نبشتہ کار: سارہ بلوچ
اِلم ءِ واھُند پہ جُست ءَ کدی بیگواہ نہ بیت۔
پندل ءُ ساز ءُ بدیں پنتانی ھمراہ نہ بیت۔
کاگد ءُ کاشیں کلم ءُ دپتراں پُشت مہ جن۔
بیدے اِلم ءَ جھان کَسّی دوزواہ نہ بیت۔
نوکیں سال ءِ بندات مدام گوں نوکیں اُمیت، جزم ءُ نوکیں سوچ ءَ کنگ بیت۔ چُشیں جاوراں بلوچ اسٹوڈنٹس ایکشن کمیٹی ءِ نیمگ ءَ چہ بلوچستان کتاب کاروان ءِ نام ءَ کتاب اسٹالانی برجم دارگ کسانیں کارے نہ اِنت بلکہ یک پگری ءُ شعوری گامگیجے۔ بلوچستان کتاب کاروان ءِ گامگیج الم ءُ زانت ءِ راستیں چیدگ اِنت۔ کاروان بلوچستان ءِ جتا جتائیں ھند ءُ دمگاں کتاب میڑہانی وسیلہ ءَ زانت ءُ زانشت ءَ برگ ءُ سر کنگ ءَ اِنت دانکہ نودربر ءُ لس مھلوک سرپد کنگ بہ بنت کہ کتاب ھما رُژن اِنت کہ گُلامیں راجاں ماں تھاری ءَ رکّین اِیت۔ انچوش کہ افلاطون گُشیت “کتاب جھان ءَ ارواہ، دماگ ءَ بانزُل، گُمان ءَ بال، ءُ ھر چیز ءَ زندگی دنت۔”
منی گمان اِنت کہ بلوچستان کتاب کاروان تھنا کتابانی میڑہے نہ اِنت بلکہ اُمیت، دیمروئی ءُ گھگیری ءِ چیدگ اِنت۔ اے یک انچیں جنبشے کہ ایشی ءِ بُنھشت کتاباں گوں بندوک اِنت کہ آئی ءِ تہ ءَ مردم ءُ چاگرد دوئیناں بدل کنگ ءِ توجیل ءَ کنت۔ اے سپر ءِ دیم ءَ روگ ءَ گوں بلوچ ورناھاں چہ وانگ ءُ زانگ، نگدی سوچ ءُ مدامی وانگ ءِ جوڈشت ءَ وتی آیوکیں وھد ءِ زمہ واری ءِ زورگ ءِ ھاتر ءَ دلبڈی رس اِیت۔ ھما گلزمین ءَ کہ زلم ءَ چہ کرناں لس مھلوک ءِ توار ھاموش کتگ، ھمے ڈیھ ءَ بلوچ اسٹوڈنٹس ایکشن کمیٹی بلوچ راج ءَ گوں زانت ءُ زانشت ءَ آژنا کنگ ءِ باکِردیں جُھدے کنگ ءَ اِنت۔ اے کیمپین بلوچ ءِ پجار ءُ گوستانک ءِ رکّینگ، ناآشنائی ءُ راج ءِ زانت ءَ گُٹگیر کنگ ءِ ھلاپ ءَ یک شعوری گھگیری ءِ عمل اِنت۔ بلوچستان ھما ڈیھ اِنت کہ اُودءَ یک وھدے ءَ کتاب ءِ وانگ، لوگ ءَ کتاب ءِ ایر کنگ یا کتاب ءِ دست ءَ کنگ ھم جرم لیکگ بوتگ، بلے مرچی بساک کتاب میڑھاں گوں وانگ ءُ زانگ ءِ توجیل ءُ راجی جنبش ءِ بُنھشت ءَ ایر کنگ ءَ اِنت کہ آئی ءِ بُنھشت پِگری سرپدی ءُ دود ءُ ربیدگ ءِ رکّینگ اِنت۔ کتاب کاروان تھنا وانگ ءِ کمپین نہ اِنت بلکہ سیاسی جار ئے- اے جار اِنت کہ بلوچ راج ءَ دگہ ھچ تھاری ءِ تہ ءَ داشت نہ کنت۔اے زرمبشت لبزانک، راجدپتر، ءُ فلسفہ ءِ دیم ءَ برگ ءِ جوڑشت ءَ کرناں چہ بلوچ ورناھاں گون جُنزان اِنت، آھانی تہ ءَ راجی شان ءُ گوستانکی شعور ءَ پیداک کنگ ءَ اِنت۔
