بلوچ اسٹوڈنٹس ایکشن کمیٹی ٹنڈوجام ھنکین ءِ لس مجلس برجم دارگ بوتگ۔ نیاز بلوچ ھنکینی کارمستر ءُ سابر بلوچ ھنکینی کارگشاد گچین کنگ بوتگ انت۔
بلوچ اسٹوڈنٹس ایکشن کمیٹی ٹنڈوجام ھنکین ءِ ھنکینی لس مجلس کارمستر یونس بلوچ ءِ سروکی ءَ برجم دارگ بوتگ۔ دیوان ءِ ہاسیں مھمان بنجاہی کمیٹی ءِ باسک رھمان بلوچ بوتگ۔ دیوان ءِ تہ ءَ جتائیں بنگپانی سر ءَ گپ بوتگ کہ آوانی تہ ءَ پجاری نشست، بنجاہی سرکیولر، ھنکینی اھوال، نگدکار، گلکاری ءَ ہوار آؤکیں گامگیج ءَ گوستگیں ہنکینی کابینہ ھلاس کنگ بوتگ ءُ ھنکین ءِ واستہ نوکیں سنگت گچین کنگ بوتگ اَنت۔
بنجاہی سرکیولر سنگتانی دیم ءَ وانگ بوتگ ءُ بنجائی پیسلہ ءُ پروگرام سنگتاں سر کنگ بوتگ اَنت۔ دیمتر ءَ ھنکینی اھوال ءِ بنگپ بندات کنگ بوتگ ءُ ھنکین ءِ اھوال گوں دلجمی ءَ دیوان ءِ دیم ءَ ایر کنگ بوتگ اَنت ءُ سنگتانی جست ءُ باوست ءَ پد ھنکینی اھوال ءِ بنگپ آسر کنگ بوتگ۔ دیمتر ءَ نگدی بنگپ بندات کنگ بوتگ ءُ نگدی نکانانی سر ءَ باوست کنگ بوت۔
سنگتاں تران کنان ءَ گُشت کہ نگدی نکان ءُ نگدی باوست ھما سیاسی وسیلہ انت کہ زنگ بستگیں ھیال ءُ سست مزاجیں روشتانی نشاندہی ءُ وتی عمل ءَ را گیش ودّینگ ءِ یک ارزشتداریں عملے زانگ بیت۔ ھمے وسیلگ ءِ ھکّیگیں ءُ تچکیں بزانت ءَ گوں کارمرزگ یک سیاسی چاگردے ءِ نوکتر ءُ مہکمتر کنگ ءِ ہاترءَ مزنیں ارزشتے داریت پمے ھاترءَ مارا ھورتچاری ءُ کسان داں مزنیں نزوریانی سر ءَ باوست الم کنگی ایں دانکہ ما وتی سیاسی زمہ واریانی دیم ءَ اوشتوکیں اڈانداں پروش دات کت بہ کنیں۔
سنگتاں وتی سیاسی گراؤنڈ ءِ سر ءَ تران کنان ءَ گُشت کہ ٹنڈو جام ھنکین مرچی ھما جاہ ءَ جوڑ بوتگیں یک جوڑشتے کہ بلوچ سیاست ءِ بنداتی ءُ استیں وھد ءَ ھم مزنیں سیاسی ارزشتے ءُ سانے بلوچ راجمان ءِ تہ ءَ داریت ءُ سیاسی جہدکارے ءِ بستار ءَ مارا اے ھیال سنجیدگی ءَ گوں پوہ بوگی ایں بلے گندگ ءَ کئیت کہ ما زاتی ءُ ھیالی زند ءَ گوں ھمینکس گیروشگ ءُ مانگیش اتگیں کہ وتی کوپگاں اتکگیں اے زمہ واریانی پیلو کنگ ءَ انگت سرجمیں وس ءَ دیگ ءَ نہ ایں۔ سنگتاں نرم مزاجی ءُ ردسیاسی چاگرد ءِ سر ءَ تران کنان ءَ گشت کہ استیں وھد ءَ گندگ ءَ پیداک انت کہ مئے گش ءُ گورا جتائیں طرزکار ءِ بنیات ءَ سست مزاجی ءُ آسودگی ءِ روشت تیزگامی ءَ گوں مئے ورناہاں سان مند کنان ءَ آوانی صلاحیت ءُ جیڑگ ءِ بودشتاں ھلاس کنان انت ءُ ایوک ءَ مشین تبیں انسان جوڑ کنگ ءَ انت۔ پمیشکہ مارا سیاسی جہدکارے ءِ بنیات ءَ وتی یک یک روشت، سانمندیں چاگرد ءُ آسودگیں ماحول ءَ چہ رکگ ءِ ہاترا ءَ شیوار بوگی ایں ءُ وتی زمہ واریانی سر ءَ دلپہکی ءَ گوں عمل کنگی انت۔
دیوان ءِ تہ ءَ ساڑی ایں بنجاہی سنگت ءَ دیوان ءَ وتی ھیال ایر کنان ءَ گشت کہ مرچی اے جاہ ءَ ساڑی بوتگیں کل سنگت بلوچ سیاست ءِ ھما وارس انت کہ جتائیں اڈاند ءُ جیڑہانی بوگ ءَ پد ھم یک رژناہ پگریں ءُ تچکیں سیاسی پلیٹ فارمے ءَ یکجاہ ءُ ھمپگر جوڈ بوتگ اَنت۔ ھمے ھمپگری ءُ یکجاہی انت کہ جتائیں گپتمان ءُ شوربندیانی سانکلاں پروشیت ءُ مارا پہتوئیں سیاسی جہدکار بوگ ءِ درس ءَ دنت۔
سنگت ءَ تران کنان ءَ گشت کہ مرچی مارا پوہ بوگی ایں کہ استیں وھد ءَ ادارہ ءِ لوٹ ءُ گزر، زمہ واری ءُ دیمروئی ءِ سرجمیں ڈبہ ھمے سنگتانی کوپگ ءَ اَنت کہ مرچی اے جاہ ءَ نشتگ انت ءُ وتی زمہ واریاں پیلو کنگ ءَ انت پمے ہاترا مارا چہ ھمک ردیں روشت، نزوریں ھیال ءُ سست تبیں نزوریاں چہ درکپگی ایں ءُ جوان ءُ جانداریں نفسیاتے ءِ واھند جوڑ بوگی ایں دانکہ ما استیں وھد ءِ لوٹانی سر ءَ اوشتات کت بہ کنیں۔
گڈی بنگپ آؤکیں گامگیج ءِ تہ ءَ گوستگیں کابینہ ھلاس کنگ بوتگ ءُ نوکیں کابینہ گچین کنگ بوت۔ نوکیں کابینہ ءِ گچین بوتگیں سنگتانی تہ ءَ کارمستر نیاز بلوچ، کمک کارمستر ھلیم بلوچ، کارگشاد سابر بلوچ، کمک کارگشاد چراگ بلوچ ءُ ھالرسانی کارگشاد وپا بلوچ گچین کنگ بوت انت۔
نوک گچین بوتگیں کابینہ ءِ جار ءِ جنگ ءَ پد سنگتاناں سوگند دیگ بوتگ ءُ دیوان چہ کارمستر ءِ رزا ءَ آسر کنگ بوت۔
بنجائی جارکش: بلوچ اسٹوڈنٹس ایکشن کمیٹی
