بلوچ اسٹوڈنٹس ایکشن کمیٹی شال ھنکین ءِ ھنکینی لس دیوان برجم دارگ بوتگ۔ شئے مُرید بلوچ ھنکینی کارمستر ءُ فھد بلوچ ھنکینی کارگُشاد گچین کنگ بُوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی شال ھنکین ءِ ھنکینی لس دیوان ھنکین ءِ گوستگیں کارمستر علی جان بلوچ ءِ سروکی ءَ برجم دارگ بُوتگ۔ دیوان ءِ ھاسیں مھمان بنجاہی کُمک کماش رفیق بلوچ ءُ گچینی مھمان بُنجاہی کمیٹی ءِ باسک عامر بلوچ ءُ پیرجان بلوچ بُوتگ اَنت۔ دیوان ءَ ھنکین ءِ گوستگیں اھوال، شرگداری، گل کاری، ھندی ءُ میان استمانی سیاسی جاورھالانی سر ءَ تران ءَ پد آؤکیںں گامگیج ءَ نوکیں ھنکینی کابینہ گچین کنگ بوت۔
دیوان ءَ بنجاہی سنگتاں تران کنان ءَ گشت کہ گل ھما وھد ءَ دیمروئی کرت کنت کہ وھدے آئی ءِ باسک گوں مخلصی ءَ گل، گل ءِ لیکہ ءُ پروگراماں وتی بہ کنت ءُ کارانی دیمءَ جنزینگ ءِ واستہ وتءَ مُدامی تیار بہ کنت۔ اے چیز کہ بنت گڑا بزاں ما یک پولیٹیکل کلاسے ءِ بہریں ءُ ھمے کلاس مارا یک پولیٹیکل ھمت ئے دنت، ھمے ھمت ترا چہ نپری سوچ ءَ کشیت ءُ گوں اجتماع ءَ بندوک کنت کہ ھمے راجی ءُ تنظیمی لوٹ اَنت۔
سنگت ءَ گشت کہ ھمک مردم یک نپری بلے ھمے نپر وتءَ چوں گوں اجتماع ءَ بندوک کنت ایش معنا داریت، ءُ گل وتی باسکاں تہنا پالیسی ءُ پروگرام دنت ایشانی سرءَ عمل کنوک باسک اَنت۔ تنظیم آئیڈیاز جوڑ کنت ءُ ھمے آئیڈیا لہتیں کردار ودی کن اَنت، ھمے کردار تنظیمی کیڈر بنت ءُ ھمے کیڈر دیمترءَ راجی رھشون بنت، مارا ھمے آئیڈیا جوڑ کنگی اَنت کہ ھمیشاں ءُ چہ کیڈر ءُ راھشون ودی کنگی اِنت، بلئے اے کلیں کارانی واستہ ایماندار بوگ الم اِنت۔
دیمتر ءَ بُنجاہی سنگتاں تران کنان ءَ گُشت کہ مروچی ما گندیں دُگنیا ءِ تہءَ ھرچیز ے کہ معنا داریت آ لبز اَنت ھمے لبز گوں آئیڈیازاں بندوک اَنت ءُ ھمے آئیڈیا گوں (اسپانک) بیانیہ آں بندوک اَنت۔ چشکہ ھر کجا کہ ایردست ءِ جُھدے بیت آئی ءَ را بیمکاری(ٹیررزم) ءِ نام دیگ بیت، آئی ءِ سوب ایش اِنت کہ مھلوک ءِ راستی ئیں دروشم ءِ جھد بے معنا بہ بیت۔ بیانیہ اے وڑا جوڑ بنت کہ وھدے امریکہ چہ عراق ءَ رند ءَ چہ افغانستان ءَ درکئیت گڑا بازیں زانتکارے ھمے گشیت کہ نوں دُگنیا ءِ تہءَ جنگ نہ بیت، بلئے ما شما زوت دیست کہ یوکرائن ءُ روس ءِ میان ءَ جنگ بوت ءُ تنی وہدی اے جیڑہ برجاہ اِنت کہ چین ءُ تائیوان ءِ یا کہ ھنوگیں فلسطین ءُ اسرائیل ءِ جنگ بہ بیت کہ انگت برجاہ اَنت۔ اِددءَ چہ مارا یک چیزے یا کہ دنیا ءِ تہلیں راستی ئے گندگ ءَ کئیت کہ دنیا ءِ تہءَ جنگ مدامی چیزے ءُ مدام جنزیت۔
سرجمیں بُنگپانی سر ءَ گوں دلجمی ءَ تران ءَ پد گُڈی بنگپ آؤکیں گامگیج ءِ تہ ءَ گوستگیں کابینہ ھلاس کنگ بیت ءُ نوکیں کابینہ گچین کنگ بُوتگ، نوکیں کابینہ ءَ شئے مرید بلوچ ھنکینی کارمستر، ارشد بلوچ کُمک کارمستر، فھد بلوچ کارگشاد، عدنان بلوچ کُمک کارگشاد ءُ لیاکت بلوچ ھالرسانی کارگُشاد گچین کنگ بُوتگ اَنت۔
بنجاھی سنگت ءَ نوک گچین بُوتگیں کابینہ ءِ سنگت سوگند دات اَنت ءُ گچین بُوتگیں زمہ واراں پیمان کُت کہ آ وتی زمہ واریاں جوانیں رنگے ءَ پیلو کن اَنت۔
بنجاہی جارکش بلوچ اسٹوڈنٹس ایکشن کمیٹی
