رمس 27-ستمبر-2023 آ بلوچ اسٹوڈنٹس ایکشن کمیٹی شال ہنکین نا ہنکینی تربیتی مجلس اس ہنکینی کارمستر سنگت علی جان مقصود بلوچ نا کماشی ٹی اڈ تننگا۔ دیوان نا مہمان بنجائی کمیٹی نا باسک سنگت پیر جان بلوچ ئسک۔
Demographic Changes in Balochistan :دیوان نا سرحال
دیوان ئٹ ہیت کروک : جیئند ساجدی
خواجہ تینا ہیت ءِ بناء کریسہ پارے کہ ڈیموگرافی آبادی ءِ پارہ ہراٹی نسلی ٹولی (ایتھنک گروپس) آک مریرہ۔ ڈیموگرافی تینٹ اسہ بھاز بھلو سرحال ئسے ولے نن بلوچستان نا بنداو آ ہیت کینہ، کہ بلوچستان ئٹی دا وخت آ مسہ ایکٹر چائنگک، ہرا بلوچ، پشتون و سندھی-سرائیکی ءُ، ولے 1839 ئٹ ہراتم برٹش بسک گڑا او بلوچستان نا سیم تے کپ کپ کریسہ ایران، اوغانستان و پاکستان نا صوبہ پنجاب و سندھ ئٹی بشخ کرے، ہرادے بلوچ اینو اسکان نمن کرینے۔ او گولڈ سمتھ لائن مرے، ڈیورنڈ لائن یا کہ جیکب آباد و ڈیرہ غازی خان و راجنپور مریر دافتے زوراکی ئٹ بلوچستان آن کشکار و مر کریر۔
خواجہ مونی ہیت کریسہ پارے کہ ڈیموگرافک مٹی اسہ راج یا کہ ریاست اسیٹی ہتنگک تانکہ او ہند ئنا مخلوق ءِ تین پہ تین جنگ ترفنگ کے و اوفک کوزہ گیر نا برخلاف ہچ ءُ جہد ئسے نا بابت سوچ خلپس، و انگریز دا گڑا ٹی سوگو مسک۔ اینو ہندا پشتون پارٹی ہرا اوگام خلیک کہ چترال آن بولان اسکان پشتون صوبہ ءِ، اصل ئٹ او ہمو کوزہ گیر نا چم آتے سر تننگ ءِ و گواچنی تون دادے ہچ ءُ کاریم اف، انتئے کہ بلوچستان نا سیمک سائنسی ءُ کہ کچلاک آن بڑزا بلوچ آبات اف و کچلاک آن شیف پشتون، شال ئٹی کاسی آن بیدس ایلوفک ہتنگانو۔ پدا بلوچستان تون چم دا مس کہ بلوچستان نا ہندا پشتون ہند آتے اسہ مصنوعی بلوچستان اس جوڑ کننگا ہرا ایڈمنسٹریٹوو بلوچستان پاننگا۔ دا نا سوب دا ئسک کہ دا پشتون بلوچ تینتون کہ جنگ لگیرہ گڑا ننا کسس ہم مونا سلپک مزاحمت کپک ننکن آسانی مریک۔
خواجہ جیئند ہیت کریسہ پارے کہ کراچی جہان ٹی بلوچ نا بھلا آباتی چائنگک ولے اودے اندا ڈیموگرافک بدلی تا سوب آن اندنو ہند اس کرینو کہ او اسہ راج ئسے نا جاہ چائنگپک۔ ڈیموگرافک بدلی کن آبادکار ہتنگک ہرا تینا آباتی اٹ ایلو راج ئنا ڈیموگرافی ءِ مٹ کیرہ، آبادکار آک اِرا وڑ ئنا مریرہ، اسٹ کائک زوراکی اٹ تولک او ہمو ہند و راج ئنا سیاست، زرگزرانی، شیف و بڑزی، بولی و دود آتے مٹ کیک و اوفتا زی آ راج کیک ہرادے نن کالونیل آبادکار (کالونیل سیٹلر) پانہ، ولے ارٹمیکو آبادکار زند گدریفنگ نا کمائی کن مزوری کن کاریم کیک او گڑا او راج ئنا سیاست و دود آتے مٹ کپک بلکن اوفتا بولی و دود آتے تینٹ تینکن کاریم ئٹ ہتیک او گُڑا راج ئنا ڈیموگرافی ءِ نسخان تفک اودے نن پوریائی آبادکار پانہ۔ بلوچستان ئٹی ہرا آبادکار آک ہتنگانو او مزوری کن آخہ بلکن زوراکی ئٹ بسنو و بست و بند ئنا پوزیشن ءِ کوزہ کرینو۔ گوادر ئٹی آبادکاری بھاز مننگ ءِ نواب اکبر خان بگٹی تینا زند ئٹی پاریکہ کہ گوادر میگا پروجیکٹ اس اف ولے میگا پرابلم ئسے، گوادر ئٹی اگہ آبادکار ہتنگک گُڑا اوڑے دا سیاست ئٹی بشخ ہلیرہ، و پاکستان ئٹی پارلیمنٹ کن بندغ آک آباتی نا بنداو آ مریرہ، بلوچ اونا برخلافی ءِ کے گُڑا دا پاننگک کہ دا بندغ آک سیاست ئٹی بشخ ہلپسہ، ولے اسہ وختس برو و دا پارور کہ او وعدہ ہمو وخت ئنا مجبوری مسنے و دانا پرغنگ اینو نا مجبوری ءِ دن کہ میکاولی پائک “وعده کننگ ہمو وخت ئنا مجبوری ءِ، اودے پرغنگ اینو نا مجبوری ءِ”۔
خواجہ مونی ہیت کریسہ پارے کہ بلوچستان ئٹی ڈیموگرافک بدلی کن بھاز چم کننگ ءِ تانکہ داڑے ہر گڑا ءِ تینا دوٹی کیر دنکہ جاموٹ و لہڑی نا جنگ ئٹی جاموٹ ءِ پوسکن درستی راستی کرفنگا، داڑے چارمیکو ایکٹر بسک مطلب کہ مسٹ ایہن ئسر دا جاموٹ ءِ داسا مونا ہتنگا تانکہ ہندا ویل ایسر مف و بلوچ تون ایلو ایکٹر آتا جنگ چلینگ ءِ، گواچنی ئٹ دنو ہچو ویل اف۔ دن کہ اسپین و اسکاٹ لینڈ ئٹی ڈیموگرافک بدلی ہتنگا گُڑا وختس اسپین، اسکاٹ لینڈ و کیوبم ریفرنڈم کننگا او فیل مسر انتئے کہ اوڑے کالونیل آبادکاری بھاز کننگاسس۔ بلوچستان ئٹی دا گڑاک انگریز نا بننگ تون بناء مسر و اینو اسکان برجاء ءُ۔ دانا نسخان آک بھاز ءُ اگہ دا توننگ متور گڑا دافتا نسخان تے راج اقلیت نا دروشم ئٹ خنو ہراڑے اونا سیاست، زرگزرانی، بولی و دود ربیدہ مفرو بلکن ہمو زورآور نا مرور۔
دیوان نا ایسر ئٹ سوج آتا ورندی تے سر جیئند تس و دیوان کارمستر نا موکل ئٹ ایسر کننگا۔
بلوچ اسٹوڈنٹس ایکشن کمیٹی شال ہنکین
