کتاب، کتاب نا رنگ آک و بساک

نوشتکار: صفیہ بلوچ

اگہ نن جہان ءِ خوانن و جوان وڑئٹ سرپند مرین گُڑا جہان ئٹ کتاب نا ارزشت بھاز گیشتر ءِ انتئے کہ کتاب نے ہر ہمو گڑا تیان سرپندی ایتک ہرافتے کسس نے پوہ کننگ کپک یا ہمو خیال آتا درشانی کننگ کپک گڑا دا کل آن زیات المی ءِ کے اول بندغ نا اُست ئٹی کتاب کن مہر مننگ المی ءِ انتئے کہ نا اُست ئٹی کتاب کن مہر مرو گڑا نی کتاب ءِ خوانوس و کتاب ئٹ ہرا خیالاک کہ درشان ءُ ادفتے جوان وڑئٹ سرپند مروس و گڑاس ہیل کننگ کروس۔ کتاب جہان ئٹی ہزار رنگ ئنا ارے، ولے ہمو کتاب ہراٹی کسرشونی مرے یاکہ نا خڑک آ مروکا شر و گندہ انگا ہر گڑا آن نے خنی کے۔ گڑا ہمو کتاب اسہ لُمہ ئسے نا ڈول آ مریک دنکہ لُمہ تینا چنا ءِ ہر وڑئنا دڑد و ڈکھ آن رکھنگ خوائک و مدام نے سرپند کریسہ پائک کہ ہرا گڑا جوان ءِ و ہرا گڑا گندہ ءِ، گڑا ہمو وڑ کتاب نے نا چاگڑد نا ہر چنکا بھلا گڑا تیان ہندن سرپندی تیک کہ نی تینا جوانی و گندئی تے پوہ مریسہ۔ اسہ ہندنو کتاب اس کہ نی ہرادے خوانس آدینک نا وڑ نیتون مروکا ناانصافی تے نشان ایتک و نی ہنداکان سرپند مریسہ کیسہ کہ کنتو دیخس تادی مننگ ءِ ولے بد بختی ئٹ ای ہمو تادی تا نیام ئٹ ہم وے سرپند اُٹ کل کنتون تادی مننگ ءِ۔

کتاب خواننگ بندغ ٹی چاہنداری ودی کریسہ کیک و ہر ہمو بندغ ہرا خوائک کہ اگہ ای ہر گِڑا آن سرپندی تخیو گڑا او کتاب آتیتون زیات خڑکی کیک جہان نا ہر بندغ کن المی ءِ کہ او کتاب خوانے۔ ولے اسہ بزگ ءُ راج ئسے کن بیرہ الّمی اف بلکہ اسہ کسر اس مریک کہ او مون آ ہِننگ و گام خلنگ کن اول ٹی تینے خوانے و تینا راج ءِ جوان وڑئٹ سرپند مرے۔

بزگ آ راج و کتاب:
جہان ئٹی بزگ ءُ راج بھاز ءِ و آجو مروکا راج آک ہم کیہیک ءُ، ولے اسہ آجو مروکو راج ئسے نا بندغ تیتون اِرا کسر مریک یا تینا راج ءِ مونی دننگ کن کوشست کیک یا گُڑا اسہ آسرات ءُ زند اس گدریفک دا اونا منشا و اونا جند ئنا اُست خواہی مریک کہ او دا اِرا کسر آن ہرادے گچین کے۔ انتئے کہ او اسہ آجو مروکو راج ئسے ٹی زند گدریفنگ ءِ، ہراڑے پین گڑاس مرے یاکہ مف اونا زند جوان مریک۔ ولے اسہ بزگ ءُ راج ئسے نا بندغ تیتون اِرا کسر مروف، انتئے کہ اُوفتیکن آجوئی آن بیدس پین ہچ ءُ کسر مفک گڑا اُوفتے ہر حال ئٹ کوشست کروئی تمک کہ او تینے کتاب خواننگ تون ہر حال ئٹ تفوک کیر۔ انتئے کہ کتاب ہمو راہشون ءِ کہ نے ٹی فیصلہ ہرفنگ نا لائخی ءِ ودی کیک کتاب نے ہمو کسر ءِ نشان تیک ہرا نیکن جوان و گچین مریک۔ کتاب بندغ آن اُونا خامی تے کشیسہ اودے جوان کننگ و سرپند کننگ کیک و کتاب بندغ ءِ سرپند کیک۔

