بلوچ اسٹوڈنٹس ایکشن کمیٹی قلات ہنکین نا ہنکینی لس دیوان اڈ تننگا۔ ماریہ بلوچ ہنکینی کارمستر و اَبرار بلوچ کارگشاد گچین کننگار۔
“قلات بلوچ سر ڈغار ئنا دلبند و بلوچ راجی شعور ئنا بنداوی ہند مسونے۔ میری قلات نا ساڑی آ باتیک تینا دیہاڑ ءِ زندہ تخنگ و تینا چاگڑد ئنا رکھ ئکن تینے علم و چاہنداری تون تفر۔” (کماش اُزیر بلوچ)
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی قلات ہنکین نا ہنکینی لس دیوان کارمستر سمیع بلوچ نا کماشی ٹی اڈ تننگا۔ دیوان ئٹ مہمان بساک نا بنجائی کماش اُزیر بلوچ و بنجاہی کمیٹی نا باسک سنگت سہیل بلوچ ئسر۔
ہنکینی لس دیوان ئٹ بنجائی سرکیولر، ہنکینی رپورٹ آتا حوال، نغد کاری، گَل کاری، ہندی و جہانی سیاسی حالیت آتا زِی آ اُست جمی ئٹ گپ و تران آن گُڈ بروکا گامگیج ئٹ تدوکا کابینہ ایسر کننگا و کابینہ کن پوسکنو سنگت گچین کننگا۔
دیوان نا اولیکو بشخ بنجائی سرکیولر ئس، بنجائی سرکیولر ءِ خوانسہ دیوان نا مون آ بنجائی ڈسکشن، پروگرام و فیصلہ غاک تخنگار۔ ہراٹی بروکا چار تُو ئنا فیصلہ و پروگرام آک اوار اُسر۔ دیوان نا ایلو بشخ ہنکینی حوال ئس کہ ہراٹی ہنکینی زمہ وار آک کارگشادی حوال تون اوار تینا کمیٹی تا رپورٹ آتے دیوان نا مون آ تخار۔ نغدی بشخ ئٹ کُل سنگتاک تینا ڈرافٹ آتے خوانار و ہنکین نا کاریم آتیٹ مروکا کوتائی و نزوری تے پاش کرسہ نغد کریر۔ کُل سنگت آتا نغد کننگ آن پد کارمستر نا موکل ئٹ دیوان نا ایلو بشخ گَل کاری بناء کننگا کہ ہراٹی سنگتاک بشخ الیسہ ادارہ نا پروگرام و فیصلہ تیتون اوار کاریم تا شونداری کن تینا سلاہ و مشورہ تے تِسر۔
دیوان ئٹ ساڑی بنجاہی کماش تران کرسہ پارے کہ ہر چاگڑد ئنا رکھوک آک اونا ورناک مریرہ۔ ورناک تینا سوگہو آ فکر آتیٹ چاگڑد ءِ شون تریسہ اودے پین سوگہو و سینگار کیرہ، و اودے جہان نا سرسہب آ رُم ئٹ اوار کیرہ۔ جہانی دیہاڑ ہمو ورنا تا پِن تے یات تِخک کہ ہرافک تینا راج و چاگڑدے تینا چاہنداری، علم وعمل آن مونی درینو۔ اندن بلوچ ورناتا ہم بھلو دیہاڑ ئس اینو ننا مون آ ساڑی ءِ کہ ہرافک علم وچاہنداری ئنا پلہو ءِ الیسہ تینا راج ئنا خذمت ءِ کرینو۔ اینو اگہ بلوچ چاگڑد ئنا خواست و بکار آتے مون آ تخیسہ اُرین گُڑا نن سماء کینہ کہ ننا کوپہ غاتیا راج و چاگڑد ئنا اسہ بھلو زمہ واری ئس مریک، اینو دا ننا راجی زمہ واری مریک کہ نن علم و چاہنداری نا کسر ءِ ارفیسہ تیوہ غا تینا چاگڑدے اندا کسر آ اتوئی و روشن کروئی ءِ۔ گُڑا ننے تینا دا مسخت کن اسہ بھلو کچ اسیٹ جہد و کوشست کروئی تمیک۔ ننے تینا راج ئنا جتا جتا آ ہند آتے اسکان ہنوئی تمیک و تینا راجی باتی تے علم و چاہنداری ئنا کسر ءِ شان تروئی تمیک۔
مون مستی سنگت ہیت کرسہ پارے کہ اینو بلوچ چاگڑد بھلو کچ اسیٹ جتا آ چنکا و بھلا ویل و جنجالی تا گواچی کننگانے کہ ہرا ویل آک ننا راجی و چاگڑدی رُدوم ءِ تورینو۔ اینو بلوچ چاگڑد ئٹ اندنو خُوڑتو ویل بھاز مسونے کہ ہرافک بلکن خںنگپسہ ولے ننا عادت و روشت آتیٹ اوار ءُ۔ اینو خوانندہ غاک اندن آرام پسند جوڑ مسونو کہ ہرافک تینا خواننگ و ہیل کننگ نا وخت ءِ تینٹ گونڈ کرسہ ءُ۔ خواننگ اسہ خوانندہ ئسے کن اندن المی ءِ دنکہ اسہ خرون ءُ رخت ئسے کن دِیر۔ بیدس دِیر آن رخت رُدوم الینگ کپک و تینا ٹُول آتیا خرون ءُ پَنہ ودی کننگ کپک، اندن خوانندہ ءِ ہم بیدس خواننگ آن تاغتورو خیال و گُمان ( آئیڈیا ) دُو بفک ہرانا سوب آن او تینا راج و چاگڑد ئٹ مٹ و بدلی اتینگ کپک۔ خواننگ نا وخت و کسر ءِ گوانڈ کننگ خوانندہ آتیکن ہمو زہنی ناجوڑی تیان اسٹ ءِ کہ ہرا اونا فکری و شعوری رُدوم ءِ توریسہ اونا خیال و گمان آتے محدود کیک۔ اینو بلوچ راج ءِ سوگہو و تاغتورو ورنا تا بکار ءِ کہ ہرافک علمی و شعوری بنیات آ تینا چاگڑد نا راہشونی ءِ کننگ کیر۔
دیوان نا کُل ٹِک آتا زی آ سنگت آتا اُست جمی ئٹ گپ و تران آن گڈ دیوان نا گُڈیکو بشخ بروکا گامگیج ئٹ جتاؤ فیصلہ ارفنگا۔ پروگرام و فیصلہ تیتون اوار ہنکینی کابینہ کن سنگتاک گچین کننگار، پوسکنا ہنکینی کابینہ کن کارمستر ماریہ بلوچ، کمک کارمستر فرید بلوچ، کارگشاد اَبرار بلوچ، کمک کارگشاد نازش بلوچ و حوالکاری کارگشاد کن سنگت مرویز بلوچ گچین کننگار۔
ہنکینی کابینہ نا پوسکن گچین مروکا سنگت آتے بنجاہی سنگت سوغند تِس و کارمستر نا موکل ئٹ دیوان ایسر کننگا۔
بنجائی ترجمان: بلوچ اسٹوڈنٹس ایکشن کمیٹی
