نبشتہ کار: ایسپ بلوچ
پجّار
حاجی کوٹ بارکھان ءَ ودی بوتگیں اکبر خان،نواب محراب خان بگٹی ءِ بچّ بوتگ ءُ آئی ءِ ودی بوئگ ءِ رمس 12 جولائی 1927 اِنت۔ اکبر خان ءَ وتی بنّکی وانگ چہ پرائیوٹ ٹیوٹر ءُ کراچی گرامر اسکلول ءَ سرجم کُتگ۔ بلوچستان ءَ شہمیں وانگی بندوبست نہ بوھگ ءِ سوب ءَ اکبر خان ءِ کسانی ماں کراچی ءَ گوستگ۔ بندات ءَ آئی ءَ میجر برچ ءِ لوگءَ ءُ پدا آئی ءَ قاضی ءِ گس ءَ ایلیسا قاضی ءِ نگہبانی ءَ کسانی گوازینتگ۔ اکبر خان ءِ گیشتریں وانگ ایچی سن کالج ءَ بوتگ۔ اکبر خان کرکٹ ءُ اوژناگری ءِ زبریں لیبی یے بیت ءُ کالج ءِ ٹیم ءَ ھوار پنجاپ ءِ ٹورنمنٹاں گوازی کنت۔ 1939 ءَ میر محراب خان ءِ مرگ ءَ پد اکبر خان بگٹی کُٹم ءِ سردار نامینگ بیت۔ اے زمانگ ءَ اکبر خان ءِ اُمر سک کسان بیت تہ ھمے واستہ داں اکبر خان ءِ مزن بوئگ ءَ آئی ءِ پت ءِ ناکوزتک خان بہادر جمال خان نگران سردار گچین کنگ بیت۔ اکبر خان وتی گوست ءَ دوبر یات کنت گُڑا گُشیت کہ ھمسنّتیں ھندوستان ءِ سیاسی چست ءُ ایرانی ساناں ما ھم نہ رکّیتگ ایں۔ اکبر خان 1944 ءِ زمانگ ءَ ھندوستان ءِ شہر شملہ ءَ بیت، گُڑا اے زمانگ ءَ گاندی ءُ سبھاش چندر بوس ھندوستانی جنز ءِ تلّو ءَ گیش نامدار بنت۔ چندر بوس ءِ جار ءَ پد ھندوستان ءَ جنگ بیت ءُ ریلانی پٹڑی پروشگ بنت گُڑا اکبر ھمے عمل ءَ چہ سان زُور ایت ءُ ھمگنگلانی پجّی ءَ کالکا ءُ شملہ ءِ نیامی پٹڑی ءَ سرنگ ءِ نزّیک ءَ سنگ ایر کنت، اِشی ءَ پیش کہ ریل اِشانی ایر کتگیں ڈوکانی سوب ءَ چپّی بہ بیت، پیسر ءَ ریل بریک کنت۔ اِشانی اُرش وَ بے سوب بیت بلے قاضی ساب پہ زور اِشاں پولیس ءِ دست ءَ دزگیر بوئگ ءَ دار ایت۔ کرکٹ ءُ اوژناگری ءَ بلدیں اکبر خان ءِ کسانی ازگاریں گونڈلے ءِ ھساب ءَ گوز ایت۔ ھر ھما آسراتی کہ ھمسنّتیں ھندوستان ءِ راجا، نواب، سردار ءُ وڈیرھانی زھگاں رستگ اَنت، اکبر خان ءِ نام ھم ھمے لڑ ءَ ھوار انت بلے مارا گوں اے زمانگ ءِ اکبر خان ءَ بازیں دست ءُ داوا نیست۔ ھمے ھاترءَ ما آئی ءِ سیاسی زند ءِ کسّھاں گوں وت ءَ را دلگوش کن ایں ءُ اکبر خان ءِ زانگ ءِ جھد ءَ کن ایں۔
اکبر بگٹی بلوچ سیاست ءِ تلّو ءَ
اکبر خان اوّلی براں کہ سیاسی چِست ءُ ایرءُ پیسلہ سازی ءِ بہر بیت، آ 1947 ءِ کوئٹہ میونسپلٹی ءُ شائی جرگہ ءِ نیمگ ءَ پہ پاکستان یا ھندوستان ءَ ھوار بوئگ ءِ ریفرنڈم بیت۔ اکبر خان ءِ رد ءَ مئے گور ءَ سئمی گچین نہ بوھگ ءِ سوب ءَ ما پاکستان پہ باندات ءَ گچین کتگ۔ 1948 ءَ بیورکریٹک نوکری ءِ ھاترا تربیت زُوروکیں اکبر خان 1950 ءِ زمانگ ءَ گورنر جنرل ءِ مشاورتی مجلس (ایڈوائزری کونسل) ءِ بہر کنگ بیت ءُ تعلیم، جان سلامتی ءُ رسانکدر بہرگ ءِ وزیر گچین کنگ بیت۔ اے میان ءَ اکبر خان روکپتی پاکستان ءِ گچین کاریاں بے سوبیں بہر زوریت۔ 1957 ءَ اھمد یار خان زورگپتیں کلات استان ءِ دوبر بحالی ءِ واب ءَ گند ایت۔ اے واب ءِ سرجم کنگ ءِ ھاترءَ اکبر خان ھم تچ ءُ تاگ کنت، ڈیرو ءِ بلوچ سرداراں رازی کنت، سردار کراچی ءَ کاینت ءُ اھمد یار ءِ پجّی ءَ اسکندر مرزا ءِ گوما نند ءُ نیاد کن انت۔ بلے ھاکم ءِ تب ءُ واھشت اڑاند بنت۔ اھمد یار ءِ سرداراں کلات دوبر نہ رس ایت بلے اسکندر مرزا ءِ کُوکار ءُ جاک الّم رس اَنت۔ ون یونٹ برجاہ اِنت ءُ اِشی ءِ ھلاسی ءِ تچ ءُ تاگ ھم برجاہ انت۔ اکبر خان ھمے تچ ءُ تاگانی نیام ءَ ریپبلیکن پارٹی ءِ باسکی زور ایت۔ ھمے دور ءُ باریگاں اکبر خان ءَ فیروز نون ءِ وفاقی کابینہ ءَ وزیر مملکت برائے دفاع ءُ کمّو وھد ءَ پد وزیر مملکت برائے داخلہ ءِ وزرات رس اَنت۔ بلے وزیری ءِ مال ءُ متاہ داں دیراں اکبر خان ءِ بہت ءَ نہ بنت۔ 7 اکتوبر 1958 ءَ پوج مارشل لا جنت ءُ فیروز نون ءِ سرکار ھلاس کنگ بیت۔ ھمے دور ءُ باریگاں ھان کلات اھمد یار دزگیر کنگ بیت گُڑا اھمد یار ءِ دزگیری ءِ بگیری ءَ واجہ نوروز خان گھگیری کنت۔ بلے دلیریں نوروز خان ءَ قرآن ءِ سرءَ بستگیں دروگ چہ کوہ ءَ ایر گیج اَنت ءُ واجہ نوروز گوں ہمراھاں دزگیر کنگ ءُ زندانی کنگ بیت۔ اے کسّہ ءُ عمل بلوچ جنز ءُ بلوچ گہگیری ءِ بنّکی راجدپتری کسّہی ءِ بستار ءَ یاد دارگ بیت۔ من اسل ءَ گُشگ لوٹگ ءَ اتاں کہ ھمے زمانگ ءَ اکبر خان ھم دزگیر کنگ بیت، مَچ جیل ءَ آ مُدتے گوازین ایت ءُ واجہ نوروز خان ءَ سکّ نزّیک ءَ گند ایت۔ اکبر خان وش بھتے بیت کہ آئی ءِ ”مرگ ءِ سزا“ عمرِ قید ءِ تہ ءَ مٹ بیت ءُ اکبر خان مَچ زندان ءَ کشّگ بیت ءُ حیدرآباد زندان ءَ برگ بیت۔ من اے داوا کت نہ کن آں کہ واجہ نوروز ءِ جھد ءَ اکبر خان ءِ سیاسی بالاد چوں سانمند کتگ۔ البت واجہ نوروز ءِ دلیری ءُ تمردی اکبر خان ءَ سانمند کن انت ءُ دومی اِش کہ پہ اے جیڑہ ءَ پد اکبر خان ءِ سیاسی نزّیکی گوں آ زمانگ ءِ اربابِ ثلاثہ (بلوچستان ءَ 1970 ءِ زمانگ ءَ نیپ ءِ سئے راھوشون گوس بکش، ھیر بکش ءُ عطا اللہ مینگل اربابِ ثلاثہ ءِ نام ءَ زانب بیتگ اَنت) ءِ گوما بیت۔
اے زمانگ 1962 اِنت، روکپتی پاکستان اسمبلی ءِ ھاترا بلوچستان ءِ دو سیٹ اَنت، کوئٹہ ڈویژن ءُ قلات ڈویژن۔ اے ھمے زمانگ اِنت کہ بلوچ سیاسی تلّو ءَ پارلیمانی سْیاست وتی بنّکی گاماں ایر کنان اِنت۔ گچین کاریاں عطا اللہ مینگل چہ قلات ڈویژن ءِ ھاترا وتی کاگداں جمّ کنت ءُ بہ گُپت ئے اکبر خان کہ ھیر بکش مری پہ کوئٹہ ڈویژن ءِ ھاترا گُشگ بیت۔ بلے ھیر بکش نہ منّ ایت۔ بازیں جیڑھانی تہ ءَ ھیربکش زاھری جیڑھے دیم ءَ کار ایت۔ آ گچین کاریانی ھاترا زرّ ءُ مال ءِ کمّی ءِ جیڑہ بیت۔ عطا اللہ، گوس بکش ءُ اکبر خان پہ گچین کاریاں ھیربکش ءَ رازی کن انت ءُ گچین کاریاں عطا اللہ ءُ ھیربکش سوبین بنت۔ سیاسی چست ءُ ایر، صوبائی حق، زِر ءُ مڈّیانی اوگامانی زمانگ ءَ اکبر خان ءِ سیاسی سنگتی گوں ”ارباب ثلاثہ (گوس بکش، ھیر بکش ءُ عطا اللہ مینگل) “ ءَ ودّان ودّانن ءَ سک پُھتگ بیت۔ اے زمانگ ءَ اکبر خان ایوب خان ءِ پابندیانی سوب ءَ دہ سال ءَ گچین کاریانی ھاترا نااہل بیت بلے آ بلوچ سیاست ءِ گہیں نامانی سیاسی چست ءُ ایراں چہ وت ءَ نااہل نہ کنت۔ ایوب خان ءِ مارشل لا اِنت، سیاسی تلّو گرم اِنت برے ایوب خان سیاسی مچّی اڈ دنت ءُ برے بلوچ راجکار۔ اے دورانیہ ءِ سیاسی تلّو ءَ ایوب خان ءِ شالکوٹ جلسہ ءَ پد ءُ پیش بلوچ سیاستدان جلسہ کن اَنت، جلسہانی درچ گیش بوان بیت ءُ داں ککری گراؤنڈ لیاری ءَ سر بیت۔ گُڑا 18 اگست 1962 ءَ لیاری جلسہ ءِ تمبو دور دیگ بنت، اسپیکر پروشگ بنت ءُ اکبر خان، گوس بکش ءُ عطا اللہ مینگل زندانی کنگ بنت۔ اکبر خان، ھیر بکش ءُ عطا اللہ مینگل ءِ سرداریاں استان ھلاس کنت۔ آھانی جاہ ءَ نوکیں سردار کار ایت ءُ مھلوک استان ءِ گچین کتگیں سرداراں کُش ایت۔ وھد ءِ روانی ءَ ایوب خان ءِ ھاکمی ھلاس بیت ءُ ھاکمی ءِ نوکیں ھدابند یحیی خان بیت۔ یحیی خان ءِ گوما گوس بکش، ھیربکش، عطا اللہ ءُ اکبر خان نند ءُ نیاد کن اَنت۔ ون یونٹ ھلاس کنگ بیت ءُ نوکیں گچین کاریانی جار پرینگ بیت۔
یحیی خان ءِ گچین کاری ءُ بلوچستان ءَ نیشنل عوامی پارٹی (نیپ) ءِ وجود کم کم ءَ اکبر خان ءَ یکبرے گوں اربابِ ثلاثہ ءَ ھوار کنت بلے میزان میزان ءَ اے ھواری تْرپش ءُ تہلیں یاتاں گوں دُوری ءُ بیر گیری ءِ آسر ءَ کیت ءُ مِک بیت۔ اَردیں بلوچستان ءَ نیپ ءِ تلّو ءَ گچین کاریانی ھاترا کئمپین بیت گُڑا اکبر خان تچ ءُ تاگانی بہر بیت، نیپ سوبین بیت ءُ بلوچستان ءُ پختونخواہ ءَ جمیعت علما اسلام ءِ ھواری ءَ سرکار جوڑ کنت۔
اکبر خان گِلگ کنت کہ اگاں گچین کاریانی دور ءُ باریگاں منی سرءَ گچین کاریانی تہ ءَ بہر بوئگ ءِ پابندی بوتگ بلے یحیی خان ءَ ھر ھما مردمانی سرءَ پابندی ھلاس کتگ کہ آھاں پنچ سال ءِ سزا سرجم کتگ۔ اکبر خان ءِ بُنکی گِلگ ھمے بیت کہ اے دورانیہ ءَ سیاستدان کہ وتی پابندیاں چہ آجو بوان بوتگ گُڑا مئے سنگتانی یحیی خان ءِ ھواری ءَ بازیں دیوان ھم بوتگ۔ بلے سنگتاں منی پابندی ءِ ھلاسی ءِ ھاترا گوں یحیی خان ءَ دزبندی نہ کتگ۔ اکبر خان اے ھم گُش ایت کہ پوجی بریگیڈئیرے ءَ من ءَ گُشتگ کہ وتی سزا ءِ ھلاسی ءِ ھاترا الیکشن کمیشن ءَ نبشتھی دزبندی یے بہ کن ءُ وتی سزا ءَ ھلاس بہ کنائین بلے اے کار ھم من نہ کتگ۔ اکبر خان اے زمانگ ءِ دو سے دگہ انچیں جیڑھاں یات کنت کہ آھاں اکبر خان چہ نیپ ءُ اربابِ ثلاثہ ءِ گوما دُور کنان کتگ۔ اکبر خان وتی گلگدارے ءَ وت گُش ایت کہ من نیپ ءَ کدی ھم باسکے نہ بوتگ آں بلکیں دوزواھے بوتگ آں بلے نیپ ءِ بُنجائی دیوان ءَ اَردیں محمود عزیز کُرد ءُ زمرد ھسین اکبر خان ءِ ھواری ءِ سرءَ ایراد گِر اَنت گُڑا اکبر خان دیوان ءَ یل وَ دنت بلے سنگتانی گوما دِل چِل بیت۔ اردیں شیخ مجیب ءِ گوما اکبر خان ڈھاکہ ءَ نند ءُ نیاد کنت گُڑا نیپ ءِ سروک اکبر خان ءِ دیوان ءَ پارٹی بُنیاد ءَ وتیگ نہ کن اَنت۔ ھمے وڈ ءَ 16 دسمبر 1971 ءَ اردیں بنگلادیش آجو بیت گُڑا ھمے شپ ءَ اکبر خان بنگلادیش ءِ آجوئی ءَ وش اَتک کنان ءَ شالکوٹ ءَ روانکے کشّ ایت بلے بہ گُپت ئے اکبر خان کہ نیپ سرکار ءِ صوبائی وزیر تعلیم میر گل نسیر پریس کانفرنس کنت ءُ گُش ایت کہ نیپ ءَ گوں اکبر خان ءِ روانک ءَ ھچ سیادی نیست۔ سیاست ءِ گرمیں چِلگ جنزان کن انت ءُ یکروچے زولفقار بھٹو، اکبر خان ءَ پیپلز پارٹی ءَ ھواری ءِ سَلہ جَنت بلے اکبر خان نہ منّ ایت بلے بھٹو ءِ دگہ سَلہ یے اکبر خان ءَ ” ھئو“ ءِ نیمگ ءَ بارت۔ آ سَلہ روس ءِ ترّ ءُ گرد ءِ بیت۔ اکبر خان ءِ رد ءَ چہ اے سَلہ ءَ من بندات ءَ بھٹو ءِ نیت زانت نہ کتگ بلے روس ءِ روگ ءَ پد مدان مدان ءَ من سما کنان کتگ کہ بھٹو ءِ نیت سیاسی اِنت۔ اکبر خان روس ءُ لندن ءَ کساس دہ ماہ گوازین ایت گُڑا ھمے دورانیہ ءَ نیپ ءِ صوبائی وزیر خزانہ ءُ اکبر خان ءِ برات اھمد نواز لندن ءَ رؤنت۔ اکبر خان ءِ گوما دیوان کنت ءُ نیپ ءِ بُنجائی سروکانی کلوہ ءَ سر کنت۔ نیپ ءِ بُنجائی سروک گُش اَنت کہ مارا شک اِنت کہ اکبر خان، بھٹو ءِ ھواری ءَ مئے سرکار ءِ ھلاپیں پندلاں گون اِنت گُڑا اکبر خان گُش ایت کہ من اھمد نواز واتر دیم داتگ ءُ گُشتگ کہ تو وتی وزارت ءَ یل بہ کن ءُ بلوچستان ءَ نیپ ءِ سر وزیر سردار عطا اللہ مینگل ءَ بُگُش کہ پیسر ءَ من پندلاں ھوار نہ بوتگ آں بلے نوں الّم بنت۔ اھمد نواز واتر بیت۔ آ وتی وزارت ءَ وَ یل نہ کنت بلے ھمے زمانگ ءَ بھٹو نیپ ءِ سرکار ءَ استان ھلاپ بوئگ ءِ بُھتام ءَ جنت ءُ سرکار ءَ ھلاس کنت۔ اکبر خان شالکوٹ ءَ واتر کیت۔ وتی کوھنیں سیاسی سنگتانی گوما بیرگیری ءِ نیّت ءَ 15 فروری 1973 ءَ بلوچستان ءِ گورنری ءِ سوگند ءَ زُور ایت۔
نوں بلوچ سیاسی تلّو یک انچیں چارراھے ءَ اوشت ایت کہ نیپ ءُ اکبر خان یک انچیں جنگے بِنا کن اَنت کہ آ بلوچ سیاسی تلّو ءَ ھواریں مھلوک ءَ وت ماں وتی ” کنفیوژن“ ءَ دور دینت۔ بگٹی چی بہ کن اَنت، مری چی بہ کن اَنت، مینگل چی بہ کن اَنت ءُ بزنجو چی بہ کن اَنت؟ کے کئی ھمراہ بہ بیت؟ یک نیمگے بلوچ مھلوک اِنت دومی نیمگ ءَ سرکار ءُ نیامجی ءَ اکبر خان ءِ بیر گیری ءِ واھشت۔ اے دورانیہ ءَ جاھے سلاھبندیں جنگ اِنت، جاھے سروک زندانی اَنت، سرفیس ءَ کریک ڈاؤن اِنت ءُ میانجی ءَ اکبر خان گورنر اِنت۔ اے یک اَنچیں آسے ءِ کسّہ اِنت کہ ترّ ءُ ھشکی ءِ سیمسرءَں ھما دست سوچان ءُ روان اِنت۔ اے زمانگ ءَ اکبر خان ءِ گپ ءُ ھبر چہ پیسریگیں اکبر خان ءَ چٹ جتا اَنت۔ اے دورانیہ ءَ اکبر خان ءِ زبان نہ تحریکی راز دار ایت ءُ نئیکہ آئی ءِ عمل تحریکی ءِ لوٹ ءُ گزراں پیلو کنت۔ عراقی سفارتخانہ ءَ بھٹو توپک شوھاز ایت گُڑا اکبر خان گُش ایت کہ اے ” بلوچ ناشرکارانی“ سِلاہ اَنت ءُ اے ملک ءَ پروشگ لوٹ اَنت۔ اکبر خان داوا کنت کہ 60 ءِ دھک ءَ آجوئی گل ءِ نام ءَ چیریں گلے جوڑ بوتگ کہ آئی ءِ مکسد بلوچستان ءِ وتواکی ءُ وتواجھی ءِ گرگ بوتگ۔ نیپ ءِ بابت ءَ گُش ایت کہ اے استان ءِ ھلاپ ءَ کار کنگ ءَ اِنت۔ اکبر خان لاہور ءِ موچی بند دروازگ ءَ جلسہ کنت۔ دری مردماں جنز ءُ جنز ءِ راز ءُ پیچ ءُ تاباں چہ آژنا کنت۔ بلوچستان ءَ پوجی آپریشن بیت ءُ آئی ءِ جواز دیوک بلوچستان ءِ گورنر اکبر خان بیت۔ اے انچیں زمانگے، انچیں وت ماں وتی جنگے کہ وتی آتراپ ءِ کلّیں شئیاں نزور کنت۔ اے جنگ ءَ دوئیں نیمگ ءِ لیبیانی پشک ءَ بلوچ گور ءَ کن انت ءُ درآمد تماشہ چار اَنت۔
اے دْرچ دہ ماہ ءَ جنز ایت۔ اے دھیں ماھاں اردیں اکبر خان ءِ زھرگ ھلاس بیت۔ آ گورنری ءَ یل کنت بلے ھمے زھرگ ءَ چہ درکپتگیں جست اکبر خان ءَ داں اُمر گُنگ کن اَنت۔ زی ئیں گپ، داوا ءُ عمل اکبر خان ءَ انچیں سیمسرے ءَ سر کن اَنت کہ اکبر خان وتی گوست ءِ کارپدانی جواز ءَ کدی ھم دات نہ کنت۔ پہ درور اردیں اکبر خان نیپ سرکار ءِ ھلاسی ءَ پد بلوچستان ءَ بوتگیں پوجی آپریشن ءَ یات کنت گُڑا گُش ایت کہ پوجی آپریشن ءِ سوب ءَ ھزارانی کچّ ءَ بلوچ مھلوک ءِ مال ءُ دلوت برگ بوتگ اَنت، لوگ ڈورینگ بوتگ اَنت، کشار ماندارگ بوتگ اَنت ءُ مھلوک در پہ در کنگ بوتگ انت۔ اھوالکار جست کنت کہ پوجی آپریشن تئی گورنری ءِ زمانگ ءَ بندات کنگ بوتگ ءُ تو پوجی آپریشن ءِ رندگیری کتگ۔ اِشی ءِ جواب ءَ اکبر خان مانگیشتگیں پسوے دنت ءُ گُش ایت ” آ وھد ءَ من ھرچی کتگ بلوچ ءِ نپانی پھازگ ءِ بنیاد ءَ کتگ ءُ اگاں من مہ کت ایں گُڑا بلوچ اِشی ءَ چہ مستریں جیڑھانی دیمپان بوتگ اَت“۔ بلے ھمے یکیں گلگدار ءَ اکبر خان ھپتاد ءِ بلوچ گہگیری ءِ پلہ مرزی ءَ ھم کنت ءُ گُش ایت کہ اے ردیں کارے نہ بوتگ۔ ھمے گلگدار ءَ دیم ءَ بران ءَ اکبر خان گُش ایت کہ من پوجی ایکشن ءِ پلہ مرز نہ بوتگ آں بلکیں من اَسمبلیانی پروشگ ءُ نوکیں گچین کاری کنگ ءِ شور داتگ بلے بھٹو ءَ منی ھبر نہ زُرتگ۔ اکبر خان ءِ کرّا نیپ سرکار ءِ ھلاسی ءِ سنگینیں جواز نیست۔ اکبر خان گُش ایت کہ نیپ ءِ زمانگ ءَ لاقانونیت ءُ کرپشن بوتگ، بلے اے جواز ءِ سابت کنگ ءَ بے سوب بیت کہ نیپ استان ءِ ھلاپ ءَ کار کنگ ءَ بوتگ۔ 80 ءِ زمانگ ءَ وتی گلگدارانی تہ ءَ اکبر خان نیپ سرکار ءِ ھلاسی ءِ جواز بزاں عراقی سفارتخانہ ءَ دراتکگیں سِلاھانی ھم جواز ءَ دات نہ کنت۔ اھوالکار ءِ جست کہ تو نیپ سرکار ءِ سرءَ عراقی سِلاھانی کیس کنائینتگ گُڑا اِشی ءِ پسو ءَ اکبر خان گُش ایت کہ ” من کراچی ءَ بوتگ آں ھال اتکگ کہ عراقی سفارتخانہ ءَ سِلاہ دست کپتگ اَنت، عراقی سفیر ءَ گُشتگ کہ دراتکگیں سِلاہ بلوچستان ءِ جنزوکیں جنز ءِ ھاترا نہ انت“۔ اکبر خان گُش ایت کہ من وتی گورنری ءِ زمانگ ءَ شوکیں کار نہ کتگ بلے اھوالکارے جست کہ بلوچستان ءِ گورنر بوئگ ءِ زمانگ تئی سیاسی بالاد ءِ سرءَ پولنگے نہ اِنت۔ اشی پسو ءَ گُش ایت کہ ” الّم نہ اِنت“۔ گورنری ءَ چہ دزکش بوئگ ءِ بابت ءَ گُش ایت کہ اردیں پوج اَتکگ گُڑا سیول انتظامیہ ءِ واک مدان مدان ءَ ھلاس کنگ بوتگ انت ءُ پیسلہ سازی ءِ واک صوبہ ءَ چہ وفاق ءِ دست ءَ شتگ۔ ھمے ھاترا من دزکش بوتگ آں۔
اکبر خان ءِ سیاسی سپر ءِ بندات ءُ آسر گورنری ءِ زمانگ ھم نہ اِنت بلکیں اے سپر وتی دراجی ءِ پجّی ءَ بازیں پیچ ءُ تابانی آماچ بوان بیت۔ ھشتاد ءِ زمانگ ءَ اکبر خان جمہوریت وطن پارٹی ءِ نام ءَ نوکیں سیاسی پارٹی ءِ جوڑشت ءَ ایر کنت ءُ اِشی ءِ وسیلگ ءَ پارلیمانی سیاست ءِ سپر ءَ برجاہ دار ایت۔ ھشتاد ءِ گُڈی زمانگ بزاں 1988 ءَ اکبر خان بلوچستان نیشنل الائنس ءِ گوما ھواریں سرکارے جوڑ کنت ءُ بلوچستان ءِ سر وزیر گچین کنگ بیت۔ اے زمانگ ءِ اکبر خان وفاق ءُ صوبہ ءِ نیامی سیادیانی اڑ ءُ جنجالانی دیمپان اَت۔ اکبر خان برے صوبائی وت واجھی ءِ لوٹ ءَ کنت، برے زِرّ ءُ مڈّیانی سرءَ وت وتواکی ءِ لوٹ ءُ برے بُنجائی سرکار پیپلز پارٹی ءِ ” پیپلز ورک پروگرام“ ءِ سرءَ ایراد گیپت۔ اے سپر روان کنت ءُ اے سپر کہ گیش یات کنگ بیت، بلکیں سپر ءِ ھما کِشک ءَ اکبر خان گیش یات کنگ بیت، آ 2000 ءَ پَد ءِ زمانگ اِنت۔ اے زمانگ ءِ اکبر خان یک اَنچیں کسّہ ئے ءِ ھُدابند بیت کہ آ زمانگ ءَ سانمند کنت کہ آ نوکیں یادداشتے پہ وت ساز ایت۔ آ سبز ءُ سُہریں موسم ءَ دوبر زندگ کنگ ءِ ھاترا بلوچ ءَ کمک کنت۔
