بلوچ اسٹوڈنٹس ایکشن کمیٹی ملیر ھنکین ءِ ھنکینی لس دیوان برجم دارگ بُوتگ۔
گُلاب بلوچ ھنکینی کارمستر ءُ محمد شاہ بلوچ ھنکینی کار گُشاد گچین کنگ بُوتگ اَنت۔
بلوچ اسٹوڈنٹس ایکشن کمیٹی ملیر ھنکین ءِ ھنکینی لس دیوان ھنکینی کارمستر گُلاب بلوچ ءِ سروکی ءَ برجم دارگ بُوتگ، دیوان ءِ ھاسیں مہمان بُنجاہی کمیٹی ءِ باسک عامر بلوچ بُوتگ۔
دیوان ءَ بُنجاہی سرکولر، ھنکین ءِ گوستگیں اھوال، نگد کاری، گل کاری، میان اُستمانی ءُ ھندی سیاسی جاورھال ءِ بُنگپانی سر ءَ باوست ءَ پد گُڈی بُنگپ آؤکیں گامگیج ءَ ھنکین ءِ گوستگیں کابینہ ھلاس کنگ بُوتگ ءُ نوکیں ھنکینی کابینہ گچین کنگ بُوتگ۔
دیوان ءَ بُنجاہی سنگت ءَ تران کنان ءَ گُشت کہ نودربر استیں وھد ءُ لوٹانی بُنیات ءَ سیاسی عمل ءِ ارزشت ءَ سرپد بہ بنت، نوک نوکیں سیاسی ھیالاں گوں سیاسی عمل ءِ بھر بہ بنت ءُ ادارہ جاتی سنچ ءَ مُھکم کنان ءَ ادارہانی دیمروی ءِ ھاتر ءَ وت ءَ جاڑیگ بکن اَنت۔
نودربر سیاست ءَ گوں بندوکیں نودربرے ءِ ھاتر ءَ الّم اِنت کہ وتءَ وت نگدی ءِ نگاہ ءَ چارگ ءِ جُھد ءَ بہ کنت، وتی اندر ءَ نگدی شعور ودی بہ کنت، مُخلصی ءُ دورچاری ءَ گوں سیاسی عمل ءَ دیم ءَ بران ءَ مُدام سیاسی ءُ پگری عمل ءَ گوں وتا ھمگرنچ بکن اَنت۔
بُنجاہی سنگت ءَ دیمتر ءَ تران کنان ءَ گُشت کہ ملیر بلوچستان ءِ ھما دمگاں ھوار اِنت کہ اُود ءَ مہلوک بُنکی آسراتیاں چہ ھم زبھر اَنت ءُ بلوچ میتگانی تہ ءَ بُنکی وانگ ءُ زانگ ءِ ھاتر ءَ جوڑ بُوتگیں ادارہانی تہ ءَ ھم اُستاد استان ءِ گُپتماناں شِنگ ءُ تالان کنان ءَ بلوچ نودربراں بلوچ ڈیھ ءَ چہ گِستہ دارگ ءِ بے سوبیں جُھدے کنگ ءَ اَنت ءُ ملیر ءَ استان جِتائیں شوربندیاں گوں بلوچ نودربراں جتائیں پروگرامانی وسیلہ ءَ بلوچ راجی سیاست ءَ چہ گِستہ دارگ ءِ جُھد ءَ اِنت۔
ملیر انتظامیہ نیمون ءُ بہانہ ءِ وسیلہ ءَ جتائیں دمگاں فعالیں لائبریری آں غیرفعالی ءِ نیمگ ءَ برگ ءَ اِنت، یک نیمگے این جی اوز ءُ ایندگہ پلیٹ پارمانی وسیلہ ءَ بلوچ ءِ وانگی ادارہانی سر ءَ کبزہ کنگ ءُ نودربرانی وانگی بودشتاں ہلاس کنگ ءِ ھاتر ءَ نودربراں پراہ ءُ شاہیگانیں سوچ ءَ چہ کشگ ءُ مھدود ءُ کسانیں ذہنیتے ءِ واھُند کنگ بُوگ ءَ اِنت ءُ دومی نیمگ ءَ ملیر ایکسپریس وے ءُ کمپنیانی وسیلہ ءَ بلوچ زمین ءِ لُٹ ءُ پُل ہم برجاہ اِنت۔
دیمتر ءَ بُنجاہی سنگت ءَ وتی ھیال درشان کنان ءَ گُشت استیں وھد ءَ بلوچ راج ترندیں جاورھالانی رِد ءَ نگیگیں جاورانی دیمپانی ءَ کنگ ءَ اِنت، بلوچ ءِ کُشت ءُ کُوش، گار ءُ بیگواہی تُرندیں دابے ءَ یکشل ءَ برجاہ اِنت، بلوچ نودربراں ھوار جِتائیں پِڈاں گوں سیادی دارُوکیں بلوچ پُسّگ بیگواہی ءِ آماچ کنگ بیگ ءَ اَنت۔ زُوراک ءِ زُوراکی ءِ ھلاپ ءَ جوانیں شوربندی، دُورچاری، مُخلصی ءُ عملی اِیں جُھد ءُ تپاکی بلوچ ڈیھ ءُ بلوچاں رکینگ ءِ یکیں مانزمان اِنت۔ گوستگیں ماہ ءَ زوراک ءِ ایندگہ مُلکاں گوں نِند ءُ نیاد وتی زُوراکیانی چیر دیگ ءُ آہانی کُمک ءَ چہ دُگنیا ءِ دیم ءَ وتءَ شر پیشدارگ ءُ سرجمیں بلوچستان ءَ انٹرنیٹ ءِ بند کنگ ءُ بلوچ راج ءِ سر ءَ زُوراکی ءِ تُرند کنگ کُل ھمے زُلم ءُ زُوراکی ءِ بھر اَنت کہ گوستگیں مدتے ءَ چہ برجاہ اَنت۔
دیوان ءِ گُڈی بُنگپ آؤکیں گامگیج ءَ ھنکین ءِ گوستگیں کابینہ ھلاس کنگ بُوتگ ءُ نوکیں ھنکینی کابینہ ءِ ھاتر ءَ سنگت گچین کنگ بُوتگ اَنت۔
نوک گچین بُوتگیں ھنکینی کابینہ ءَ گُلاب بلوچ ھنکینی کارمستر، شبیب بلوچ ھنکینی کُمک کارمستر، محمد شاہ بلوچ ھنکینی کارگُشاد، سابرہ بلوچ ھنکینی کُمک کارگُشاد ءُ حنیف بلوچ ھنکینی ھالرسانی کارگُشاد گچین کنگ بُوتگ اَنت۔
گُڈسر ءَ بُنجاہی سنگت ءَ نوک گچینی اِیں ھنکینی کابینہ سوگند دات ءُ دیوان ءِ ھلاسی ءِ جار پِرینگ بُوتگ۔
