غزہ ءِ سر ءَ بیوکیں زوراکی
الجزیرہ ءِ نیمگ ءَ چہ شنگ بوتگیں ڈاکومنٹری ”وار کرائمز اِن غزہ“ ءِ سرا کسانیں ترْانے
سنا بلوچ
چمشانک:
الجزیرہ ءِ نیمگ ءَ چہ یک ڈاکومنٹری یے ”وار کرائمز اِن غزہ“ ءِ سرھال ءَ شنگ بوتگ ات۔کساس یک کلاک ءُ بیست ءُ یک منٹ ءِ کسانیں تامرے کہ آ الجزیرہ ءِ پٹّ ءُ پولی ٹیم ءِ نیمگ ءَ چہ بازیں پٹّ ءُ پول ءُ تچ ءُ تاکاں پد جوڑ کنگ ءُ شنگ بوتگ۔اے کسانیں تامر ءِ ترْان ءِ بنکّی لوٹ اسرائیل ءِ ءُ ھماس ءِ میان ءَ چست بوتگیں جیرہ ءِ سرا اِنت کہ چہ آئی ءِ سبب ءَ گزہ ءِ لس مہلوک ءِ سرا اسرائیل ءِ پوج ءَ چونیں روْشت زرتگ، لس مہلوک ءِ تہا چے رنگیں جیڑہ چست بوتگ،اسرائیل ءِ پوج ءِ تب ءُ میان استمانی گلانی کِرد اے بنگپّانی سرا ترْان کنت۔
اے ترْان ءَ سئے کسانیں بہر ءِ تہءَ گیشینگ ءِ جہد کناں۔
اولی، اے تامر غزہ ءِ سرءَاسرائیل ءِ 7اکتوبر 2023 ءِ ارشاں بہ گر داں گڑسری وھداں بوتگیں ارشاں بیا اے درستینانی سرءَ گپ ءُ ترْان کنت ءُ گشیت کہ 28 دسمبر ءِ ارش ءَ کساس 69% گزہ ءِ زرباری نیمگ ءِ لوگ ءُ ماڑی کپتگ ءُ پرْشتگ انت ءُ 27%گوریچانی نیمگ ءِ لوگ ءُ ماڑی کپتگ انت۔کُلّ 21110 مردم مرتگ۔نہ تہنا جنگول بلکیں لس مہلوک اوں ایشانی آماچ بوتگ۔زلم ءُ زوراکی ءِ درْچ چہ ھمدءَبندات بیت۔پدا 15 پروری 2024 ءَ کہ اُرش کنت اے ارش ءَ کلّ 28663 مردم مریت۔ مزنیں کساسے ءَ لوگ ءُ ماڑی ٹکّر ٹکّر بنت۔اے تامر دیمترءَ ترْان کنان ءَ گشیت کہ اے کلّیں ارشاں روایرکپت (ویسٹ) ءِ ملکانی مزنیں دستے مان بوتگ۔ آ درور دنت کہ 69% سُپاہگ ءُ توپک چہ امریکہ ءَ اتکگ اَنتءُ30% چہ جرمنی ءَ۔ھمدءَ الجزیرہ ءِ جُست گِروکیں باسک گزہ ءِ نندوکیں لہتیں مردماں گوں جُست کنت گڑا یک پیریں کماشے وتی کسّہانی آرگ بندات کنت۔آ گشیت ”ھمے وھداں چاریں نیمگاں ٹوپ ءُ بمبانی توار بندات بوتگ گڑا منی دراہیں زھگ ءُ نماسگ اتکگ اَنت منی کرّا نشتگ اَنت، واہ ءُ زار اِش کرتگ، من آہاں دلبڑّی داتگ کہ اے دُور اَنت، مئے گوْرا نہ انت۔“ یک مات یے گوں گریوگاں وتی زھگ ءِ لہتیں وھد پیسر ءِ کسّہ آں کاریت پدا سھتے ءَپد بمباری بندات بیت ، مزن منزیں ٹوپانی کپگ ءَ گوں ھرکس و پہ وت ٹپگ ءِ جاہے پٹ ایت ، کمو سہت ءَ پد بلُک چار ایت داں زھگ ٹوپانی دپ ءَ اتکگ ءُ جنگ بیتگ ءُ آئی ءِ جون ٹُکر ٹُکر ءَ لوگ ءِ لاپ ءَ کپتگ۔
