بلوچ اسٹوڈنٹس ایکشن کمیٹی کراچی ھنکین ءِ نیمگ ءَ پہ نوک اتکگیں نودربرانی ھاتر ءَ یک وش آتکی مراگشے نمیرانیں اللہ داد ءِ یات ءَ برجم دارگ بوتگ۔ مراگش ءِ تہ ءَ جتائیں بہر بوتگ اَنت کہ آ چو اے ڈول اَنت، تران، ڈیبیٹ، پیپر ریڈنگ، تھیٹر پلے، ڈاکیومنٹری، چاپ ءُ ساز ءُ زیملی بہر۔ اے مراگش ءَ بنجاہی کارگشاد پیرجان بلوچ، بنجائی ھالرسانی کارگوشاد فہد بلوچ ءُ بنجائی کمیٹی ءِ سنگت نگرہ بلوچ ءُ رحمان بلوچ ساڑی بوتگ اَنت۔ اے مراگش ءَ مہمان سّمی دین بلوچ گوں ہمراہاں ءُ عالم داد بلوچ اوں ساڑی بوتگ اَنت۔
مراگش گوں راجی سوت ءَ بندات کنگ بوتگ۔ راجی سوت ءَ پد مراگش وتی اولی بہر ءِ نیمگ ءَ برگ بوتگ کہ آ پیپر ریڈنگ بوتگ، ایشی سرھال زبان ءُ راجدوستی بوتگ ءُ اے پیپر چہ کراچی مزن شاہدربرجاہ بنزہ ءِ کارمستر سنگت مزیر بلوچ ءِنیمگءَ وانگ بوتگ۔ ایشی ہمرائی ءَ دومی پیپر ھنکینی ھالرسانی کارگشاد سنگت وسیم بلوچ ءَ ونتگ کہ آئی سرھال “راج ئٹی بولی نا کڑد” (درین چارمی تاک ءِ براہوئی بہر ءِ نبشتانک)بوتگ۔ سنگتاں وتی وتی پیپرانی تہ ءَ آشوب ءِ میان ءَ زبان ءِ کرد ءُ آئی سان مراگش ءِ دیم ءَ ونت انت۔
مراگش ءِ دومی بہر تران ات، کہ آئی سرھال نودربر سیاست ءُ نودربر گلانی ارزشت بوتگ۔اے سرھال ءِ سر ءَ تران کنوک گل ءِ بنجائی کارگشاد سنگت پیرجان بلوچ بوتگ۔ آئی ءَ سرھال ءِ سر ءَ تران کنان ءَ نودربر ءِ ارزشت ءُ استیں وھد ءُ لوٹانی ھساب ءَ نودربر ءِ کرد ءِ سر ءَ دیوان ءَ سرپد کناں ءَ نودربر سیاست ءُ نودربر گلانی سر ءَ وتی ھیال ایر کُرتگ۔ دیوان ءِ دیمتری بہر زبان ءُ دود ءِ سیادی گوں راج ءَ، ایشی سر ءَ ڈیبیٹ گل ءِ بنجائی ھالرسانی کارگشاد سنگت فہد بلوچ ءُ ھنکینی کارمستر سنگت شمس بلوچ ءَ کرتگ۔ سنگتاں وتی ڈیبیٹ ءِ تہ ءَ بیست ءُ یک فروری ءِ پژدر ءُ زبان ءِ پہ راج ءَ ارزشت ءِ سر ءَ تران کناں ءَ گیشینتگ۔ دیمترا سنگتانی ڈسکشن ءِ تہ ءَ زبان کُشی، زبان ءُ دود ءِ سیادی، زبان ءُ دود ءِ راج ءُ راجانی دیمروئی ءِ سر ءَ سان، بساک ءِ جہد پہ وتی ماتی زبان براہوئی ءُ بلوچی ءِ رکینگ ءِ ھاترا ءُ ایندگہ ڈسکشن ہوار بوتگ اَنت۔
ڈبیٹ ءَ پد مراگش ءِ چارمی بہر تھیٹر بوتگ کہ آئی تہ سنگتاں بینکنگ ایجوکیشن ءِ تھیم ءِ سر ءَ وتی تھیٹر پیش کرتگ ءُ آئی تہ ءَ استاد ءُ نودربر ءِ سیادی پیش داشت کہ چوں بینکنگ ایجوکیشن نودربرانی زھنی بودشت ءِ گیش کنگ ءِ جاہ ءَ کم کنگ ءَ انت، ءُ آوانی بودشتاں ھلاس کنگ ءَ انت۔ مراگش ءِ پنچمی بہر ڈاکیومنٹری بوتگ کہ آ نمیرانیں اللہ داد ءِ سر ءَ جوڈ کنگ بوتگ۔ ڈاکیومنٹری ءِ تہ ءَ نمیرانیں اللہ داد ءِ پہ بلوچ لبزانک، بلوچی زبان ءُ زانت ءِ ھاتر ءَ آئی ءِ کار ءُ کرد پیش کنگ بوتگ۔
مراگش دیم ءَ روان ءَ وتی ایندگہ بہرانی نیمگ ءَ شُتگ، ءُ ھمے وڈ ءَ دیمتری بہر چاپ بوتگ کہ آئی تہ ءَ سنگتاں وتی چاپ پیش کُت ءُ دیوان وش ءُ وشنود کرتگ۔
دیوان گڈی بہراں روان ءَ ساز ءُ زیملی بہر بندات کنگ بوت۔ پہ ساز ءُ زیمل ءِ ھاتر ءَ بلوچی زبان ءِ نامداریں گشندہ مبارک داد ءُ آئی ہمرائی ءَ بینجو استاد ءَ گوںں وتی وش تواری ءُ زیم ءَ دیوان گیشتر شوک ءُ گہتر کرتگ۔ ساز ءُ زیملی بہر ءِ بندات ءَ استاداں راجی سوت پیش کُت پدا ایندگہ سوت گشان کت انت۔
مراگش ءِ گڈسر ءَ ھنکنی کماش سنگت شمس بلوچ ءَ دیوان دیم ءَ گُڈسری تران ایر کرتگ ءُ گُشتگ کہ اے مراگش نمیرانیں اللہ داد ءِ یات ءَ پہ نوک اتکگیں نودربرانی وش اتکی ءَ ایر کنگ بوتگ۔ مئے اے مراگش ءِ اڈ دیگ ءِ مول ءُ مراد ھمے بوتگ کہ ما وتی راجی زانتکاراں یات بکن ایں ءُ نوک اتکگیں نودربراں وش اتک بگش ایں۔ ءُ آواں وتی وانگی جہد ءِ برجاہ دارگ، بلوچ بوگ ءُ وتی راجی زمہ واریاں سرپد بوگ ءُ وتی کچ ءُ کساس ءَ زمہ واریانی سر ءَ کار کنگ ءِ واستہ سرپدی بدئے ایں۔ دیمتر ءَ سنگت ءَ ھمے گُشت کہ بطور ءِ بساک مئے جہد ھمے بہ بیت کہ ما مدام نودربراں ھمے پیم ءَ یکجاہ بکن ایں ءُ آھانی سیاسی ءُ ایندگہ بودشتانی گہتری ءِ ھاتر ءَ کار بکن ایں۔
بلوچ اسٹوڈنٹس ایکشن کمیٹی
