پنجگور ڈگری کالجءَ مبارک قاضی ءِیات ءَ مراگشے برجم دارگ بیتگ۔
بلوچ اسٹوڈنٹس ایکشن کمیٹی پنجگور ھنکین
بلوچ اسٹوڈنٹس ایکشن کمیٹی پَنجگُور ڈگری کالج بنزہ ءِ نیمگ ءَ مبارک قاضیءِ یات ءَ مراگشے اڈ دیگ بیتگ ءُ نمیرانیں مبارک قاضی ءِ زند ءُ ازم ءِسرءَ تران بوتگ۔
مراگش چار بھرانی تہ ءَ بیتگ کہ آئیءِ توکءَ گشتانک، شائری، کتاب، سازءُ زیملی دیوان ءُ کتاب میڑہ اوار بیتگ اَنت۔
مراگش چہ مبارک قاضی ءِ یات ءَ دو سھت ءِ ھاموشی ءَ بندات بیت ءُ دیمترءَ گشتانکی بہرءِ تہءَ بلوچ اسٹوڈنٹس ایکشن کمیٹی ءِ بنجائی کمیٹی ءِ باسک مسدق بلوچ ءَ قاضی ءِ زند ءِ بابت ءَ تران کت ءُ پیرجان بلوچ ءَ مبارک قاضی ءِ رِدانک، واجہ گمشاد بلوچ ءَ مبارک قاضی ءِ لچہ ءُ ملا مراد ءَ غزل ءءِ سرءَ چمشانک دیان ءَ تران کت۔
مراگش ءِ دومی بہر شائری بیتگ کہ نودربراں مبارک قاضی ءِ شئیر ونت اَنت ءُ آہی ءِ پگر ءُ فلفسہ تالان کُت کہ آہی ءِ تہ ءَ بلوچ گلزمین ءُ بلوچ راجدوستی ءِ چہرگ مان اِنت۔
بلوچستان کتاب کاروانءِ نامءَ کتاب میڑہ ھم اڈ دیگ بوت کہ اودءَ بلوچستان، بندپتر، سیاست، لبزانک، سائنس ءُ ایدگہ سرھالاں بندوکیں کتاب ایر کنگ بوتگ اِت اَنت۔ کتاب میڑہءَ گلءِ تاکبند نوْشت، زھگانی تاک گام ءُ بلوچ لٹریسی کیمپئن ءِ کتابُک ھم ایر کنگ بوت انت۔ استاد ءُ نودربراں اسٹال سیل کُت ءُ وتی دوستیگیں کتاب پہ وانگءَ زُرت اَنت۔
مراگہ ءِ ءِ سیمی بہر ساز ءُ زیملی دیوان بیتگ کہ آئی ءِ تہ ءَ نادر بلوچ، مسرور بلوچ ءُ کلیم اللہ بلوچءَ مبارک قاضی شئیر گوں وتی وشیں توارءَ الہان کُت اَنت ءُ ھمدءَ چہ مراگش آسرے کنگ بوت۔