بساک ءِ اے مھم ءِ وسیلگ ءَ ھما وانگ ءُ زانگ ءِ جیڑھاں گوں گر ءُ دار کنگ لوٹ ایت کہ سالانی سال اِنت کہ بلوچ نودربراں گوں دوچار اِنت، چوش کہ کتابجاھانی سک ءَ کمی، بے اثریں وانگ ءُ زانگ ءِ ادارگ ءُ نزوریں وانگ ءُ زانگ ءِ بنیاتی ڈھانچہ۔ بلے بلوچستان کتاب کاروان ایوک ءَ وانندگی ءِ دیم ءَ برگ ءَ گوں بندوک نہ اِنت بلکیں ایشی ءِ دائرہ باز گیشتر اِنت۔ کیمپین بلوچ ورناھانی تہ ءَ نگدی سِنچ، پِگری آجوئی ءُ جست ءُ پرس ءِ ھمت ءِ ایر کنگ ءِ چاگرد ءَ ساز اِیت۔ کتاب کاروان ءِ جھد اِنت کہ نودربراں چہ اے ذھنیت ءَ در بہ کنت کہ وانگ ءُ زانگ ایوک ءَ کارے ءِ رسگ ءِ وسیلہ نہ اِنت بلکیں اے مھم وانگ ءُ زانگ ءَ سوبمند کنگ، وت ءَ سرپد کنگ ءُ شعوری ھوالہ ءَ مُھکم کنگ ءِ توجیل اِنت۔ اے ھما پراھیں چاگردی ھیالاں بیھار دنت کہ آ وانگ ءُ زانگ ءِ ارزشت ءَ کم لیک اَنت ءُ اے گپ ءَ پدر کنت کہ زانت ھما رژن اِنت کہ نہ ایوک ءَ مردماں بلکیں سرجمیں چاگرد ءَ مٹ کنت۔
بساک ءِ اے سپر ءَ برجاہ دارگ ءِ وھد ءَ بلوچستان کتاب کاروان یک امیتے، یک درپشناکیں چراگے ءِ رنگ ءَ دیم ءَ اتکگ۔ اے کاروان ءِ دیم ءَ آیگ اے گپ ءَ پدّر کنگ ءَ اِنت کہ بلوچ راج گوں وانگ ءُ زانگ ءِ زانت ءَ لگتمالی، ایر دستی، ءُ زلم ءُ زوراکی ءِ ساناں چہ دیم ءَ شُت کنت ءُ یک رژنائیں بانداتے ءِ بُن ھشت ءَ ایر کُت کنت۔ اے جُنز ایوک ءَ کتابانی سرءَ نہ اِنت، بلکیں یک انچیں چاگردے ءِ جوڑ کنگ ءِ واب اِنت کہ آ چہ وانندہ، سرپد ءُ ذمہ واریں مردماں وجود ءَ بہ ایت- اے وڑیں مردم کہ آھانی تہ ءَ نہ ایوک ءَ وتی باندات ءِ جوڑ کنگ ءِ ھاٹیگ بہ بیت بلکیں سرجمیں چاگرد ءِ باندات ءَ پہ اِلم ءُ زانت ءِ رژن ءَ بالا بہ کَنت۔ اے وھد ءَ کہ بلوچستان ءَ وانگ ءُ زانگ بے کساس اڈاند ءُ گپچلانی آماچ اِنت، بلوچ اسٹوڈنٹس ایکشن کمیٹی ءِ نیمگ ءَ بلوچستان کتاب کاروان ءِ بندات یک ستا کرزیں ءُ جرت مندیں گامگیجے۔ اے کاروان ءِ مول ءُ مراد نہ ایوک ءَ وانگ ءُ زانگ ءِ ارزشت ءِ پجار ءَ کنگ اِنت بلکہ وانگ ءِ دود ءُ ربیدگے ءِ دیمروئی ءُ نوکیں پدریچ ءَ گوں کتاباں ھمگرنچ کنگ اِنت۔
