءِ سلاہے بہ جناں، من کہ درّائیناں پچیں دیوانے، درستیں مردم بے گشگ ءَ نان ورگ ءَ انت تہ ڈپٹی کمشنر من ءَ ھال دنت کہ مزن وزیر ءِ پی اے گوں من دلگران انت، من کہ دلگرانی ءِ سوب ءَ جست گراں تہ من ءَ گشگ بیت کہ من مرد ءِ گاڑی کراس کتگ۔”
ھمے کسّہ عطا اللہ مینگل ءَ سیاست ءِ نیمگ ءَ کشّان کنت ءُ اوّلی براں آ 1956 ءِ گیچن کاریاں روکپتی پاکِستان ءَ چہ گچین بیت، دو سال ءَ پد اسکندر مرزا مارشل لا جنت ءُ اسمبلی ھلاس کنگ بنت۔ اھوالکار ریاض سہیل ءِ رد ءَ گوث بکش بزنجو ءَ گشتگ کہ سردار مینگل چہ منی شور ءُ سلاہ ءَ پہ گچین کاریاں جاڑیگ بوتگ۔ ھمے وڑا 1962 ءِ گچین کاریاں آ یکبرے پدا چہ کلات ڈویژن ءِ سیٹ ءَ باج بارت۔ ھمے زمانگ ءَ ون یونٹ ءِ نظام آرگ بیت ءُ سردار مینگل ھمے نظام ءِ ھلاپیں سیاسی چست ءُ ایرانی بہر بیت۔ لیاری ءِ ککری گراؤنڈ مچّی ءَ سرکار ءِ ھلاپیں گشتانک ءِ سوب ءَ آ دزگیر کنگ بیت۔ شست ءِ دھک ءِ گڈسر ءَ بلوچ سیاستدان نیشنل عوامی پارٹی ءِ بہر بنت ءُ ھپتاد ءِ گچین کاری ءَ چہ نیپ ءِ تلّو ءَ بہر زورنت۔ پرے گچین کاریانی سوب ءَ عطا اللہ مینگل بلوچستان ءِ اوّلی سر وزیر گچین کنگ بیت۔ سردار مینگل وتی سر وزیری ءِ باریگ ءَ ھشت ماہ، بازینے نوہ ءُ باز دہ ماہ گشیت بلے ایشی ءِ بنداتی وھد 1 مئی 1972 ءُ آسری وھد 15 فروری 1973 اِنت۔ سردار مینگل ھمے لُکّیں مدّت ءِ تہ ءَ بلوچستان ءِ وانگی نظام ءِ گہتری ءِ ھاتر ءَ گامگیج زوریت کہ بلوچستان مزن شھدربرجاہ، بولان میڈیکل کالج، ھزدار ءِ بیوٹک یونیورسٹی ءُ بلوچستان بورڈ ءِ جوڑ کنگ ھوار انت۔ سردار مینگل صوبائی وت واجہی ءِ منّوگر بیت تہ ھمے رد ءَ آ دری دمگانی کساس 5500 نوکر چہ بلوچستان ءَ کشّیت ءُ ایشانی جاہ ءَ بلوچستان ءِ مردماں نوکری دنت۔
ھمے وڑا کوسٹ گارڈ ءَ را بلوچستان ءِ تْیاب ءَ گشت کنگ ءَ داریت ءُ سرکاری فرمانے شنگ کنگ بیت کہ کوسٹ گارڈ گشت کنگ ءِ ھاترا دمگی (ضلعی) انتظامیہ ءَ چہ پیشگی موکل بہ گِپت، ھمے وڑا بلوچ دریا وردانی ماں زر ءَ کار کنگ ءِ ھند ءَ 12 ناٹیکل میل ءَ گیش کنت ءُ 50 ناٹیکل میل کنت۔
