بلوچ اسٹوڈنٹس ایکشن کمیٹی ءِ دومی بنجاہی کمیٹی ءِ دیوان برجم دارگ بوت۔
مبارک قاضی ءِ یات ءَ پسنی ءَ مراگاھے برجم دارگءِ فیصلہ
مرچی ادارہءَ وتی باسک سیاسی بستارءَ ہمنچو پُہتگ ءُ باسما کُتگ اَنت کہ آ بلوچستانءِ ہرچ کُنڈءَ ادارہءِ لیکہ ءِ جھگیری ءَ کنگءَ اَنت۔
کماش شبیر بلوچ
بلوچ اسٹوڈنٹس ایکشن کمیٹی ءِ دومی بنجاہی کمیٹی ءِ دیوان کماش شبیر بلوچ ءِ سروکی ءَ برجم دارگ بوت۔ دو روچی دیوان ءِ تہءَ مزن کارگشادءَ گوستگیں اھوال دیوانءِ دیمءَ پیش کنانءَ شرگداری، گل کاری، ھندی ءُ میان استمانی سیاسی جاورہالانی سرءَ گپءُ تران ءَ پد آوکیں گامگیج ءِ تہءَ جتائیں فیصلہ زیرگ بیت اَنت۔
دیوانءِ اولی روچ ءِ بندات ءَ اولی بنگپ “گوستگیں اھوال” ءِ تہ ءَ گلءِ سرجمیں اھوال وانگ بیت اَنت ءُ کُلیں ھنکینانی کارانی سرءَ دلجمی ءَ گوں گپ ءُ تران کنگ بوت کہ آہانی تہ ءَ ھنکینانی فعالیت ءَ ھوار آہانی سیاسی ھیلکاری دیوان ءُ ایدگہ مراگش: صباء لیٹریری فیسٹیول، بلوچ لٹریسی کیمپئین ءِ مراگش، بلوچستان کتاب کاروان ءُ ایدگہ کُلیں اھوالانی سرءَ تران کنانءَ سرجمیں ھنکینانی اھوال چار ءُ ٹپاسگ بیت اَنت۔
دیوانءِ اولی روچءِ دومی سرہال “شرگداری” ات کہ آئیءِ تہءَ بنجاہی باسکاں نگدی نگاہءَ وتی ھیال درشان کت انت۔ اے درگتءَ سنگتاں تران کت ءُ گشت کہ سیاسی ادارہانی دیمروئیءِ ھاترءَ شرگداری یک توانمندیں عملے، پمیشکہ پہ ما الم انت کہ ما مدام وتی ادارہءِ میانءَ شرگداریءِ عملءَ مہکم بہ دار ایں۔ سنگتاں ھمے تران دیمءَ برانءَ گوْشت کہ یک سیاسی جہدکارےءَ ہرچ وھدءَ وت ءَ نگدی نگاہءَ چارگی اِنت داں آ وتی سیاسی جہد ءِ سپر ءَ ہرچ وڈیں گیر سیاسی رویہ آں وتءَ رکینت بہ کنت۔ سیاسی عملءَ را ھما وھداں کہ علم ھوار بیت گڈا توانائیں آسرے دات کنت، بلے عمل اگاں نگدی کالبءَ کساس کنگ مہ بنت گڈا ستر مزنیں علمے گون بہ بیت آ سیاسی ءُ آشوبی نہ بیت، داں سیاسی ءُ آشوبی مہ بئے چاگردءَ مٹی آورت نہ کنے۔
دیوانءِ اولی روچ گوں ھمے سرہالاں چہ بنجاہی کماش شبیر بلوچءِ اجازتءَ ھلاس کنگ بوت۔ ءُ ایدگہ روچءَ چہ بنجاہی مزن کارگشاد ءِ نیمگءَ دیوان دوبر بندات کنگ بوت۔
