بلوچ ڈیھ چہ یک ابدمانیں راجی ءُ گہگیریں شائرےءَ زبہر بوت۔ اے دلسوزیں ھالءِ گوما گل سئے روچی موتکےءِ جارءَ جنت۔
بلوچ اسٹوڈنٹس ایکشن کمیٹی
ھرچ ڈیھ ءُ زمینےءَ راجی شائر، لبزانت ءُ ایدگہ پڈانی زانتکار ءُ کواسانی جتائیں ارزشت ءُ کردے بیت۔ ھرچ باسمائیں راجی زانتکار ءُ لبزانت وتی چاگرد ءُ ڈیھءِ راستیانی بنیادءَ وتی زمہ واریاں گیشین ایت ءُ وتی کردے پیلو کنت۔ اے درگتءَ بلوچ ڈیھ ھم سَنٹ نہ بوتگ ءُ نہ انت۔ خیربخش مری ءُ صبادشتیاریءِ پلسپہءِ چیدگ مبارک کازی اوں ھمے سرپءَ نمیران بوت کہ آئیءِ شاعری وت وتی پلسپہءِ درانگازیءَ کنت۔
بلوچ ڈیھ ءُ راجی گہگیریءِ مزن نامیں شاعر ءُ زانتکار مبارک قاضی ءِ ناگتیں بیرانی پہ بلوچ ڈیھ ءُ گہگیریءِ لبزانکءَ مزنیں تاوانے۔ مبارک قاضی نہ تہنا بلوچی زبان ءِ مزن بالادیں شاعر ءُ لبزانتے اَت بلکیں بلوچ راج ءِ باسمائیں جہگیرے ات ھم۔ بلوچ ڈیھءِ جاورالانی سرجمیں توارے ات۔ آئیءِ شاعری سرجم گوں وتی ڈیھ ءُ ڈگارءِ راستیں جاورہالاں پیوست ات۔ ھستیں اھد ءِ ھما کرداراں چہ یکے اَت کہ ھرچ وڑیں زوراکیانی دیم ءَ اوشتوک ات ءُ پہ بدیں دژماناں آئیءِ آشوبیں توار شہمات ءُ زِبرّیں ھکّلے ات۔ آئیءَ مدام وتی شائریءَ تچکیں راستیءِ پدرائی کُت ءُ بلوچستان ءِ جہگیری کت۔بلوچ گہگیری شائری ءُ راجی پِگر ءَ چکاریں راجی بامرد بلوچستان ءِ بن دپتر ءِ تاکاں نمیران بوت۔
مبارک قاضی بلوچی زبان ءَ شائری ءُ بلوچی لبزانکءِ جہد ءَ ھوار سیاسی کاراں ہم اولی سرْپءَ اوشتوکیں مردے اَت۔ آہی ءَ ھرچ وڑیں زوراکی دیستگ اَت ءُ آھانی دیم ءَ تمردی ءَ اوشتاتگ اَت۔ ہمے تمردی ءِ جہد ءَ گوں زندان ءِ ترندیں سانکلاں ہم بندیگ کنگ بوت ءُ جتائیں ھیل ءُ نیموناں گوں بیھار دیگ بوت بلے مجال نہ اِنت کہ اے عہدسازیں کردار پُشت ءَ بہ کنزیت۔ برے وتی شائری ءِ ازم ءَ گوں عرش ءَ جکسینگ ءَ اَت ءُ برے وتی پِگر ءَ گوں بلوچ ءِ جُہد ءَ ساڑاھگ ءَ اَت۔ وتی اِزم ءَ گوں بلوچستان ءِ کُنڈ کُنڈ ءِ کسہاں راج ءِ دیم ءَ درانگازگءَ اَت۔ آئی ءِ کِرد ءُ نام ءَ سرجمیں بلوچستان ءِ ساہدار ءُ بے ساہ پجاہ کارنت کہ قاضی بلوچستان ءِ ھکیگیں نمیرانیں کرداراں چہ یکے۔
بلوچ راج ءِ ابدمانیں کارست ءِ بیران بیگ پہ بلوچ ءَ مزنیں تاوانے، اے ھما اہد ءُ زمانگ انت کہ دوبر پیداک نہ بنت، بلئے ایشانی گپتار ءُ کردار راجءِ میانءَ کدی اوں شموشگ نہ بنت۔ مبارک قاضی راجی شائرےءِ ھواری ءَ راجی کردارے ءُ آئی ءِ بیران بیگ ءِ سرءَ سرجمیں بلوچ راج پُرسیگ اِنت۔ اے پُرس ءِ بھر بیگ ءِ ہاتر ءَ گل سئے روچی موتک ءِ جارءَ جنت۔ گل ءِ سرجمیں ھنکین وتی ھنکیناں سئے روچی موتکءِ دارگءِ واستہ ھرچ وڑیں مزنیں گلی کاراں مہتل دار ایت۔