اسہ آجو مروکو راج اس راج دوستی نا زی آ کتاب خوانپ اوڑکن بھلو مسئلہ اس مفک انتئے کہ اونا اسکول و خواننگ جاغہ تیٹی ہمو جند ئنا راج ئنا دیہاڑ و راج ئتون مہر ئنا زی آ خوانفنگ مریک اوفتے تینا راج ئتون مہر کننگ یا راج ءِ سرپند مننگ کن جتا ءُ کتاب خوانوئی تمپک۔ ولے اسہ غلام ءُ راج ئسے تون دن مفک اوفتے تینٹ تینا دیہاڑ ءِ خوانوہی تمک تینا راج نا دڑد ءِ سرپد مروئی تمک کوزہ گیر مدام بزگ آ راج ءِ تینا دیہاڑ ءِ خوانفیسہ اونا زی آ کوزہ کیک۔ ہمو بزگ آ راج ئنا شناخت ءِ ایسر کننگ نا جہد کیک ہمو راج نا مخلوق نا اُست آن راج دوستی ءِ ایسر کننگ نا کوشست کیک و مدام ہمو راج ئنا مخلوق ءِ خواننگ آن مر توننگ نا کوشست کیک کہ اگہ دافک خوانار تو ہر گڑا آن سرپد و پوہ مرور کہ اوفک اسہ جتا ءُ شناخت ئسے نا خواجہ ءُ۔ نے بیرہ تینا زات ئٹی خلیسہ نا مِلی ءِ کُنٹ کننگ نا کوشست کیک گڑا دا وڑ ئنا راج آتے تینا دیہاڑ، تینا راج، دود و ربیدہ، شخصیت آتے تینٹ خوانوئی تمک و اوفتے تینٹ کوشست کروئی تمک کہ کنتون انت مننگ ءِ و کنا زمہ واریک انت ءُ۔ دا کاریم تیٹی کتاب اسہ ہندنو کسرشون ئسے آن بار کسر نشان تیک اسہ راہشون ئسے آن بار نے پائک کہ دا کسر نیکن جوان و گچین ءِ و دا کسر نیکن خراب ءِ۔