دیوانءِ دومی روچ ءَ دیوان ءَ دیم ءَ بران ءَ دیمی بن گپ گل کاری اَت، اے درگتءَ بنجاہی زمہ واراں تران کت ءُ گشت کہ دنیا ءِ ایدگہ راجانی ورنایانی گورءَ راجی سیاست بہ گندے کتابانی تہی نبشتگیں گپے ءُ آہانی گورءَ راجی جہد راجدپتر ءِ تاکانی بھر اِنت بلے مئے وشبہتی اِنت کہ ما راجی جہد ءِ بھر ایں ءُ چمءِ وت گندگیں۔ مرچی گل ءَ راجی نودربر گل ئے ءِ بستار ءَ وتءَ منارینتگ ءُ نودربرانی وانگی ءُ سیاسی گہبودی ءِ ڈُبہ وتی کوپگاں زُرتگ ءُ پیلو کنگءَ اِنت۔ گل ءِ جہد مرچی بلوچستان ءِ گیشتریں جاھاں سراِنت کہ جتا جتائیں مراگاھ اڈ دیگ اِنت ءُ بلوچ چاگرد ءَ زانت ءُ زانشت ءِ نیمگءَ برگ اِنت۔ بلے ہمنچو گل دیمءَ روان بیت کار ءُ زمہ واری ہم گیش بیان بنت پمیشکا گل ءِ کُلیں باسکاں وتی گل ءِ زمہ واری گیشتر مہکمیں رنگےءَ جنزینگی اَنت۔
سرہالءِ آسرءَ گل ءِ بنجاہی کماش شبیر بلوچ ءَ دیوان ءَ تران کنان ءَ گوْشت کہ ما بلوچ نودربرانی وانگی ءُ سیاسی ادارہےءِ بستار ءَ وتی جہد برجاہ داشتگ کہ آئیءِ تہءَ بلوچ ورنایانی سیاسی ءُ وانگی تربیت ءَ بہ گِر داں زہگانی وانگی تربیت ما وتی کوپگاں زُرتگ۔ ما راجدوستی ءِ پگرءَ گوں بندوکیں جہدکاریں ءُ یک راجی جوڈشتے ءِ عمل ءِ بھریں گڈا مارا پہمگی ایں کہ مئے کار تہنا وتی جند ءِ سیاسی تربیت کنگ نہ اِنت بلکیں وتی ھواری ءَ راج ءِ تربیت کنگ مئے زمہ داریانی بھر اِنت۔ وتی کش ءُ گوراں ورنایاں گوں وت ھوار کنگ ءُ آہاں بلوچ ءِ مُچانکی مکسد ءِ سرءَ درونت دیگ اِنت۔ مرچی گل ءَ وتی باسک ہمنچو باسما ءُ سیاسی ہوالہ ءَ مہکم کُتگ اَنت کہ آ بلوچستان ءِ ہرچ کُنڈ ءَ ادارہ ءِ جھگیری ءَ کُت کن اَنت ءُ کنگءَ اَنت۔ ما اے گپ ءَ پہ پہر گوشت کنیں کہ گل ءِ بنجاہی سنگتاں بہ گِر داں بنزہی سنگتاں، ہمے سنگتانی جہد ءِ برورد اِنت کہ ادارہ مرچی بلوچستان ءِ ہرچ میتگ ءُ کُلیں بلوچ مھلوک ءِ تہ ءَ سر بیتگ۔ ہمے باسمائیں آشوبی جہد ءِ پدءَ بلوچ چاگرد ءِ تہ ءَ سیاسی ءُ شعوری جُہد روچ پہ روچ مہکم تِر بیان اِنت۔ بلوچ ورنا وتی کش ءُ گور ءِ سیاسی جاورھالاں پہمگءَ پد وتی یک گچینیں لٹریچرے وانگ ءِ نیمگءَ برونت داں آہاں راجی جوڈشت ءِ عمل ءَ کمک بہ رسیت ءُ وتی چاگرد ءَ توانائیں راجی بیانیہ ءَ جوڈ کُت بہ کن اَنت۔
