کتاب ءُ زندان
نبشتہ کار: زمیرآلم بلوچ
کتاب انسان ءِ شعور ءِ کندیل اِنت کہ آ انسان ءَ را چہ ھما تھاریءَ در کنت ءُ یک رُژنائی ءَ سر کنت ،گوستانک اے چیزءَ پیش دار ایت کہ کتابانی توک ءَ ھر واب ءِ مانا پدّر اِنت، ھر راج ءِ دیمروئی،دانائی ءُ ھوش مندی ءُ سوبین بیگ ءَ کتاباں یک بلاھیں کردے پیلو کتگ، ھر ایردستیں راج ءَ را یک رُژنائیں بانداتے بکشاتگ۔ ھمے سبب انت کہ ھر وھد ءَ زورگیریں واکے اگاں یک راجےءَ را گلام کنگ بہ لوٹ ایت درستاں چہ پیسر آئی ءِ ھما علم ءُ زانت ءِ سرءَ اُرش کنت ءُ آئی ءِ ھما زانت ءُ شعور ءَ ھلاس کنگ ءِ جھدءَ کنت ءُ ھما گلامیں راج ءِ وانگی ربود (سسٹم)ءُ آئی ءِ وانگی ادارھاں تباہ کنت، ھما گلامیں راج ءَ را چہ کتاباں دور دارگ ءِ جھدءَ کنت۔
ھمے پیم ءَ بلوچستان ءَیک انچیں جاورے ودی کنگ بوتگ کہ بلوچ نودربراں روچ پہ روچ چہ کتاباں دور دارگ بوگ ءَ اِنت، آھانی ھما زانت ءُ زانشت، شعور ءُ آگاھی گوں پندلاں ھلاس کنگ بوگ ءَ انت کہ بلوچستان ءَ جتاجتائیں ھنداں کتاب میڑھانی سرءَارش ءُ کتاباں پابندی جنّگ بوگ ءَ انت ءُ بلوچ نودربراں گوں یک مجگی گلامی ءَ دچار کنگ بوگ ءَ انت، چداں چہ اے گپ پدّر انت کہ اے استان ءَ را چہ علم ءُ زانت ءَ چنچو تُرسگ ءَ انت بلے علم، زانت ءُ زرمبشت دارگی چیزنہ انت ءُ نئیکہ داگ بنت، آ مدام دیم پہ وتی منزل ءَ گوں مُھکمی جُنزاں کن اَنت۔
ھمے داب ءَ بلوچ اسٹوڈنٹس ایکشن کمیٹی (بساک) بلوچستان ءَ جتاجتائیں ھنَد ءُ دمگاں کتاب میڑہ اڈ دیگ ءَ انت ءُ وتی بلوچ راج ءَ را علم ءُ زانت ءِ نیمگ ءَ برگ ءِ جھد کنگ ءَ انت کہ بلوچ نودربر کتاب بہ وان اَنت ءُ وتی وتی جِند ءُ وتی زمین ءِ ارزشت ءَ سرپد بہ بنت بلے زوراکءَ اے گپ شات نہ بیت کہ بلوچ نودربر کتاب بہ وان انت ءُوت ءَ ءُ دنیا ءَ سرپد بہ بنت، ھمے سبب کتاب میڑھانی سرءَ اُرش بوگ ءَ انت، نودربر ترسینگ بوگ ءَ انت، کتاب ءُ نودربر زندانی کنگ بوگ ءَ انت کہ آ چہ کتاباں دور بہ بنت۔اے زوراک ءِ مول ءُ مراد ھمیش انت کہ بلوچ راج چہ کتاباں دور بہ بیت، آھانی ھما جستجو ،جیڑگ ءِ بود ءُ پہمگ ءِ سلاہ ءُ ھاسیت ھلاس بہ بیت۔ چہ ادءَ ھمے زانگ بیت کہ اے ریاست بلوچ راج ءَ را زہنی نزوری ءِ نیمگ ءَ برگءِ جھد ءَ انت۔بلے اے گپ ھر کجا پدر اِنت کہ کتاب ھما شئے اِنت کہ ھر اڑانداں پروش دنت ءُ وتی کشک ءَ گیشین ایت داں گڈی وھد ءَ دیم پہ سوبمندی ءَ سر بیت۔