چوناھا نیپ سرکار ءُ بنجاہی سرکار ءِ نیام ءَ اڑ ءُ کڑ بنداتی روچاں چہ سر چست کن انت، مصطفی کھر بندات ءَ وتی بیوروکریٹساں واپس کنت تہ ھمے بنیات ءَ بلوچستان انتظامی جیڑہ ءُ جنجالانی آماچ بیت، پدا پولیس زھرشانی کنت، نیپ سرکار صوبائی سطح ءَ دمگی لشکرے وَ جوڑ کنت بلے بنداتی وھداں بہ گُپتء ڈاکٹر حکیم لہڑی ءُ ڈاکٹر سلیم کرد نیپ ءُ بی ایس او ءِ سنگتاں بلوچستان ءِ تہ ءَ پولیس ءِ کار جنزینتگ انت، ٹریفک پولیس، شہری پولیس ءُ ھندی پولیسنگ ءِ زمہ رضا کارانہ بنیات ءَ سیاسی سنگتاں گون بوتگ انت۔
نیپ ءِ سرکار ءَ سالے ءَ چہ ھم کم مدّت ءَ کار کنگ ءِ موہ دئیگ بیت۔ نیپ ءِ سرکار ءِ ھلاسی ءِ بابت ءَ بازیں ھیال نبشتہ کنگ بوتگ۔ ڈاکٹر سلیم کرد ءِ رد ءَ شاہِ ایران ءَ نیپ ءِ بابت ءَ بے چاڑی بوتگ کہ نیپ ءِ سروکانی سان روکپتی بلوچستان ءِ سیاسی چست ءُ ایراں سانمند کنگ ءَ بوتگ انت، ڈاکٹر کرد، رضا پہلوی ءِ گلگدارے ءِ ریفرنس ءَ دنت ءُ گشیت کہ رضا پہلوی ءَ گشتگ اگاں پاکستان جیڑہ ءُ جنجالانی آماچ بوت تہ ایران وتی پہازگ ءِ ھاترا(پروٹکٹیو ایکشن) زوگ ءِ واک ءَ داریت، چرے گلگدار ءَ پد بلوچستان ءِ سیاسی تلّو ءَ شور ءُ جگّا بِنا بیت، اے جیڑہ ءِ گیشواری ءِ ھاترا یکبرے گوث بکش بزنجو ایران ءَ رؤت، دیوان ءُ مجلس کنت ءُ شاہ ءِ گوما نزّیکی یے جوڑ کنگ ءِ نیّت ءَ رضا پہلوی ءِ لوگی فرح پہلوی ءَ بلوچستان آیگ ءِ لوٹکی دنت، زال بلوچستان ءَ کئیت، زال ءِ مہمان نوازی کنگ بیت بلے جیڑہ ءِ گیشواری نیم بندگی پش کپیت۔ عطا اللہ مینگل ءِ رد ءَ ذوالفقار بھٹو بندات ءَ چہ نیپ ءِ سرکارے جوڑ بوھگ ءِ پلّامرز نہ بوتگ بلے اے وھداں پوج ءِ جیڑہ باز بوتگ انت ءُ پوجی کمک ءِ نیستی ءِ سوب ءَ آ نیپ سرکار ءِ جوڑشت ءِ دیما لاچار بوتگ۔ اھوالکار حامد میر ءِ رد ءَ گڈّی زمانگ ءَ بھٹو ءَ وتی کتاب ” افواہ و حقیقت“ ءِ تہ ءَ نبشتہ کتگ کہ نیپ حکومت ءِ گومہ من ھرچی کتگ آ پوجی سروکانی دباؤ ءِ بنیات ءَ کتگ۔ نیپ سرکار ءِ ھلاسی ءِ بابت ءَ دگہ ھیالے اے ھم استیں کہ 1973 ءِ بندات ءَ بھٹو سرکار استان ءِ دستور ءِ تہ ءَ مٹّ ءُ بدلی ءِ واھگدار بوتگ، اے مٹّ ءُ بدلی یک شق یے ءِ ھاترا بوتگ کہ مزن وزیر ءِ ھلاسی ءِ ھاترا دو سوائی ووٹ الّمی بہ بیت بلے نیپ پرے ترمیم ءِ پلّامرزی ءُ ھلاپ بوھگ ءِ بابت ءَ لاہور ءَ مجلس کنت ءُ ترمیم ءِ ھلاپی ءِ جار جنگ بیت۔ پرے ترمیم ءَ کمّو وھد پد عراقی سفارتخانہ ءَ سِلاہ درکنگ بیت ءُ بھتام جنگ بیت کہ اے سِلاہ پہ بلوچستان ءِ وت واجہی جنز ءِ ھاترا دیم دئیگ بوتگ انت۔ ھمے جیڑہ بنیات ءُ جواز کنگ بیت ءُ بلوچستان ءَ نیپ سرکار ھلاس کنگ بیت ءُ پختونخواہ ءَ نیپ پہ زھرشانی سرکار ءَ چہ دزکشّ بیت۔ نیپ سرکار ءِ ھلاسی ءَ پد نیپ ء سروک حیدر آباد سازش کیس ءِ بنیات ءَ زندانی کنگ بنت، پرے زندانی ءِ مدّت کساس چار سال جلّیت کہ 1978 ءَ جنرل ضیا، بھٹو سرکار ءَ ھلاس کنت ءُ نیپ ءِ سروکاں چہ زندان ءَ آجو کنت۔ عطا اللہ مینگل زندانی ءِ وھداں آئی ءِ کستریں بچّ اسد مینگل زورانسری بیگواہ کنگ بیت ءُ پدا نہ ایشی ءِ سلامتی ءِ ھال ءُ نئیکہ مرگ ءِ ھال شنگ کنگ بیت، اے وئیل سردار عطا اللہ ءِ سرا سکّیں تورناکیں سان پشگیج ایت ءُ اردیں عطا مینگل چہ زندان ءَ آجو کنگ بیت تہ آ یکبرے امریکہ ءَ دل ءِ سرجری ءَ کنائین ایت، امریکہ ءَ چہ واتری ءَ پد کسانیں وھدے ءِ واستہ شیرباز مزاری ءِ گل این ڈی پی ءِ باسکی زوریت، پدا درانڈیھ بیت ءُ لندن ءَ ورلڈ بلوچ آرگنائزیشن ءَ جوڑ کنت۔ محمد تقی نبشتہ کنت کہ سردار مینگل لندن ءَ علامتی بنیات ءَ بلوچستان ءِ وت واجہی ءِ جار ءَ جنت، ھمے وڑا علی بھٹو انگریز اھوالکار لارنس ءِ ماں سردار مینگل ءِ 1983 ءَ چہ اکنامک اینڈ پولیٹیکل ویکلی ءِ گوما گلگدارے ءِ ریفرنس ءَ نبشتہ کنت کہ ” من بلوچستان ءِ آجوئی ءِ جار اے واستہ جتگ کہ ما سئے دھک ءِ تشدد ءَ پد یک ارزشتداریں مقامے ءَ سر بوتگ انت۔ بلے ھمے درانڈیھی ءِ موسم ءَ سردار مینگل دگہ راجانی سیاستدان چشکہ خالد لغاری، حفیظ پیرزادہ، افضل بنگش ءُ ممتاز بھٹو ءِ پجّی ءَ ماں 1985 ءَ سندھی، بلوچ، پشتون فرنٹ بزاں ایس بی پی ایف ءَ جوڑ کنت، اے ھواریں فرنٹ ءِ بنّکی لوٹ کنفیڈرل اسٹرکچر بزاں صوبائی وتواکی ءِ بیت بلے اے گل وتی مکسد ءَ گوں سوبین نہ بیت۔ 1988 ءِ زمانگ ءَ وھدے جنرل ضیا مریت تہ پاکستان ءِ تہ ءَ جمہوریت ءِ بحالی ءِ اوگام دیم ءَ کئیت، استان ءِ تہ ءَ ایم آر ڈی ءِ جنز جنزیت بلے لندن ءَ نشتگیں عطا اللہ استیں نظام ءُ گچین کاریاں بہر نہ زوریت، سال 1988 ءِ گچین کاریاں سردار مینگل، گوث بکش بزنجو ءِ گوما سیاسی تپاوت داریت،آئی ءَ سیاسی کمک نہ کنت تہ جان محمد دشتی ءِ رد ءَ ھمے سوب ءَ گوث بکش گچین کاریاں بے سوب بیت۔ ممکن انت اے زمانگ ءَ عطا اللہ ءِ جیڑگ ھمے بوتگ کہ ” سر ھما انت تھنا کُلاہ مٹّ کنگ بوتگ“۔ بلے بیاکہ دیمترا عطا اللہ ءِ سیاسی بالاد ءِ مانگشّینوک ھمے سرگ ءُ کلاہ بنت۔ سردار مینگل 1996 ءَ وتی درانڈیھی ءِ سپر ءِ اُرداں پیچ ایت ءُ بلوچستان ءَ واتر بیت۔ آ یک نوکیں پارلیمانی سیاسی گلے بلوچستان نیشنل پارٹی ءِ نام ءَ جوڑ کنت ءُ یکبرے پدا 1997 ءِ گچین کاریاں بہر زوریت ءُ وتی بچّ اختر مینگل ءَ بلوچستان ءِ سر وزیر بوھگ ءَ کمک کنت۔ قیوم بیدار نبشتہ کنت کہ 1997 ءِ گچین کاریانی تگ ءُ تاچ ءَ عطا اللہ مینگل دیمی سرپ ءَ بوتگ چشکہ بیدار نبشتہ کنت کہ اے زمانگ ءَ من شالکوٹ ءَ پی ٹی وی ءِ پروڈیوسر بوتگ انت، سردار مینگل بی این پی ءِ سرکماش ءِ بستار ءَ حاصل خان بزنجو ءُ حبیب جالب ءِ ہمراہی ءَ اتکگ ءُ گچین کاریانی ھاترا جوڑ بوتگیں ٹرانسمیشن Election hour ءِ تہ ءَ بی این پی ءِ سیاسی پروگرام ءِ سرا تران کتگ۔ سندھ ٹی وی نیوز ءِ اھوالکار سردار رحیم ھمے لیکہی ءُ سیاسی پروگرام ءِ سرا مانگیّشگ ءُ اڑ ءُ کڑ ءِ بابت ءَ سردار مینگل ءَ جست گیپت تہ آ درّائینیت کہ ما سما کتگ نوں بلکیں استان ءِ نیام ءَ جمہوریت بحال بوتگ بلے چش نہ بوتگ۔
سردار مینگل ءِ سیاسی سپر بزاں سر وزیری، آجوئی پسندی، ایس بی پی ایف ءِ جوڑشت پدا بی این پی ءِ جوڑ بوھگ ءُ دوبر گچین کاریاں بہر زورگ ءَ روان کنت داں 2006 ءَ پونم ءِ سروکی ءَ آسر بیت۔ پونم یک سیاسی ہمسنّتی یے بیت کہ ایشی ءِ تہ ءَ استان ءِ نیام ءَ آباتیں نزور ءُ لگتمالیں راج یک ھمسنّتیں سیاسی گلے ءِ بنیات ءَ مشرپ سرکار ءِ ھلاپ ءَ جہد کن انت۔ سال 2006 ءِ نیامی ماہ بزاں جون ءَ سردار مینگل پونم ءِ کماشی ءَ ھوار عملی سیاست ءَ چہ یکِرّ بیت۔ چد ءُ دیم آ پاکستان مسلم لیگ نون ءِ نیمگ ءَ سال 2012 ءَ عبوری مزن وزیر ءُ سال 2013 ءَ استان ءِ سرکماش بوھگ ءِ لوٹکی ءَ رد کنت۔ ھمے زمانگ ءَ سردار مینگل جاہے گشتانکے دئیگ ءَ گندگ بیت، جاگہے اھوالکارے ءَ گوں گلگدار ءَ، اے بری آئی ءِ زبان نپت ءُ بیر شانیت برے گلّہ ءُ ملاماں چہ سر چکار بیت۔ پدا ھمے دور ءُ باریگاں پیر ءُ عاجزیں سردار کم کم ءَ وت ءَ رسانکدر ءَ چہ گِستا کنت۔ ریاض سہیل نبشتہ کنت وھدے من سردار مینگل گلگدارے ءِ ھاترا گشتگ تہ آئی ءَ ساپیں زبانے ءَ پسّو داتگ ” میں بھیڑیوں کے آگے بین نہیں بجانا چاہتا“، اردیں من گیشیں سرپدی ءِ واستہ آئی ءِ لوگ ءَ شتگاں تہ من ءَ گشتگے کہ کرّ، کور ءُ گنگانی دیم ءَ کوکار دئیگ ءَ ھچ مکسد نیست۔
گڈّی دانک؛
لاگر بالادیں سردار، مینگل تمن ءِ سرداری ءَ کنت، پدا سال 1985 ءَ وتی بچّ منیر مینگل ءَ سردار کنت ءُ وتی زند ءَ منیر مینگل ءِ مرگ ءَ پد وتی نماسگ ءُ منیر مینگل ءِ بچّ سردار اسد اللہ مینگل ءَ تمن ءِ سردار کنت۔ سہیل وڑائچ ءِ گوما وتی گلگدارے ءَ گشیت کہ اسد مینگل ءِ نام من وتی بیگوائیں بچّ اسد ءِ نام ءَ چہ زرتگ ءُ مینگل تمن ءِ نوکیں سردار ءُ وتی نماسگ ءَ پِر کتگ۔ اے کسّہے نبشتہ کنگ ءِ منی مراد اسل ءَ ایش ات کہ بلوچستان ءِ سر وزیر سردار مینگل ءَ 21 جون 1972 ءَ سرداری نظام ءِ ھلاسی ءِ ھاترا بلوچستان اسمبلی ءَ یک قرارداد ءِ پیش کتگ بلے ایشی ءِ سرا عمل کنگ ءِ واک بنجاہی سرکار ءَ کنگی بوتگ ءُ بھٹو سرکار پرے قرارداد ءَ ھچ کِمار اوں نہ کنت۔ محمد تقی نبشتہ کنت کہ بھٹو ءِ نزّیکیں سنگت ءُ ھما زمانگے وزیر رفیع رزا ءَ نبشتہ کتگ کہ منا عراقی سفیر ءَ وت ھال داتگ کہ ایراقی سفارتخانہ ءَ درکپتگیں سِلاہ بلوچستان ءِ ھاترا نہ بوتگ بلکیں ایران ءِ ھلاپ ءَ کارمرزی ءِ ھاترا بوتگ انت۔
سردار مینگل ءِ سیاسی سپر جہل ءُ برزی ءُ اندری تضاداں چہ سرّیچ اِنت، مستریں تضاد درانڈیھی ءِ زمانگ ءَ سردار ءِ لیکہی اسٹانس ءُ درانڈیھی ءَ پد داں پونم ءِ جوڑشت ءَ آئی ءِ لیکہی اسٹانس ءِ وت ماں وت اڑ ءُ کڑ اِنت کہ اے نیام ءَ سردار مینگل لیکہی ھساب ءَ چو ھیربکش ءَ تچک گندگ ءَ نئیت۔ پختون کوّاس محمد تقی، سردار مینگل ءِ بابت ءَ ” ریڈیکل موڈریٹ“ ءِ گالرد ءَ کارمرز کنت، تقی ھمے گالرد ءَ پرّیچان ءَ گشیت کہ سردار مینگل آجوئی پسندے وَ بوتگ بلے آجوئی ءِ ھاترا تشدد ءُ توپک ءَ را اوزار ءِ پھمگ ءُ منّگ ءِ حق ءَ نہ بوتگ پمشکہ آ ”موڈریٹ“ ءِ بوتگ۔ جان محمد دشتی، سردار مینگل ءَ را ریشنلسٹ ءِ سرپد بیت ءُ بلوچانی گور ءَ آ سئیں نامی ئیں سردارانی لڑ ءَ یات دارگ بیت کہ آھانی سرا سرکار مدام نا وشّ بوتگ۔ اے لڑ ءِ سردار اربابِ ثلاثہ ءِ نام ءَ ھم یات دارگ بنت۔