بلوچستان نا مخلوق و کتاب:
بلوچ چاگڑد ئٹ کتاب نا بھلو ارزشت ئسے و بلوچ راج ئنا مخلوق کتاب ءِ اسہ لُمہ ئسے آن بار سرپند مریک۔ اگہ نن ہُرن بلوچستان ئٹ نیاڑی تا کتاب تون مہر ءِ گُڑا دنکہ اسہ نیاڑی ئس تینا چُنا تون مہر کیک کہ اُودے ہچ مف ہمو وڑ اسہ نیاڑی اس پائک کہ کنا کتاب نا اسہ پنہ اس ہم خراب مف۔ بھاز جاغہ تیا اسہ مسڑ اس ہندن مہر کیک تینا کتاب تون دنکہ اسہ لّمہ اس مسڑ ءِ تینا پائک کہ دا جوان وڑ ئنا کاریم اس افک و او کاریم آن اودے منع کیک اوفک پارہ کہ ننا زات ئنا خواست آتا انت اس کہ کائک کائے ولے کتاب ہچ وڑ ئٹ ننے آن ہنپ۔ و نن اسہ ورنا ئسے نا کتاب تون مہر ءِ ہرن گُڑا کتاب خواننگ ءِ تینا دے ئنا کُل آن جواننگا وخت سرپد مریک و کتاب ءِ تینا راج ءِ مونی دننگ و شونداری نا بھلو وسیلہ اس سرپد مریک و اسہ کماش ئسے نن ہرن کہ او امر زند ئٹی کُل آن زیات ارزشت ورنائی ءِ تیک ہمو وڑ بلوچ راج ئٹ اسہ کماش اس کتاب تون مہر تخک، ہندا وڑ اگہ نن اسہ چُنا ئسے ہُرن کہ او چنکی ٹی کُل آن گیشتر ارزشت پیسہ ءِ تیک کہ او گِڑا و بُگڑا ہلے ہمو وڑ اسہ چُناس کتاب تون مہر کیک کہ اوڑتون دہ روپئی مرے او سرپند مفک کہ کتاب دافتے آن زیات پیسہ خوائک ولے ہمو مہر مریک کہ او ہموفتے آن ہم کتاب ہلنگ کن بریک۔ بلوچستان اٹ کتاب نا ارزشت بھاز گیشتر ءِ و بلوچ مخلوق کتاب ءِ ہندن سرپند مریک دنکہ پارہ تعلیم بندغ نا مسٹمیکو خن ءِ ہرا نے جہان نا سرپندی کن کمک کیک ہمو وڑ کتاب ہمو مسٹمیکو خن ءِ انتئے کہ تعلیم بیرہ کتاب آتیان رسینگک۔

بلوچستان ئٹ کتاب نا پٹنگ:
بلوچ ءِ کتاب تون بھاز مہر ءِ ولے کُل آن بھلا بدبختی دادے کہ بلوچستان ئٹ کتاب نا ہچو ڈس اس اف دنکہ اسٹ اس ملاس مرے دیر پٹے ہمو وڑ کتاب تون مہر و مابت کروک آ بلوچ آک کتاب ءِ پٹیرہ ولے کتاب دافتیٹ خننگپک ہمو کتاب تون مہر کروک آ بلوچ راج کہ ہرافتے بیننگ کن چمپل اس مفک پُچ آک تا اگڑی و کپ کپ ءُ ولے تینا اسہ اسہ روپئی ءِ تینا کتاب آتیکن مُچ کریسہ کیرہ، دا ہمو کتاب نا مہر و مابت ءِ کہ کتاب خواننگ اوفتے تینا کُنڈا داخس چکک۔

داسہ نن برینہ دا گڑا نا زی آ گپ کینہ کہ بلوچستان ئٹ کتاب تو رسینگپک گڑا اینو بلوچ اسکان گڑاس کتاب امر سر مریرہ؟ اوڑکن ننے بلوچستان ئٹ خوانندہ غاتا بھلا تنظیم بساک ءِ سرپند مروئی خوانوئی و ہُروئی تمک۔