اکبر خان ءِ گڈّی کسّہ
اکبر خان ءِ سپر وتی گُڈی سیمسراں یک انچیں کسھی ءِ بنگیج ءَ کنت کہ آ کسہ گوست ءِ کلیں کسھاں چہ یکشل ءَ جتا ءُ زورآور بیت۔ اے بری سرکار اکبر خان ءَ وتی کوھنیں سنگتانی لڑ ءَ وت ھوار کنت ءُ اکبر ھما سئمی سردار بیت کہ آئی ءِ سرءَ پدمنتگی ءِ بھتام لگ اِیت۔ اے بھتام ءَ بلوچ نہ جن اَنت، بلکیں سرکار جنت۔ اے بری ئیں سرکار ءُ اکبر خان یکیں سرپ ءِ نہ اوشتگ ءِ سوگند ءَ ور اَنت ءُ اے سوگند ءَ ھم کسھے گون اِنت، کہ آ ڈاکٹر شازیہ خالد ءِ کسہ اِنت۔ سندھ ءَ چہ اَتکگیں اکبر خان ءِ مہمان ءِ کسہ کہ آ بلوچ زمین ءِ سرءَ ”سیاہ کاری“ ءِ نشانگ کنگ بیت ءُ میار باریں مرد ءَ سرکار بے میار کنت۔ اے کسہ بلوچ ءِ اخلاقیات ءِ سرءَ اُرشے پھمگ بیت ءُ اِشی ءِ بگیری ءَ برے بلوچ گیس پائپ لائناں نشانگ کن اَنت۔ برے زھرشانی کن اَنت، برے سرکار اکبر خان ءِ پجّی ءَ بے سوبیں نند ءُ نیاد کنت بلے گڈسر ءَ ڈیرہ بگٹی پوجی آپریشن ءِ دیمپان بیت۔ 2005 ءَ مارچ ءِ آپریشن ءِ آسر ءَ اکبر خان چہ ڈیرہ بگٹی ءِ کلات ءَ لَڈ ءُ بار کنت ءُ وتی ھشتاد سالی ئیں بالاد ءَ میزان میزان ءَ کوہ ءَ سر کپ اَیت۔ کوہ گَردیں اکبر خان دمانے ھم وتی گوست ءِ آسرءَتیں زند ءِ ھاترءَ چماں نمبین نہ کنت بلکیں وتی سپر ءِ ”دومی بیر“ ءَ یک اَنچیں آپسرے ءَ سر کنت کہ آئی ءِ بہت ءَ بس نمیرانی پش کپ ایت۔ بندیں پیتی پش کپ ایت ءُ بندیں پیتی ءِ بار دیگ ءَ ڈیرہ بگٹی ءِ جاھمنند ھم پہ آیگ ءَ مکن کنگ بنت۔ بیا دمانے ھمے زمانگ ءِ اکبر خان ءَ چار ایں۔
کوہ گردیں اکبر خان ءَ ریڈیو بلوچی ءِ نیمگ ءَ اردیں جست گرگ بیت کہ سرکار ءِ بھتام اِنت کہ شُما دیمروئی ءِ ھلاپ اِت، گُڑا اِشی ءِ پسو ءَ اکبر خان گُش ایت ” کہ منی ھند ءَ چارسد پرائمری اسکول ھست، بیست ھائی اسکول ھست ءُ یک انٹرکالجے ءُ اِشانی ھواری ءَ نادْراھجاہ ءِ ھاترا ھم زمین ما وت داتگ اگاں ما دیمروئی ءِ ھلاپ بیتین ایں گُڑا مئے ھلک ءَ اے نہ بیتگ اَنت ءُ دومی گپ کہ سردار دیمروئی ءِ ھلاپ اَنت، مکُران ءَ وَ سردار نیست گُڑا مکُران ءَ چیا دیمروی کنگ ءَ نہ اِنت“۔ اکبر خان شگان جنت ءُ گُش ایت کہ اے ھمے ھند ءِ کسہ اِنت کہ سرکار اِد ءِ سروکاں دیمروئی ءِ مُنکر سرپد بیت۔ اکبر خان زمانگے یات کنت کہ بھٹو ءِ زمانگ ءَ جنرل ضیا ءَ گُشتگ، بلوچستان ءَ اسکول ءُ سڑک ءِ آسراتی نیست گُڑا من گُشتگ کہ چوش چیا نہ گُش ئے کہ ”پوجی بُنجل“ نیست۔ اسل چیز وَ بُنجل اِنت کہ اِشی ءِ وسیلگ ءَ شما وتی پَنجگاں مھکم کن اِت ءُ سڑک پوجی بُنجل ءِ مُھکمی ءِ یک وسیلگے۔ اکبر خان ءِ اے گپ ھیر بکش ءِ ھیالانی پلہ مُرزی ءَ کنت۔ چوشکہ ھیربکش ءَ ھم سڑک ءُ کمیونیکیشن انفراسٹرکچر ”کاؤنٹر انسرجنسی“ ءِ آپروچ ءِ نگاہ ءَ چار اِتگ اَنت۔ ریڈیو بلوچی ءِ گوما وتی گلگدار ءَ دیم ءَ بران ءَ اکبر خان سرکاری لیکہ کہ اے جُھد بگٹی کُٹم ءِ ھاترا بوئگ ءَ اِنت۔ اے پسو ءَ گُش ایت کہ ” مئے جُہد ھما بلوچ زِر ءُ مڈیانی ھاترا اِنت کہ آ من ءَ چہ ھزار میل دُور اَنت ءُ مئے جُہد بلوچ ءِ حقِ حاکمیت ءِ ھاترا اِنت“۔ بی بی سی اردو ءِ اھوالکار شفی نقی جامعی ءِ گوما گلگدار ءَ اکبر خان گُش ایت کہ سرکار مارا مئے زِر، مڈّی ءُ حقِ حاکمیت ءَ بدنت گُڑا ما سہل ءُ تران ءَ جاڑیگ ایں بلے حقِ حاکمیت چی یے ءُ اِشی ءِ گیِش اِتگیں دلیل نیست۔ اگاں حقِ حاکمیت ءِ بزانت راجی وتواجھی اِنت گُڑا اِشی ءِ ھواری ءَ ”زِر ءُ مڈّی“ ءِ کارمرزی ءِ بزانت چی انت؟۔ اکبر خان ءَ کدی ھم سہل ءُ تران ءِ دروازگ بند نہ کتگ۔ مشاہد ھسین سیّد ءُ چودھری شجاعت ھسین ءِ گوما اکبر خان ءِ بازیں دیوان بوتگ اَنت۔ بہ گُپت ئے مشاہد ھسین کہ بنجائی سرکار پہ شہمیں سُہل ءُ تران ءَ وت واھگدار نہ بوتگ۔ اکبر خان ھم گُڈسر ءَ ھمے سُہل ءُ تران ءِ ھاترا گُش ایت کہ” Please forget all that nonsense “۔ اکبر خان ءُ گوں بنجائی سرکار ءَ سُہل ءُ تران ءِ کِسھے باز نامدار اِنت کہ سُہل ءُ تران ءِ ھاترا اکبر خان داں شالکوٹ ءِ بالی پٹ ءَ وت ءَ سر کنت بلے اکبر خان ءَ را گشگ بیت کہ بالی گراب ھراب اِنت۔ بلے اردیں اکبر خان چہ بالی پٹّ ءَ واتر بیت گُڑا ھمے ھرابیں بالی گراب واتر بال کنت ءُ رؤت۔ اے تھنا بالی گراب ءِ ھرابی نہ انت کہ اکبر خان ءِ سُہل ءُ تران ءِ دیم ءَ اڑاند ودی کنت بلکیں اِشی سبب اکبر خان ءِ زمین ڈیرہ بگٹی بیتگ کہ یک اَنچیں پوجی آپریشنی ءِ دیمپان بیت کہ آئی ءِ تہ ءَ کئے مسلمان ءُ کئے ھندو کُل تیر ءُ راکٹانی زد ءَ کاینت۔ ڈیرہ بگٹی ءِ شمشان گاٹ ءُ کبرستان کل یکشلیں اَبیتکی ءِ گواہ بنت ءُ اے راکٹ داں گِھیں اکبر خان ءِ کلات ءَ ھم نشانگ کن اَنت۔ منیزے جہانگیر ءِ گوما وتی گلگدار ءَ اکبر خان استان ءِ سُہل ءِ تران ءِ سرءَ تژن جنت ءُ گُش ایت کہ ” سرکار سُہل ءُ تران وَ کنگ ءَ اِنت بلے تیر ءُ ٹوپانی دروشُم ءَ“۔ اکبر خان وتی کلات ءَ مٹ کنت ءُ تراتانی ءِ بالاد ءَ وتی نوکیں کلات جوڑ کنت۔ بہ گُپت ئے شائر؛ کوہ اَنت بلوچانی کلات۔
من اے ٹاپار ءَ انگت جت نہ کن آں کہ ڈیرہ بگٹی ءِ کلات ءُ تراتانی ءِ کلات ءِ نیامجی ءَ زندگیں اکبر خان کدی آجوئی پسندے بوتگ۔ من اے ٹاپار ءَ پمشکہ جت نہ کن آں کہ ھر دوئیں زمانگاں اکبر خان ءِ سیاسی گل، سیاسی تلّو ءُ سیاسی پروگرام یکشلیں دابے ءَ کدی ھم آجوئی پسندی ءِ گوائی ءَ نہ دینت بلے اَلبت اکبر خان ءِ گلگدار وڈے نہ وڈے ءَ یک چیر ءُ اَندریں وابے ءِ دَرائی ءَ الّم دینت۔ چوشکہ سہیل وڑائچ ءِ گوما وتی گلگدار ءَ اکبر خان جُست گرگ بیت کہ تو وتواجھی لوٹ ئے؟ گُڑا اِشی ءِ پسو ءَ اکبر خان گُش ایت کہ ” وت واجھی ھر کس لوٹ ایت”۔ ھمے وڈ ءَ شاہد مسعود ءِ گوما وتی گلگدار ءَ اکبر خان گُش ایت کہ اگاں بوت کنت بلوچ وتواجھی ءِ جُہد ءَ بہ کن اَنت۔ شاہد مسعود جست کنت کہ ایران ءِ دزچیر ءَ ھم بلوچستان ئے ھست، اِشی ءِ ھاترا شما جُہد کن اِت؟ گُڑا اکبر خان گُش ایت کہ ھستیں وھد ءَ ما اے جُہد ءِ پوزیشن ءَ نہ ایں۔