اے کاروان ایوک ءَ کتابانی بھر کنگ ءَ گوں بندوک نہ اِنت بلکہ ورنائیں ذھنانی تہ ءَ پکری تجسس ءِ زندگ کنگ ءُ آھاں شریں راجی باندات ءِ وژن دیگ ءِ جھد اِنت۔ کتاب کاروان بلوچستان ءِ جتاجتائیں شھر ءُ دمگاں سر بوتگ کہ ایشانی تہ ءَ کیچ، گوادر، پنجگور، کوئٹہ، مستونگ، ڈیرہ غازی خان ءُ آئی ءِ کش ءُ گور ءِ دمگ، تونسہ، بھارخان، کوھلو، بولان، نصیر آباد، خاران، چاگی، سبی، نوشکی، حب، کراچی ءِ دگہ بازیں دمگاں کہ اُد ءَ بلوچ آباد اَنت، ھوار اَنت۔ بلوچستاں ءِ ھمک ھلک ءُ میتگ ءَ بساک ءِ سنگتاں کتاب میڑہ برجم داشتگ اَنت کہ آھانی تہ ءَ بلوچ راجدپتر، سیاست، لبزانک ءُ فلسفہ ءِ کتاباں ھوار ایندگہ پڑانی کتاب راج ءَ سر کنگ بوتگ اَنت۔ ھمے رنگ ءَ زھگانی واستہ ھم گل ءِ نیمگ ءَ چہ ماھتاک ءُ کتابُک نبشتہ کنگ ءُ دیم ءَ آرگ بوتگ اَنت چوشکہ ”گام“ ءُ نوک چاپ بوتگیں کتابُک ”کمپیوٹر ءِ پجار“ (کمپیوٹر ءِ دیمدرائی) اسیلیں درور اَنت ءُ آ انگریزی، اردو، بلوچی ءُ براہوئی زباناں دست کپتگ اَنت، دانکہ گیشتر زھگ ءُ نودربر چہ ایشاں نپ چست بہ کن اَنت۔
اے کیمپین بلوچ ورناھاں وتی ماتی زبانانی وانگ ءُ وانینگ ءِ ھاتر ءَ دلبڈی دنت کہ وتی پجار، دود ءُ ربیدگ، میراث ءُ راجدپتر ءِ رکینگ ءَ المی اِنت۔ کتابانی وسیلہ ءَ وت ءَ پگری ھوالہ ءَ آژنا ءُ مُھکم کنگ استیں وھد ءِ مستریں لوٹاں چہ یکے۔ کیمپین ءِ یک برجمیں لیکہ ئے ایشی ءِ وت واجھی ءُ لس مھلوک ءِ کردار اِنت۔ بساک ءَ مدام اے گپ ءِ سر ءَ زور داتگ کہ وانگ ءُ زانگ چاگردی ناانساپی آنی ھلاپ ءَ یک سیتمندیں اوزارے، ھاس ھما لگتمالیں دمگ کہ اودا ایردستی ءِ رھبند است اَنت۔ کتاب کاروان اے ھیال ءَ دیم ءَ برگ ءَ اِنت کہ وانگ ءُ زانگ نا تہنا لگتمالی ءِ سانکلاں پروش دیگ ءِ یک درپشناکیں جُھدے بلکہ انسان ءِ بنُکی ھک اِنت کہ یک راجے ءِ تہ ءَ دائمی بدلی آرگ ءِ توجیل ءَ ساز اِیت۔ بلے اے کاروان ءَ اڈاند ھم دیم ءَ اتکگ اَنت کہ آھانی تہ ءَ واکدار ءُ ضلعی انتظامیہ ءِ نیمگ ءَ چہ آزار ءُ اذیت ھوار اَنت کہ اود ءَ نودربر ءِ کار ءُ کرد باز براں یک ھترہ یے ءِ رنگ ءَ گندگ بنت۔ اے گپ ءَ ابید سنگت وتی جُھد ءِ سر ءَ مھکمیں رنگے ءَ اوشتاتگ اَنت ءُ اے گپ پدّر کتگ کہ زانت ءُ سرپدی ھما تاگت اِنت کہ زوراکاں شکست دات کنت۔ اے پہ ما پہرے کہ ما ھما چاگِرد ءِ تہ ءَ ودی بوتگیں کہ آ مُدامی وتی بنُکی ھکانی ھاتر ءَ زوراکانی دیم ءَ اوشتوک بوتگ ءُ ما ھما وشبھتیں پدریچ ایں کہ ما وتی چاگرد ءِ تہ ءَ اِلم ءُ زانت ءِ اے سپر ءِ دیم ءَ برگ ءَ ھواریں۔
بلوچستان کتاب کاروان مھکم بات ءُ بساک سوبین بات۔