بلوچ اسٹوڈنس ایکشن کمیٹی:
دا ہمو تلہ ءِ ہرا بلوچ چاگڑد نا ورنا تا تربیت و بلوچ خوانندہ تا خواننگ نا تہٹی ہر ڈکھ و ویل ءِ جہان نا مون آ ہتیک اندنکہ اسہ کوٹی اس مرے و چار انگا کنڈ آن بند مرے نی ہچ سرپند مفیس کے ای انتئے بند اُٹ دا چارکنڈ انگا کمرہ ٹی۔ گڑا بساک ہمو کمرہ نا دیوال ءِ پِرغیسہ نے پیشن کشک نی خننگ بناء کیسہ و پوہ مننگ کیسہ کہ ای انتئے بند ئسٹ و کنے بندی کننگ نا سوب انت ءِ و کنے مونی انت کروئی ءِ کنا کاریم انت ءِ داڑے گڑا نی ہر گڑا ءِ سرپند مریسہ۔ ولے بساک کن بلوچ نا ڈغار آ کتاب مون آ ہتنگ و کتاب مُچی کننگ دن اڑزان متنے ہندن کہ چُک ئسے بندغ آک تینا مفاد کن خلیرہ بیدس گناہ آن، ہمو ڈول آ کتاب آتے بیدس گناہ آن۔ بلوچستان ئٹ ہراتم کہ بساک پوسکنا سال ءِ بخیر کننگ کن کتاب مچی نا پڑو ایتک گڑا بلوچ راج ءِ پد خلنگ کن کتاب آن مر کننگ کن کتاب تروک آتے کتاب آتیتون اوار زندان تیٹی تینا مفاد کن بند کننگک۔ دنکہ پوسکنا سال ءِ بخیر کننگ کن تیوہ غا جہان ئٹی خوشی تا چاگڑد اس مریک ہندا وڑ بلوچ مخلوق کن پوسکنا سال ئنا خوشی زرس کم و کتاب آتا خوشی زیات مریک بلوچ پوسکنا سال نا بھاز ودار ٹی مریک کہ ہمونا سوب آن کنے گڑاس پین کتاب رسینگو دا بلوچ ورنا تیکن بھاز گچینو سہب اس مرو۔ و نن اگہ ہرن خدو (2025) نا کتاب مچی تے گڑا او وار ہم بلوچ اسٹوڈنٹنس ایکشن کمیٹی پوسکنا سال ءِ بخیر کننگ کہ بلوچستان ئٹ کتاب کاروان نا پڑو ءِ خلک گڑا بک اسٹال آک برجاء مریسہ ہر دے اسہ جاغہ آ بک اسٹال لگاکہ اندا وڑ ایلو دے گڑا ایلو جاغہ آ لگاکہ۔ بساک نا ہمو جاغہ تیٹی کتاب اسٹال خلنگ نا کوشست ئس کہ ہرا جاغہ تیا اسل بساک جوڑ کروک اف، ہندن بُک اسٹال آک برجاء مسر۔ و ہراتم کہ گوادر نا واری بسک گوادر ٹی 20 جنواری 2025 آ اولیکو بُک اسٹال لگک گڑا پولیس نا لشکر اوفتا اسٹال آ چھاپہ خلیک کہ نم انتئے کتاب مُچی اڈ تسنرے، دیر آن موکل ہلکنرے؟ اوفتے پارہ کے دا بک اسٹال ءِ بند کبو بساک نا ورناک پارہ کہ دا کتاب ءُ و کتاب نا مُچی اڈ تننگ گندہ ءُ و رد قانودی ءُ کاریم اس افک کہ نم ننا بُک اسٹال ءِ ایسر کننگ خوائرے دا ہمو کتاب آک ءُ ہرافک پین جاغہ تیٹی آسانی ئٹ بہا مریرہ، ولے بلوچستان ئٹی دنو کتاب مخلوق ءِ تفیرے ویل اس افک ولے ننے الیبو نن تینا مخلوق ءِ تینٹ کتاب رسیفنہ ولے انتظامیہ اوفتا ہیت ءِ ہلپک او دا خواپک کہ بلوچ کتاب خوانے گڑا او ہمو بساک نا باسک آتیتون اوار کتاب آتے ہم جیل ئٹی بند کیک دا ہمو وخت ءِ کہ بلوچ نا جِند ہر وخت بے گناہ زندان تا گواچی مسنے ولے دا وار کتاب آک ہم زندان نا گواچی مریرہ۔ دا اسہ بھاز بھلو سوچنگ نا ہیت ئسے کہ کتاب ءِ زندان ئٹی بند کننگ نا سوب انت ءِ و بلوچستان ئٹ دُنو کتاب پٹنگ بھاز سخت ءِ ولے بساک نا بھاز اِنگا کوشست آتیان پد بُک اسٹال لگا ولے ہمو بندغ تیتون اوار کتاب آک ہم زندان نا گواچی مسر۔ پدا بھاز کوشست مس کہ کتاب و باسک آتے زندان آن کشنگے ولے انتظامیہ دا کاریم نا برخلاف ئسک گُڑا دا تادی نا برخلاف بلوچستان ئٹ برانز مُچی نا پڑو خلنگا۔ ہندا وڑ خضدار ئٹ ہم برانز اس کشنگ نا پڑو مس و برانز ٹی دا پاننگا کہ کتاب آتے بےگواہ کننگ بند کبو و تعلیم ننا حق ئسے خیرات اس اف۔ اسہ نیمہ غا ننا خواننگ نا حق ءِ ننے تننگ افس و ایلو پارہ غان اگہ ننا راج تینا جہد آن پد نن کن کتاب ہتیک گُڑا اوفتے کتاب آتیتون اوار انتئے زندان ٹی شاغنگ مریک؟ نن اگہ تینا مخلوق نا مہر ءِ ہرن گُڑا ننا مخلوق کتاب ئتون بھاز مہر کیک اگہ نن ہیت ءِ کین خضدار بُک سٹال نا گڑا خضدار ئٹی اولیکو دے بُک اسٹال پبلک لائبریری نا مُون آ لگا ہراٹی بھاز آ بندغ آک بریسہ کتاب ہلکر۔ اندنو بندغ ہم ئسک کہ ہرافتیتون کتاب ہلنگ کن پیسہ الوکہ ولے ہمو مہر اوفتے اندن خڑک کرے کہ اوفک وام کریرہ ولے تینکن کتاب ہلکرہ۔ ہمو چنکا چناک ہرافک کتاب خواننگ آن جوان وڑ ئٹ سرپند الوسر ولے مہر زیات ئسک کہ اوفک ہر کتاب ءِ ہرفیسہ اودے خوڑتی ئٹ ہُرارہ۔ ہمو پیر انگا کماش آتا مہر ہرافک کتاب ئٹ تینکن جوانو پگہ اس خنارہ ہمو ورنا تا مہر ہرافک تینا فیس تا پیسہ تیٹ کتاب ہلیسہ ئسر۔ کسس سیاست نا زی آ کتاب اس ہرفیکہ، کسس بائیوگرافی نا کتاب اس ہرفیکہ و کسس دیہاڑ ءِ ہرفیکہ ولے خواننگ نا ہمو جوزہ ہمو ورناتے تینٹ تینا پارہ غا چکسہ ہیسکہ۔ کنا خیال پائک کہ اگہ کس اس پائک کہ ای جہان ءِ سرپند مریو کہ جہان اینو ہرا جاغہ آ سر مسونے یا تو جہان ئٹی ودی مروکا ہر ڈکھ و خشحالی ءِ جوان وڑ ئٹ سرپند مریو یا کس پائک ای تینا ڈیہہ ءِ خوانیو تینا ڈیہہ ئنا ہمو خوش بخت آ بندغ آتے خوانیو و تینا ڈیہہ ئنا دیہاڑ ءِ خوانیو کہ کنا راج و کنا مخلوق اٹ وخت آن داڑے زند گدریفسہ ءِ کنا دیہاڑ اٹ وخت ئناسے، تینا ڈیہہ ئتون تفوک ہر گڑا ءِ خوانن سرپند مرین گڑا کتاب اسہ کسر شون ئسے آن بار بندغ نا کمک ءِ کیک۔ نے نا مزل اسکان سر کننگ ئٹ کتاب نا بھاز بھلو کڑد ئسے ہرادے ای اخس تینا ہیت آتیٹ درشان کیو کنے کم لگیک انتئے کہ دا اسہ بھلو کڑد ئسے دا اسہ بھلو کمک ئسے ہندا سوب آن اینو بلوچ چاگڑ نا ورناک کتاب تون بے کچ مہر کیرہ و تینا زند ءِ مون مستی دننگ کن کتاب آتے زیات ارزشت ایترہ۔