بلوچ اسٹوڈنٹس ایکشن کمیٹی مستونگ ہنکین نا آرگنائزنگ باڈی جوڑ کننگا۔
میر احمد بلوچ زونل آرگنائزر و نبی بخش بلوچ ڈپٹی آرگنائزر گچین کننگار۔
بلوچ اسٹوڈنٹس ایکشن کمیٹی مستونگ ہنکین نا آرگنائزنگ باڈی نا دیوان بنجاہی کماش شبیر بلوچ نا کماشی ٹی اڈ تننگا۔ دیوان نا مہمان خاص بنجاہی کمیٹی نا باسک عامر بلوچ ئس۔ دیوان نا ایجنڈہ غاک بنجاہی سرکیولر، آئین، تنظیمی امور، سیاسی حالیت و بروکا گامگیج ئس۔
دیوان ٹی ہیت کریسہ بنجاہی زمہ وار آک پاریر کہ مستونگ بلوچستان نا ہمو علاقہ ءِ ہراڑے عزیز کرد بلوچ سیاست ءِ بِناء کرے. اندا سیاسی چاگڑد ءِ برجاء تخنگ کن بلوچ راہشون آک بھاز جہد کریر۔ داکان پد سنگت ثناء آنبار انگا جہدکار آک تینا سیاسی عمل آن مستونگ ٹی سیاسی تاریخ ءِ زندہ تخار و ورنا تیٹی سیاسی شعور تون اوار خواننگ نا چاگڑد اس ودی کریر۔ اندا سیاسی تاریخ ءِ زندہ تخسہ تنظیم اینو بلوچ سیاست نا بناء ءِ کروکا مستونگ ٹی تینا تنظیمی کاریم تے بناء کننگ ءِ ہرا کہ تنظیم و قوم اکن خوش بختی ئسے ولے تنظیم اندا پائک کہ اینو قوم دژمن آک چاگڑدی گندئی، سرداری نظام و قبائلی سوچ ءِ لس مخلوق ٹی عام کننگ ءُ تاکہ سیاسی باسک آتے ٹک کیر و لس مخلوق نا سیاسی شعور ءِ ایسر کیر۔ اسہ منظم ءُ پلیٹ فارم ئسے نا مفننگ نا سوب سیاسی شعور نا مننگ آن پد ہم لس مخلوق سیاسی بابت اوار مفک۔
دیوان ٹی ہیت کریسہ بنجاہی راہشون آک پاریر کہ بلوچ راج ءِ اسہ اندنو سیاسی طاغت اس بکار ءِ ہرانا بنیاد تنظیم و تنظیمی لیکہ مرے۔ اینو نشہ و پین اندنو چم کہ ہرافتا سوب آن ورناک تینا سیاسی سوچ و فکر آن مُر ءُ دافتا برخلاف تنظیم نا پروگرام ارے انتئے کہ دا ڈغار ٹی ہرا بِج سد سال مست دسنگانے اودے ورناک تینا جہد ئٹ زوال مننگ کن الپسہ و وخت ئنا خواست اندادے کہ تنظیم دا چم آتا برخلاف سوگوْ ءُ وڑ اسیٹ کاریم کے۔
دیوان نا گڈیکو ایجنڈا بروکا گامگیج ئس ہراٹی ہنکینی آرگنائزنگ باڈی گچین کننگا، میر احمد بلوچ زونل آرگنائزر، نبی بخش بلوچ ڈپٹی آرگنائزر و آرگنائزنگ کمیٹی نا باسک شاہ رحمٰن، یاسر بلوچ و فرقان بلوچ گچین کننگار۔ دیوان نا ایسر ئٹ بنجاہی سنگت عامر بلوچ آرگنائزنگ باڈی آن سوغند ہلک و دیوان ایسر کننگا۔
بنجاہی ترجمان بلوچ اسٹوڈنٹس ایکشن کمیٹی
