ھبیب بلوچ ھنکینی کار مستر ءُ یاسر بلوچ ھنکینی کار گُشاد گچین کنگ بوتگ اَنت
بلوچ اسٹوڈنٹس ایکشن کمیٹی تربت ھنکین ءِ ھنکینی لَس دیوان، ھنکینی کار مستر ھبیب بلوچ ءِ سروکی ءَ برجم دارگ بوتگ۔ دیوان ءِ مھمانِ ھاس بُنجاھی کُمک کماش سنگت رفیق بلوچ ءُ بُنجاھی کمیٹی ءِ باسک سنگت پوزیہ بلوچ ءُ گچینی مھمان بُنجاھی کُمک کارگشاد سنگت مھمد بلوچ ءُ بُنجاھی کمیٹی ءِ باسک سنگت مسدق بلوچ بوتگ اَنت۔ دیوان ءَ بُنجاھی سرکیولر، ھنکینی کارگُشاد اھوال، نگدی دیوان، گَل کاری ءُ ھندی ءُ میان استمانی سیاسی جاورھال ءِ سرھالانی سرا تْران کنگ بوتگ۔
دیوان ءَ بُنجاھی سنگتاں تْران کنان ءَ گشت مھکمیں پگرانی واھند بلوچ ءِ باندات ءَ گیشین اَنت ءُ بلوچ سیاست ءِ دیمروی ءِ مانزمان بنت۔ مرچی بلوچ ورناھاں بلوچ سیاست وتی کنگ ءُ بلوچ راجدوستی ءِ ڈبہ زورگی اِنت، بلوچ سیاست ءُ ایدگہ ھورکیں پڑانی سرا کار کنگ چاگرد ءِ دیمروی ءِ لوٹ اَنت کہ مئے ورناھاں اے زمہ واری زورگی اَنت۔
دیمترءَ سنگتاں گشت مرچی ءَ چہ کمو وھد پیسر کیچ سیاسی ھوالہ ءَ باز مھکم بوتگ، بلے مرچی گندگ بیت کہ کیچ ءِ مھلوک چہ دیمروی دوستیں سیاست ءَ چہ دور بوان اَنت، راج دوستی، زبان دوستی ءُ کتاب کلچر ءُ نبشتہ کاری ءَ چہ مھلوک دور بوان اَنت۔ سیاسی ھوالہ ءَ نا پہتگی گندگ بیت ءُ مھلوک انچو مان گیشیتگ کہ راستیں سیاست ءُ سیاسی گَلانی منگ ءُ ھمراھداری ءَ جاڑیگ نہ اِنت۔ مرچی کیچ ءِ ورناھانی تہءَ سیاست ءِ بھر نہ بوگ، سیاسی جرات نہ بوگ ءُ ڈسپلن ءِ نہ بوگ ءِ مستریں سوب ھما تاگتاں کہ وتی زوراں گوں مھلوک ءَ غیر سیاسی کنگ ءَ اَنت ءُ چاگرد ءَ اوشت ءِ آماچ کنگ ءَ اَنت۔ مرچی نودربر سیاست ءَ گوں ھمگرنچیں نودربر کیچ ءِ سیاست ءِ وارث اَنت ءُ ھما روجدوستیں سیاسی راھشونانی پگر ءُ فلسفہ ءِ دیم ءَ برگ ءِ زمہ وار اَنت۔
تْران کنان ءَ بنجاہی سنگتاں گشت کہ بساک یک نودربر گَلے ءِ بستار ءَ بلوچستان ءِ کُنڈ کُنڈ ءَ وتی لیکہ ءَ سر کنگ ءِ جہد ءَ اِنت۔ بلے مرچی مئے گَل وتی منزل ءِ اولی پدیانکان اِنت۔ بلوچستان ءِ زمینی راستی ھمیش اِنت کہ بلوچ ءِ گیشتر آبادی ماں کوہ ءُ کوچگاں جھمنند اِنت بلے اے دمگاں زند ءِ سرجمیں بُنکی آسراتیاں ھوار پہ چار لبز ءِ دربرگ ءَ وانگجاھے ھم نیست ءُ نہ پہ سرپدی ءَ دگہ آسراتی ۓ۔ بلوچستان ءِ جتائیں ھند ءُ دمگاں ھوار کیچ ءِ جتائیں ھند ءُ دمگ چہ وانگ ءُ زانگ ءِ آسراتیاں زبھر اَنت۔ مئے ورنا یکے چہ وانگ ءُ زانگ ءَ دور دارگ بوتگ اَنت ءُ زوراں گوں غیر سیاسی کنگ بوگ ءَ اَنت۔ مرچی ما گندیں کہ ھچ کس اے جیڑھانی گیش ءُ گیوار کنگ نہ لوٹیٹ۔ بساک یک نودربر گَلے ءِ بستار ءَ جھد کنت کہ اے جیڑھاں گیش ءُ گیوار بہ کنت۔تنظیم ءِ پروگرام ءَ سر کنگ ءِ واستہ ما جہد کنیں ءُ ھمے دمگاں وانگجاہانی فعالیت ءِ واستہ بلوچ لٹریسی کیمپین بابت ءَ مھلوک ءَ سرپدی دئیں۔
دیوان ءِ جتائیں سرھالانی سرءَ تْران ءَ پد آؤکیں گامگیج ءِ بنگپ ءَ گوستگیں ھنکینی کابینہ ھلاس کنگ بوت ءُ نوکیں کابینہ گچین کنگ بوتگ۔ نوک گچین بوتگیں کابینہ ءَ ھبیب بلوچ ھنکینی کارمستر، عبداللہ بلوچ ھنکینی کُمک کارمستر، یاسر بلوچ ھنکینی کارگُشاد، مختار بلوچ ھنکینی کُمک کار گُشاد ءُ نُگرہ بلوچ ھنکینی ھالرسانی کارگشاد گچین کنگ بوتگ اَنت۔ گڈ سرءَ سوگندی دیوان ءَ پد دیوان آسر کنگ بوتگ۔
