بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی خاران ھنکین ءِ ھنکینی لس دیوان برجم دارگ بوتگ، ابراھیم بلوچ ھنکینی کارمستر ءُ نوید بلوچ ھنکینی کارگُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی خاران ھنکین ءِ ھنکینی لس دیوان ھنکین ءِ گوستگیں کارگشاد نوید بلوچ ءِ سروکی ءَ برجم دارگ بوتگ۔ دیوان ءِ مھمان بُنجاھی کمیٹی ءِ سنگت ارشد بلوچ ءُ عدنان بلوچ بوتگ اَنت۔
دیوان ءَ بُنجاھی سرکیولر، گوستگیں ھنکینی اھوال، نگدکاری، گلکاری، ھندی ءُ میاں استمانی سیاسی جاور ھال ءِ سرھالانی سر ءَ باوست ءَ پد آؤکیں گامگیج ءِ تہ ءَ گوستگیں ھنکینی کابینہ ھلاس کنگ بوتگ ءُ نوکیں کابینہ ءِ واستہ سنگت گچین کنگ بوتگ اَنت۔
دیوان ءِ اولی بنگپ ھنکینی اھوال ءِ وانگ ءَ پد دومی بنگپ نگدی نشست بوتگ کہ سنگتاں نگدی نشست ءَ نگد کنان ءَ گوشتگ کہ نگد ھما سیاسی کاریچ اِنت کہ آ ناں تہنا تئی کوتائی ءُ نزوریانی نشاندھی ءَ کنت بلکیں ادارہ ءَ چہ بَرگشتگ ءِ راہ ءَ رکین ایت ءُ راستی ءِ نیمگ ءَ رہادگ کنت۔ وھدے کہ یک ادارہے چہ نگدی عمل ءُ باوستاں گستہ بہ بیت گُڑ ءَ آ ادارہ پَدروئی ءِ آماچ بیت ءُ بے عملی ءِ مجاں اندیم بیت، پرچاکہ نگد ھما ساپ ءُ پلگاریں عمل ءُ باوست انت کہ آ نزور ءُ ردیں روشتاں شودان کنت ءُ ادارھی باندات ءَ پلگاریت ءُ دیمروی دنت۔ ھمے وڑ وت نگدی ادارھی ڈومین ءِ تہ ءَ احتسابی عمل ءِ گچینی درور انت کہ ما یک باسکے ءِ بستار ءَ وت ءَ وت نگدی ءِ آدینک ءِ تہ ءَ جواب دہ کت کن ایں، دانکہ ما ردیں ءُ در سیاسی روشتاں چہ دَر بیا ایں۔ سنگتاں اہوال کاری ءِ ترز کار ءَ سر ءَ نگد کنان ءَ گشتگ کہ سیاسی عملانی تہ ءَ اہوال کاری یک مزنیں بستارے داریت اگاں مئے سنگتانی تہ ءَ اہوال کاری ءِ ترزکار شوکیں رنگے ءَ مہ بیت گڑا بوت کنت کہ ما وتی گل ءِ زانشتی پروگراماں سر کت نہ کن ایں۔ سیاسی اہوال کاری سیاسی گلانی دیمروی ءِ مانزمان بنت، بلے ہمے اہوال کاری ءِ نہ بیگ یاکہ رابتہ کاری ءِ نزور بوگ وتی تہ ءَ زانشتی ءُ سیاسی پروگراماں داں نودربراں سر کنگ گراں بیت۔ ما ھمے سرپد بیں کہ اہوال کاری پہ سیاسی گَلاں یک ارزشت داریں عملے کہ بید ء آئی ءَ گَل ءِ کار ءُ پروگرام دیمروی کُت نہ کن اَنت۔ پمشکا مئے بازیں پروگرامے ھنکینی اہوال کاری ءِ نزور بوھگ ءِ سوَب ءَ اوشت ءِ آماچ بیت، کجام وھد ءَ زانشتی ءُ سیاسی پروگرام اوشت ءِ آماچ بوت، گڑا گل کاری ءُ کار اوں اوشت ءِآماچ بنت۔ اے بنگپ گوں دلجمیں باوست ءَ پد چہ پاگواجہ ءِ رز ءَ بند کنگ بوت۔