بلے اے گپءِ گوستانک ءُ دنیا ءِ کتاب گواھی ءَ دیئنت کجا کہ یک جُنزے بندات بوتگ اودءَ درستاں چہ مستریں سلاہ کتاب ءُ زانشت زانگ بوتگ اَنت پرچاکہ کتاب ھما سلاہ بوتگ اَنت کہ ایردستیں راجاں چہ زانت ءُ سرپدی ءَ سرچکار اِش کرتگ گڈاں ھما جُنز گوں سرجمی ءَ سوبمند بوتگ انت۔ چشیں بازیں جُنزانی درور است انت آ جُنزانی توک ءَفرانس ءِ آشوب بہ بیت، روس ءِ آشوبی جنز ءِ سپر بہ بیت یا افریقی ملکانی جُنز بہ بنت اے جُنزانی توک ءَ کتاباں یک بلاھیں کردے پیلو کرتگ ءُ گلامیں راجاں یک راستیں کِشکے ءَ تیلانک داتگ ، ھما گلامیں راجاں یک رُژنائیں بانداتے بکشاتگ ۔
بلوچ راج ہم مرچی گوں یک انچیں جاورے ءَ دچار انت کہ آئی ءِ زمین گوں مڈیاں پُلگ بوتگ بس آئی ءِ امیت ءُ دلبڈی ھمے کتاب اَنت بلے ھمے کتاب چہ آھاں پچ گرگ بوگ ءَ انت کہ کتاب آھاں رُژنائی ءِ نیمگ ءَ بر اَنت ءُ یک سوبمندیں بانداتے بکشا ئینت ءُ اے زوراکاں پہ بدیں ہالے۔ چوناہ ءَھر کجا کہ یک زورگیریں ملکے بوتگ ءُ دومی نزوریں ملکے ءِ را وتی ایردستے کرتگ گڈا اودءَ کتاب ءُ زندان ءِ جنگ الم بوتگ بلے کتاب ھما تاگتوریں شئے بوتگ کہ آئی ءَ مدام باج وتی نام ءَ کرتگ پرچا کہ ھیال و سوچ ءِ دارگ ءُ بندیگ کنّگ یک نہ بوتگیں ھبرے زانگ بیت، کتاباں ھرچی بہ گر ءُ بندیگ بہ کن، آ گیشتر مھکمتر بنت درکاینت ءُ دیم ءَ دگہ ہزار تاگتور یں انسان ودی کن اَنت پرچاکہ ھیال دارگ ءُ بندیگ کنگ نہ بیت ۔
ھمے ھساب ءَ بلوچ ورنایانی چہ کتاباں دور دارگ یک ناکامیں پندلے پرچاکہ زانت ،پگرءُ سوچ ءِ داروک ءُ زندانیگ کنوک گوْستءِ توک ءَ وت گار بیگواہ بوتگ اَنت بلے راستی ءُ زانت ءِ کندیل مدام روک بیتگ ءُ بلان بیتگ۔ گڈاں مروچی بلوچ ورنایانی واست ءَ اے المی انت کہ آ زوراک ءِ ھر جوڈ کرتگیں مشکل ءُ پندلاں پروش بہ دیے اَنت ءُ وتءَ گوں کتاباں نزیک بہ کن اَنت ءُ وتی ھما سوچ ءَ روچ پہ روچ مھکم بہ کن اَنت دانکہ وتی مکسد ءَ سوبمند بہ بنت پرچاکہ کتاب ھما تاگتوریں سلاہ اِنت کہ ایردستیں راج ءَ را چہ تہاری ءَ ایردستی ءَ کش ایت ءُرُژنائیں بانداتے بکشائیت۔