وتی زند ءِ گڈّی وھداں سردار مینگل وتی گلگدارانی تہ ءَ استیں نظام ءَ چہ نا امیت انت۔ سردار رحیم ءِ گوما وتی گلگدارے ءَ گشیت کہ اگاں کسے مرچی ھمے بھتام ءَ بہ جنت کہ شما بلوچستان ءَ چہ استیں استان ءَ جتا کنگ لوٹ اِت تہ اے مئے واستہ یک شرپ یے ءُ ما پہر بنداں۔ ھمے وڑا ڈان نیوز ءِ گوما وتی گلگدارے ءَ گشیت کہ مرچی بلوچ ءِ واستہ پرے ھبر یک پشومانی یے کہ آ اے استان ءِ پیرا میٹر ءَ وتی حقّاں پچ گپت کنت، مرچی مایوسی وتی سیمسراں چہ ھما دست انت، منا انچو سما بیت کہ ما یکّے دومی ءَ زبان ءَ سرپد نباں ھمے واستہ منی ھیالاں مئے جیڑہ ءِ توجیل ھما دیوانگانی دست ءَ یل دئیگ بہ بیت کہ آ ناں وتی بسات ءِ شر کنگ زان انت ءُ نئیکہ دومی ءِ بسات ءِ ھیالداری زان انت ءُ آ دیوانَگ مئے ورنا انت۔ سہیل وڑائچ وھدے جستے کنت کہ تئو بلوچستان ءِ وت واجہی ءِ پلّامرزے تہ سردار مینگل پسّو دنت منا ایردستی ءِ ھچ دروشم دوست نہ بیت۔ ریاض سہیل نبشتہ کنت کہ بی بی سی ءِ گوما گپّ کنان ءَ سردار مینگل ءَ گشتگ ” ما چہ اے استان ءَ دلگران نئیں بلکیں بے زاریں“۔
سردار مینگل 2 ستمبر 2021 ءَ کساس 91 سال ءِ اُمر ءَ بیران بیت ءُ آئی ءِ مانش وڈھ بلوچستان ءَ انت۔ سال 1997 ءَ انگریزی روتاکے ءَ داتگیں گلگدارے ءَ وھدے سردار مینگل آئی ءِ کستریں بچّ اسد مینگل ءِ کُنٹ ءِ بابت ءَ جست کنگ بیت تہ آ پسّو ءَ گشیت ” آ ھمے جنگ ءِ مرتگیناں چہ یکّے ات“۔
سرشون؛
موومنٹ بیادِ سردار عطا اللہ مینگل- شعبہ نشر و اشاعت بی این پی
عطا اللہ مینگل؛ جس نے سرداری نظام کے خلاف بغاوت کی- ریاض سہیل ( بی بی سی اردو)
بلوچ سیاست میں خلا، مینگل کٹ اور نئے دور کے تقاضے – ہزار خان بلوچ ( انڈیپنڈنٹ اردو)
فریادِ بلوچستان- حامد میر (روزنامہ جنگ)
Attaullah mengal: A rare breed mengal, who passed away on September 2,2021 had sought to abolish the tribal system by Ali Bhutto ( Express Tribune)
Sardar Attaullah Khan Mengal: The radical moderate by Mohammad Taqi ( The Friday Times)
