بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی کراچی ھنکین ءِ لس دیوان برجم دارگ بوتگ۔ شمس بلوچ ھنکینی کارمستر ءُ جہانزیب بلوچ کارگُشاد گچین کنگ بیت اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی کراچی ھنکین ءِ لس دیوان گوستگیں ھنکینی کُمک کارمستر جابر بلوچ ءِ سروکی ءَ برجم دارگ بوتگ۔ دیوان ءِ مہمان بُنجاہی کُمک کارگُشاد تنویر بلوچ ءُ بُنجاہی پتر ءِ باسک سنگت رحمان بلوچ بیتگ اَنت۔
دیوان ءِ بُنگپ بُنجاہی سرکیولر، ھنکینی رپورٹ، نگدی بھر، گلکاری، ھندی ءُ میاں اُستمانی سیاسی جاورھال ءُ آوکیں گامگیج اَت اَنت۔ آوکیں گامگیج ءَ گوستگیں کابینہ ھلاس کنگ بوتگ ءُ نوکیں کابینہ ءِ ھاتر ءَ سنگت گچین کنگ بوتگ اَنت۔
دیوان ءِ کُلیں بُنگپانی سر ءَ گپ ءُ باوست ءَ پد گلکاری ءَ سنگتاں تران کنان ءَ گُشت، مارا نودربر سیاسی جہدکارے ءِ بستار ءَ راجمان ءِ تہ ءَ نودربرانی کِرد زانگ لوٹیت دانکہ ما مستقل بنیات ءَ شہمیں دروشمے ءَ بلوچ راجمان ءِ دیمروئی ءَ وتی بھرشت ءَ دات بہ کنیں۔ باز براں ما سما کُتگ کہ سیاسی جُہدکارانی تہ ءَ ادارُکی سیاست کنگ ءِ یک تبے وجود داریت کہ آ پہ نودربر سیاست ءَ ھچ بر سیتمند بیت نہ کنت۔ بلوچ راجمان ءَ وجود داروکیں یک نودربر ادارہے ءِ بستار ءَ مئے واستہ اژدری اِنت کہ ما وانگی ادارہانی تہ ءَ بلوچ نودربرانی وانگی جیڑہاں بہ زیریں ءُ آھاں گیش ءُ گیوار بہ کنیں۔
دیمتر ءَ سنگتاں ماتی زبانانی ارزشت ءُ آوانی سر ءَ دلگوشی نہ دئیگ ءِ سر ءَ گپ کناں ءَ گُشت کہ بازیں گُپتمانانی سبب ءَ بلوچی ءُ براہوئی زبان ءِ وانگ ءُ آئی ءِ ارزشت گار بیگ ءَ اِنت ءُ بازیں بلوچ نودربرے راستیں دروشم ءَ براہوئی ءُ بلوچی نبیسگ ھم نزان اَنت۔ چہ ایشی ءِ سبب ءَ سما بیت کہ بلوچ زبان ءُ آئی ءِ وانگ ءِ ارزشت کم تران اِنت۔ پمیشکا مارا لوٹیت کہ سنگتانی ھیلکاری ءِ ھاتر ءَ بلوچی ءُ براہوئی زبان ءِ ارزشت ءُ آئی ءَ راستیں دروشم ءَ نبیسگ ءِ سر ءَ کلاس اڈ دئیگ ءَ ہوار ایندگہ کلیں ہیلکاری ترزکاراں کارمرز کنگ ءِ جہد بہ کن ایں۔ ماتی زُبانانی دیمروئی ءِ ہواری ءَ لبزانک ءِ سر ءَ ہم کار کنگی ایں چیاکہ لبزانک سیاسی ادارہانی بنُکی مِنُکاں چہ یکے زانگ بیت۔ سیاسی باسکے ءِ بستار ءَ مارا لوٹیت کہ ما وتی سنگتانی میان ءَ جانداریں لبزانکی چاگردے ودی بہ کنیں دانکہ سنگتانی ھیلکاری شہمیں دابے ءَ بہ جُنزیت۔
بُنجاہی سنگتاں تران کنان ءَ گُشت، کراچی سک مزنیں ھندے ءُ ادا مزنیں کساسے ءَ بلوچ مھلوک جہمنند اِنت۔ بلئے مارا وتی ادارہ ءِ کار ءُ پروگرام لس بلوچ مھلوک ءَ یک مزنیں کساسے ءَ سر کنگی اَنت، دانکہ مئے مہلوک مئے پروگراماں ہوار بوان ءَ مئے کار ءُ پروگراماں چہ آژنا ءُ باسما بہ بَنت۔ سنگتاں گیش ادارہ جاتی ڈسپلین ءِ سر ءَ تران کنان ءَ گُشت، چوشکہ ما یک سیاسی ادارہے ءِ بھریں گُڑا مارا لوٹیت کہ ما سرجم ءَ ادارہ ءِ گشینتگیں ڈسپلین ءِ پابند بہ بئیں۔ ڈسپلین ءَ ھوار نپری زمہ واریاں ھم بہ پہمیں دانکہ ما وتی ادارہ ءِ کار ءُ پروگراماں گیش ءَ گیش مُھکم ءُ شہمیں دابے ءَ دیم ءَ بہ بریں۔
کلیں بنگپانی سر ءَ دلجمیں باوست ءَ پد آوکیں گامگیج ءَ گوستگیں کابینہ ھلاس کنگ بوتگ۔ نوکیں کابینہ ءَ ہنکینی کارمستر شمس بلوچ، کُمک کارمستر اکمل بلوچ، کارگُشاد جہانزیب بلوچ، کُمک کارگُشاد زرین بلوچ ءُ ھالرسانی کارگُشاد وسیم بلوچ گچین کنگ بوتگ اَنت۔ بُنجاہی سنگت ءَ نوک گچین بوتگیں سنگت سوگند داتگ اَنت ءُ دیوان ھلاس کنگ بوتگ۔
بنجائی جارکش: بلوچ اسٹوڈںنٹس ایکشن کمیٹی