گل کاریءَ پد ھندی ءُ میان استمانی سرھال ءِ سرءَ دیوان ءِ سنگتاں تران کنان ءَ گوْشت کہ مرچی بلوچ راجءِ راجی جُنز دگنیا ءِ ایدگہ لگتمالیں راجانی واستہ امیت ءِ چیدگ جوڈ بیتگ۔ ھمے سیاسی چِست ءُ ایرانی برورد ءَ بلوچ چاگرد ءِ تہ ءَ گہگیری ءَ نوکیں جانے رستگ کہ بلوچ ورنا ءُ زالبولاں بہ گر داں زہگ ءُ کماش مرچی چہ راجی باسمائی ءَ بلد اَنت۔ سیاسی چِست ءُ ایرانی برجاہ دارگ ءِ بگیری ءَ وڈ ءُ ڈولیں پندل سازگ بیت بلے مارا زانگی اِنت کہ اے سیاسی عمل ءِ چنچوکیں ارزشتے ہست ءُ اے عمل گیش مہکمیں رنگے ءَ برجاہ دارگی اِنت۔ میان استمانی جاورھالانی سرءَ سنگتاں گوشت کہ استمانی سیاست ءِ تہ ءَ مرچی جتائیں ٹولی جوڈ بیگ ءَ اَنت ءُ دنیا چہ دو بلاک ءَ درتکگ ءُ باز بلاک ءِ تہ ءَ پُترتگ کہ جتائیں ملک وتی راجی نپانی ہاتر ءَ جتائیں اتحادانی بھر بیگءَ اَنت۔ بلوچ ورنایاں وتی کش ءُ گورءِ میان استمانی سیاسی چِست ءُ ایر نہ تہنا پہمگی اَنت بلکیں آہانی سرءَ تجزیہ کنگ ءِ نگاھے ہم دارگی اِنت۔
بنجاہی مجلسءِ دومی روچءِ گڈی بنگپ آوکیں گامگیج اَت کہ آئی ءِ تہ ءَ گل کاری ءِ سرءَ داتگیں شور ءُ سلاہانی سرءَ دلجمی ءَ گوں گپ ءُ تران بیت ءُ آوکیں وھد ءِ ہاتر ءَ جتائیں فیصلہ زیرگ بوت انت کہ آہانی تہ ءَ آوکیں ماتی زبانانی میان استمانی روچ ءَ مبارک قاضی ءِ نام ءَ ندْر کنانءَ آئیءِ یات ءَ ماں پسنی ءَ مراگاھے اڈ دیگ، ماتی زبانانی روچ ءَ زبان ءِ سرءَ کتابُکے شِنگ کنگ، پہ زہگانی ہاترءَ گام کلاس اڈ دیگ، شال ءُ نصیرآباد ءَ صباء لٹریری فیسٹیول اڈ دیگ، دو مارچ بلوچ دود ءُ ربیدگی روچ ءِ سرءَ مراگش اڈ دیگ، بلوچ لٹریسی کیمپئن ءَ گیش مہکم کنانءَ سائنسی مراگاہ اڈ دیگ ءُ وھد وھد ءِ سرءَ بلوچستان ءِ وانگی جیڑہانی سرءَ اھوال شِنگ کنگ، بلوچستان کتاب کاروان ءَ گیش شِنگ کنگ ءُ بلوچستان ءِ کُنڈکُنڈ ءَ سرکنگ، گام ءُ نوْشت تاکانی زیت چاپ ءُ شِنگ کنگءَ ھوار ایدگہ کسان مزنیں فیصلہ زیرگ بیت اَنت۔
کُلیں بنگپانی سرءَ تران کنان ءَ آوکیں گامگیج ءِ تہ ءَ فیصلہ زیرگءَ پد دیوان دومی روچ ءَ چہ کماش ءِ اجازت ءَ آسر کنگ بوت۔
بنجاہی جارکش بلوچ اسٹوڈنٹس ایکشن کمیٹی
