بلوچ اسٹوڈنٹس ایکشن کمیٹی حیدر آباد ہنکین نا ہنکینی لس دیوان اڈ تننگا۔ اُزیر بلوچ ہنکینی کارمستر و جنید بلوچ ہنکینی کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی حیدر آباد ہنکین نا ہنکینی لس دیوان کمک کارمستر جہانزیب بلوچ نا کماشی ٹی اڈ تننگا۔ دیوان ئٹ ساڑی آ مہمان بنجاہی کمیٹی نا باسک عدنان بلوچ ئس۔
ہنکینی لس دیوان ئٹ بنجاہی سرکیولر، ہنکینی رپورٹ، نغد کاری، گل کاری، ہندی و جہانی سیاسی حالیت آتا زی آ اُست جمی ئٹ گپ و تران کننگ آن گُڈ دیوان نا گُڈیکو بشخ بروکا گامگیج ئٹ تدوکا کابینہ ایسر کننگا و ہنکینی کابینہ کن پوسکنو سنگت گچین کننگا۔
دیوان ئٹ بنجائی سرکیولر و ہنکینی اہوال نا زی آ کل سنگت آتا گپ و تران آنن پد دیوان ئٹ نغدی نشست نا زی آ گپ مس۔ مسٹمیکو بشخ نغد کاری ٹی کل سنگتاک بشخ ہلیسہ تینا نغدی ڈرافٹ آتے دیوان نا مون آ تخار۔ نغدی بشخ ئٹ سنگتاک نغد کریسہ پاریر کہ سیاست اسہ پریکٹیکل ءُ عمل ئسے ہراٹی ہر سیاسی باسک
جتا آ ردی و نزوری تا گواچی مننگ کیک، ہرا ردیک و نزوریک نشاندئی کننگ آن پد ہلینگ و توننگ مریرہ۔ نغد ہمو وسیلہ ءِ کہ نی ہمو ردی و نزوری تے نہ بیرہ چائنگ و خننگ کیسہ بلکہ اوفتا توننگ کن نی پوسکنو و جتا ءُ خیال و آئیڈیاز مون آ ہتیسہ۔ ننا سنگت آک اندا نیّت تون نغد کیر کہ اوفک گڑاتا جوانی کن تینا خیال و آئیڈیاز آتے تخنگ کیر۔ سنگتاک مونی ہیت کریسہ پاریر کہ سیاسی عمل نا سیاسی باسک آن بُنداوی خواست اندا مریک کہ او تینا لس چاگڑد نا بندغ آتیتون خُڑکی کے، و اوفتے تینا سیاسی مجلس و دیوان آتیٹ ہتیسہ تینا ادارہ نا پروگرام و مسخت نا بابت ئٹ سرپدی ہیتے۔ دا عمل ہر سیاسی ادارہ نا بُنداوی عمل چائنگک کہ ہرا مخلوق ءِ سیاسی شعور بشخیسہ اودے ادارہ نا پلہو آ تفک، ولے اگہ دا گڑا نزور مس یاکہ خننگ آ بتو گڑا دانا متلب اندا مرو ءِ کہ ننا ہمو بُنداوی کاریم پد تمّنگ ءِ۔ دا ہمو نغد ءِ کہ ننا کاریم تیٹی نزوری تی پاس کیک و نن اندا گڑاتے تینٹ توننگ کرون۔
دیوان نا ایلو بشخ گَل کاری ئس ہرانا ارزشت ءِ سرپد مریسہ سنگتاک تینا ڈرافٹ آتے دیوان نا مون آ تخار۔ گَل کاری ئٹ بنجائی سنگت تران کریسہ پارے کہ ہمو راجاک مدام دیہاڑ ئنا پَنہ تے آ تینا پِن ءِ زندہ تخنگ کرور ہرافک وخت و حالیت آتا حساب ئٹ تینا سیاسی و علمی کاریم تیٹی ہمو وار ئنا مٹ و بدلی ہتینگ نا خواست توریرہ۔ سنگت پارے کہ اینو بلوچ چاگڑد ہم اسہ سخت ءُ حالیت ئسے آن گدرینگسہ ءِ ہراٹی چاگڑدی ویل آتیتون اوار سندھ وڑو ہند ئسے ٹی بلوچ نا راجی ویل آک ءُ۔ داڑے اندھ ئٹ اندنو بھازو ہند ئس ارے کہ ہراڑے ہزار آتا کچ آ بلوچاک آباد ءُ ولے اوفک تینا راجی آ پجّارے گم و گار کرینو۔ دا اسہ راج ئسے کن بھلو نسخان ئس چائنگک، و دانا بھلا سوب ام ہمو راجی و سیاسی چاہنداری نا کمبوتی ءِ۔ داڑکن ننے اسہ خوانندہ گل ئسے نا حیثیت ئٹ دا ہند ئنا ورنا تا سیاسی و خواننگی ویل آتے ہرفیسہ ہندی آبادی با بُنداوی ویل آتے پُہہ و سرپد مرین۔
مون مستی سنگت تران کرسہ پارے کہ سیاست ہمو عمل ءِ کہ ہرا ننے اسٹ ایلو تون تفیسہ اسہ سوچ و فکر ئسے نا خواجہ کیک۔ دا بلوچ سیاست نا برکت ءِ کہ اینو ہر بلوچ اسہ سیاسی تپہ ئسے آ مُچ مریسہ تینا چاگڑد ئنا ویل آتے ایسر کننگ نا جہدے کرسہ ءِ۔ اینو نا ساڑی آ حالیت آتیٹ اگہ نن تینا چاگڑد آ نظر ئس شان گُڑا مدام چاگڑد ئنا ہمو خواست آک ننا مون آ بریرہ کہ ہرافتے اسہ خوانندہ و لائخ ءُ ورناس پورو کننگ کرو ءِ۔ گُڑا ننے تینا چاگڑد نا دا خواست آتے پورو کننگ کن مخلصی و ایمانداری ئٹ تینا خواننگ آ پام تروئی ءِ، و اندن لائخ جوڑ مروئی ءِ کہ تینا چاگڑد ئنا تیوہ غا خواست آتے سرپد مننگ کرون۔ کل سنگت آتا گپ و تران آن پد گل کاری نا ٹِک ایسر کننگا۔
دیوان نا کُل بشخ آتا زی آ اُست جمی ئٹ تران آن گُڈ دیوان نا گُڈیکو بشخ بروکا گامگیج ئس کہ ہراٹی تدوکا کابینہ ایسر کننگا و پوسکنا ہنکینی کابینہ کن کارمستر اُزیر بلوچ، کمک کارمستر اسحاق بلوچ، کارگشاد جنید بلوچ، کمک کار گشاد جہانزیب بلوچ و حوالکار آصف بلوچ گچین کننگار۔ ہنکینی کابینہ نا پوسکن گچین مروکا سنگت آتے بنجاہی سنگت سوغند تس و انداکان کارمستر نا رزا ئٹ دیوان ایسر کننگا۔
بلوچ اسٹوڈنٹس ایکشن کمیٹی