دیمتری بن گپ گل کاری بوتگ، ایشی ءِ تہ ءَ سنگتاں تران کنان ءَ گوشتگ کہ گل کاری گلانی پیسلہ سازیں بن گپ زانگ بیت، کہ ادا پہ گل ءِ دیمروی ءُ کارانی گہتری ءِ ھاتر ءَ باوست بیت مئے گل کاری ءِ بنگپ ءِ تہ ءَ مدام کوشست ھمے بوتگ کہ ما گل ءِ دیمروی ءَ چے پیم جنزینت کن ایں۔ گل کاری تہنا ڈیبیٹ ءُ باوستی بن گپ نہ انت بلکیں گل کاری پیسلہ سازی ءِ عملی کاریچے ءِ ھم لوٹ ءَ کنت۔ وھدے کہ ما پہ گل ءِ دیمروی ءَ توجیلے جیڑ ایں گُڑا تہنا توجیل ءِ جیڑگ دیمروی آورت نہ کنت بلکیں ھمے پیسلہانی عملی دورشم کہ آئی ءِ تہ ءَ کُلیں باسک ءُ زمہ وار بھر بہ زورنت، گُڑا ھمے جیڑتگیں توجیل مٹی ءُ بدلی یاکہ گل ءَ دیمروی دات کن انت۔ مارا مدام پہ گل ءِ کار ءُ پروگراماں ساڑی بوھگی ایں دانکہ گلانی ھما کہ عملی لوٹ اَنت آ سرجم بہ بنت ءُ مئے کارانی تہ ءَ دیمروی اتک بہ کنت۔ ہمے پیم مئے ھنکین ءَ وانگی راہ ءُ راھبندانی چارگ ءَ پد سما کپیت کہ ما جتائیں اڑ ءُ جنجالانی دیمپان ایں، آ تورے اسکول، کالج ءُ کیمپس بہ بنت یاکہ پہ لس وانگ جاہے ءَ لائبریری کُل ھلاسی ءِ سر ءَ اَنت۔ اے ھند ءَ وانگی کچ روچ پہ روچ نزور ترّاں انت، اے وانگی نظام پہ مئے ورناہاں چُشیں شِہمیں بانداتے آرگ ءَ کردے پیلو کت کنگ ءَ نہ اَنت، ءُ ایش یک نیکیں پالے نہ اِنت۔ ھمے وڑ ءَ ھاران وڑیں ھندے ءَ لس وانگی جاہ بزانکہ لائبریری ھم نہ بیگ ءِ ھساب ءَ اَنت کہ ورنا ءُ نودربر چہ وانگ جاہاں سرجمی ءَ زبہر انت۔ گڑا اے گپ مارا یک نودربر گلے ءِ بستار ءَ نہ تہنا سرپد بوگی ایں بلکیں وتی عمل ءُ کرد ءَ گوں ایشی ءِ واستہ گوں مہکمی ءَ کار کنگ ءُ اوشتگی ایں۔
کلیں سرھالانی سر ءَ گوں دلجمی ءَ باوست ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوتگ ءُ پہ نوکیں کابینہ ءِ ھاتر ءَ اے سنگت گیچین کنگ بوتگ اَنت، کارمستر ابراھیم بلوچ، کمک کارمستر اقبال بلوچ، کارگشاد نوید بلوچ، کمک کارگشاد نازش بلوچ ءُ ھالرسانی کارگشاد معیم بلوچ۔ بُنجاہی سنگت ءَ نوک گچین بوتگیں ہنکینی کابینہ سوگند دات ءُ دیوان ءِ آسر کنگ بوتگ۔
بنجاہی جارکش: بلوچ اسٹوڈنٹس ایکشن کمیٹی