اے تامر ءِ تہءَ شما اسرائیل ءِ پوج ءُ مہلوک ءِ تب ءَ دیست کُت کن اِت کہ آ چوں گوں اے زلم ءُ زوراکیاں شادمانی کنگ ءَ اَنت ۔یک کسانیں تامرے ءِ تہءَ اسرائیل ءِ لشکر اِنت کہ ناچ ءَ اِنت ءُ سوت ءَ جنگ ءَ انت ءُ ایدگہ پسّہ دیگ ءَ انت دومی دستاں پلستینیانی نیمگ ءَ ٹال کن اَنت ءُ ترز ءِ سرا گش انت کہ”شمے کوچگ بہ سُچات انت“ ”شمے کوچگ بہ سچات انت۔“ اے دابیں سوتاں چہ تو سما کنےکہ اسرائیلیاں پلستین ءِ مہلوک کہ گژن ءَ مرگ ءَ انت، زنداناں بند انت، ھچ سُدّ اِش پِر نیست۔اسلا اے اسرائیلیانی تب نہ اِنت کہ آ چو بے سُدّ انت بلکیں اے تاگت ءِ تب اِنت ءُ تاگتءِ نشہ اِنت۔
اے تامر گشیت کہ اسرائیل ابرمی ءُ دنیائی رھبندانی ھلاپیں روْشتے زورگ ءَ اِنت بلے میان استمانی گلانی ھاموشی یک جُستی نشانے۔آ گشیت اینچو کہ میان استمانی گلاں اے جیڑہ ءِ سرءَ گپ کنگی بوتگ، پلستین ءِ مہلوک ءَ را کمک کنگی بوتگ، آہاں کُت نہ کتگ۔گپّ پدا تاکت ءِ کئیت کہ ھرچ استانے کہ تاکتور اِنت میان استمانی گل ھمائیءِ نیمگ ءَ رونت۔
آسر
بلوچستان 1948 ءَ بہ گر دانکہ ھنوگ ءَ بیا ھمے زلم ءُ زوراکیانی تہءَ سرجنان اِنت۔انوں چاردہ سال اِنت کہ یکشلیں کُشت ءُ ھونی یے ءِ آماچ اِنت۔زندانانی کسّہ بہ بنت یا جونانی،جنگلانی سوچگ ءِ کسّہ بہ بنت یا لوگانی، یکشلیں زوراکی ی کہ کمی ءُ نرمی ءِ نام ءَ نہ زانت۔گنج ایش اِنت کہ پلستینیاں وتی جیڑہ ءُ جیڑہ ءِ پُژدر دنیا ءَ را پیشداشت۔وتی جنگ کنگ ءِ سبب ءُ راستی دنیا ءِ دیم ءَ ایر کُت۔مزنیں کساسے ءَ دنیا ءِ ترْانانی بہر بوت ءُ انگہ است اِنت۔بلے بلوچ انگہ چشیں کچّے ءَ دنیا ءَ سر نہ اِنت،دنیا ءِ باوستانی بہر نہ اِنت،دنیا نہ آئی ءِ جنگ ءِ سوب ءَ زانت نہ اے ھمرّوچیگیں زلم ءُ زوراکیاں سرپد اِنت۔گپّ پدا تاکت ءِ کئیت اِنت۔بلے ھمے بلوچ کہ پلیستین ءِ جیڑہانی سرءَ گپ کن اَنت،انسانی ھکّانی پادمالی ءِ سرءَ مزن مزنیں پوسٹ نبشتہ کن اَنت،گشتانک دئینت۔گشتانک، پوسٹ، گپّ، وتی ھیالاں درشانگ ءَ شرّ انت۔ بلے آ اے چیز ءَ بے ھال مہ بنت کہ آ ھوں انچیں جاورے ءِ تہءَ اَنت۔کجام ہم وھدے ءَ اے دابیں چیزانی آماچ بوت کن اَنت۔ھما کسّ کہ دگر ءِ ھون ءُ جوناں دیست کن اَنت گڑا بائد یں وتیگاں ہم کور مہ بنت۔