تراتانی ءِ سر کپگ ءَ پد مدان مدان ءَ ڈیرہ بگٹی ءِ تہ ءَ ھما مردم دوبر آباد بوان بنت کہ آ زمانگے ءَ اکبر خان ءَ لَڈ ءُ بار پرماتگ اَنت۔ چوشکہ اکبر خان ءِ ھلاپیں ٹَک بزاں کلپر سوئی ءَ آباد کنگ بنت۔ مسوری بیکڑءَ ءُ اھمدان رائیجی ڈیرہ بگٹی ءَ آرگ بیت۔ اے مردم اکبر خان ءِ ھلاپیں مردم بنت۔ اے اردیں ڈیرہ بگٹی ءَ واتر بنت گُڑا 24 اگست ءَ یک وتگڑیں جرگہ یے اڈ دینت ءُ اکبر خان ءِ سرداری ءَ ھلاس کن انت۔ اکبر خان ءَ ”راجی گدار“ نامین اَنت۔ 26 اگست 2006 ءَ اردیں اکبر خان ءِ مرگ ءِ ھال کیت گُڑا ھمے تاچینتگیں مردم بزاں جلال کلپر، طارق مسوری ءُ ھمدان بگٹی یک مزاکراتی کمیٹی ءِ اڈ دینت ءُ پیسلہ کن اَنت کہ ڈیرہ بگٹی ءِ تہ ءَ اکبر خان کَل کنگ وَ بہ بیت بلے جنازہ وانینگ مہ بیت۔ اِشانی پیسلہ ھمے بیت کہ اکبر خان ءِ کپن کنگ ءَ کہول ءِ دو مردم ءَ آیگ ءِ موکل بیت ءُ کپن کنگ ءَ پد ھمے مردم ڈیرہ بگٹی ءَ یل بہ کن اَنت۔ اے ندارگ ءَ گیشتر ھما مردم پدر اَنت کہ آ یا وَ سرکاری واکدار ءُ سپائیگ اَنت یا اکبر خان ءِ میت ءِ پیسلہ سازی ءِ ھاترا جوڑ بوتگیں مزاکراتی کمیٹی ءِ 21 ئیں مردم اَنت۔ بلوچ دپتر ءِ ھمے ندارگ ءُ ھمے پریم ءِ تہ ءَ اکبر خان ءِ ” پیتی بندیں جون“ بار دیگ بیت۔ اکبر خان ءِ جنازہ ءَ 17 مردم ءَ بہر زُورگ ءِ موکل رَس ایت ءُ ھمے ندارگ ءِ تہ ءَ سرکاری واکدار صمد لاسی، اکبر خان ءِ چَشمک، گڑیال ءُ بَٹواہ ءَ رسانکدر ءِ دیم ءَ پَدر کنت۔ اے ندارگ ءِ تہ ءَ اَجکھی ھبر اِش بیت کہ ٹوپ ءُ بمب اکبر خان ءِ نازُرکیں زند ءَ ھلاس کن انت بلے تیر ءُ ٹوپ چَشمک، گڑیال ءُ بٹواہ ءَ ھچ تاوان نہ رس ایت۔
اکبر خان ءِ کسہ سک مزن اِنت۔ آئی ءِ تہ ءَ بازیں کارستانی یات ھم مزن اَنت بلے اے میان ءَ من ءَ اھمد راشد ءِ اے دانک گیش دوست بیت کہ ” بلوچ یک اَنچیں ھندے ءِ واھند اِنت کہ اے ھند ءِ مردمانی زمین آیاں تُوپک ءِ وسیلگ ءَ پروش دیگ ءِ ھکّ ءَ نہ اِنت“۔ اکبر خان وتی کسہ ءِ کارست وت اِنت۔ الّم نہ انت کہ آ اکبر خان ءِ گوما کہ منی شُناسائی ھست اِنت۔ آ شُناسائی بلوچ ءِ ھم بہ بیت۔ بلوچ ءِ ھاترا اکبر خان یک باوستے ءُ اے باوست باید بہ مان ایت۔ اے باوست ءِ آسر ءَ من نہ زان آں بلے اکبر خان ءَ بلوچ زانتکار سبا دشتیاری ” شہیدِ اعظم“ ءِ نام ءَ یاد کنت۔ اکبر خان بلوچ سیاست ءِ تلّو ءَ ”اربابِ ثلاثہ“ ءِ نام ءَ اوں یاد کنگ بیت۔ 70 ءِ دھک ءَ بلوچستان ءِ گورنر اکبر خان عراقی سفارتخانہ ءَ درکپتگیں سِلاھانی سرءَ استان ءِ درشان ءِ پلہ مُرزی ءَ کنت بلے اردیں اکبر خان ءِ کسہ وتی گُڈی سیمسراں سر بیت گُڑا اے وھد ءِ گورنر بلوچستان اَویس گنی ٹاپار جنت کہ اکبر خان ءَ ھندوستان ماں اوگانستان ءَ وتی قونصل خانہ ءِ وسیلگ ءَ کمک کنگ ءَ اِنت۔ اویس گنی ءِ رد ءَ دژمن ءَ اوگان سیمسرانی وسیلگ ءَ اکبر خان ءَ 50 کروڈ ءِ سِلاہ داتگ۔ اے بُھتام اکبر خان ءِ سرءَ گُڈی بھتام بیت۔ چد ءُ پیش گورنری ءِ زمانگ ءَ اکبر خان بلوچ سیاست ءِ نیام ءَ ھم بھتام ءُ تژن ءِ ھکدار نامینگ بیت۔ ھیربکش مری اردیں اکبر خان ءَ یات کنت گُڑا گُش ایت کہ سوئی ءِ گیس اکبر خان ءَ پنجاہ سالی رازی نامگ ءِ بنیاد ءَ پاکستان ءَ را داتگ بلے راجدپتر گواہ اِنت کہ ھمایاں اکبر خان ءِ گیس وتی آسراتی ءِ ھاترا کارمرز کُت۔ ھمایاں اکبر خان گورنر کت ءُ سیاسی نپ چست کت۔ ھما مردم گُڈی زمانگ ءَ اکبر خان ءِ دژمن بوت اَنت ءُ اِشاں اکبر خان ءِ کُنٹ روچ ءِ سرءَ دور دات۔ بلے زان ئے گُڈسر ءَ ما زانت کہ اے مردماں گوں اکبر خان ءَ ھون ءِ سیادی نیست اَت، زمین ءِ سیادی نیست اَت ءُ زمینی راستیانی سیادی نیست اَت۔
