مادنیں راہ ءِ راہی ئیں سید ہاشمی
اُزیر بلوچ ( بساک ءِ بنجاہی کماش)
انسانی سسا وڑ وڑیں ہیال، واہشت، سِتک ءُ جتائیں مارِشتانی امبارے، چہ ہمے بنُبھراں آئی ءِ زِند جوڑ بیت ءُ ہما رنگیں زاتے ءَ گوں زِندگی کنت۔ اے زندمان ءَ روچے لکانی کچ ءَ مردم ودی بنت ءُ لکانی مِر اَنت، ہمک انسان ءِ وتی ہیالانی زِرے بیت، سپر کنان داں نیمراہے ءَ روت ءُ پدا مدامی سپر کنت۔ کسے وتی کارپداں چہ یات کنگ بیت ءُ پہ دیم ءِ باندات ءَ رہشونی ءِ کردارے ودی کنت گڑا کسے پہ مُپت اے جہان ءَ کئیت ءُ روت۔ ہمے انسانی ابرم ءِ راستی اِنت کہ ایشی ءِ تہ ءَ ما سُر ءُ پُرا ایں۔
دنیا ءَ بازیں انسان ودی بیتگ اَنت کہ آہاں راجمان ءِ ہستیں رواج نہ من اِتگ ءُ ہما رواج ءُ رھبندانی تہ ءَ نوکیت ءُ گہتری آرگ ءِ کوشست کتگ، اے ڈولیں مردم ہچ باریگ ءَ بندات ءَ منگ نہ بیتگ اَنت۔ روم ءَ گیوردانو برنو نامیں مردے کہ استال ءُ جہان ءِ سر ءَ گپ جنت ءُ گوش ایت کہ روچ اِستالے ءُ کُلیں استالانی کش ءَ سیارہ گردش کنگ ءَ اَنت ءُ جہان بے کیل اِنت، ہمے گپ ہما باریگ ءِ کانود ءُ مہلوک ءَ دوست نہ بیت ءُ برنو روم شہر ءِ چارراہ ءِ سر ءَ ماندارگ بیت۔ آئی ءَ پد گلیلیو وہدے زمین ءُ روچ ءِ کانودانی سر ءَ ھبر کنت ءُ نوکیں ہیالے دیم ءَ کاریت کہ روچ اوشتاتگ ءُ زمین آئی ءِ چپ ءُ چاگرد ءَ گردش کنگ ءَ اِنت، اے پہ آ دور ءِ مہلوک ءَ مزنیں گُناہی ہیالے لیکگ بیت، گڑا ہما دور ءِ چرچ آئی ءَ شزا دیے اَنت، بلے مدتاں پد آہانی کانود منگ ءُ زیرگ بنت کہ راستیں رھبنداں گوں ہم دپ اَنت، مرچی فزکس ءِ تہ ءَ ہوار لس بنیاد ءَ اے گپ منگ بنت۔ نتشے وہدے مورل ءُ اخلاقیات ءِ سر ءَ باوست کنت ءُ ہستیں انسانی رھبندانی سر ءَ گپ جنت گڑا ہما دور ءِ اکیڈمک ءُ راجمانی ادارہ آئی ءَ نہ من اَنت، آئی ءِ کتاب بھا نہ بنت ءُ وانگ نہ بنت بلے نتشے ءِ مرگ ءَ پد آئی ءِ ہیال ءُ لیکہ من اِتگیں ہیال لیکگ بنت کہ فلسفہ ءُ ادب ءِ تہ ءَ واناک ءُ منانکیں ہیال اَنت۔ میچل سرویٹس نامیں سائنس دانے وہدے انسانی بالاد ءِ تہ ءَ ھون ءِ تچگ ءُ دل ءِ سیادی ءِ سر ءَ گپ جنت کہ ھون چہ دل ءَ پمپ بیت ءُ بالاد ءِ ایدگہ جاہاں روت ءُ سر بیت گڑا آ گوں کتاباں شہر ءِ چارراہ ءِ سر ءَ ماندارگ بیت، آئی ءِ مرگ ءَ رند آئی ءِ کار تب ءِ پِڑ ءَ انسانی بالاد ءِ بابت ءَ کانود زیرگ بنت ءُ ہمک تب ءِ کتابانی تہ ءَ گواچنیں درونت اَنت ءُ مرچی کُلیں بنی آدم اے گپاں زانت ءُ منگ ءَ جاڑیگ اِنت۔
اے کِرداراں ہوار دگہ ہزارانی کچ ءَ مردم ہست اَنت کہ آہاں وتی دور ءُ باریگ ءَ نوکیں گواچنی ہیال آورتگ گڑا آہاں گنوک ءُ گژدال لیکگ بیتگ ءُ باز جاہاں آہاں جتائیں شزا دیگ بیتگ ءُ آ زِندہاتی ماندارگ بیتگ اَنت۔ مئے راجدپتر ءَ چوشیں مزنیں شزا ءِ کسہ بگندے کم اِنت بلے سید ءِ وڑیں کردار ہست اَنت کہ آہاں وتی دور ءُ باریگ ءَ گنوک ءُ گژدال لیکگ بیتگ، آہانی یکیں میار ہمے بیتگ کہ آہاں پہ راج ءُ مچانکی نپانی ہاتر ءَ جیڑ اِتگ ءُ عمل کتگ۔ مرچی ہمے کِردارانی برورد ءَ ہمک راجمان ءِ تہ ءَ گہتری اتکگ ءُ ہما راجمان ہمے جہد ءُ لیکہاں زیران ءَ وتی ہست ءُ باندات ءَ سمبہینگ ءِ جہد ءَ اَنت۔
سید ءِ پیمیں کردارانی سر ءَ نبیسگ ہمنچو گران اِنت کہ نبشتہ کار ءَ پہ آئی ءِ کردار ءِ تور کنگ ءَ تُرس بیت۔ بلے اے گپاں پد ہم چندے دانک کہ آئی ءِ کِردار ءَ یک درسدے بیت بہ کن اَنت درشانگ کرز اَنت۔ سید ءَ بگندے ما چو شائر ءُ بلوچ لبزانک کار ءِ رنگ ءَ یات کنیں، بلے آئی ءِ وانگ ءُ پہمگ ءَ پد آئی ءِ کِرد چہ اشاں بُرز تر یک سیاسی کواسے ءِ دروشم ءَ گِندگ بیت۔ سید بلوچی لبزانک ءِ ہمک نوکیں پھناتانی بُنہشت ایر کنوک اِنت، سید ءَ پیسر ہچ پھنات ءِ سر ءَ شہمیں نبشتہی کارے گِندگ نئیت یا من نہ دِستگ، بلوچی زُبان ءِ رھبند، بزانت بلد(سیدگنج)، گِدار، آزمانک، سپرنامگ، نِمدی ءُ ایدگرانی بنیاد ایر کنوک اِنت۔ آئی ءِ اے کار سیاسی کواسے ءِ چہرگ ءَ جن اَنت، چوشکہ آئی ءِ نبشتانک ءُ شئیرانی تہ ءَ گِندگ کئیت، برے آ گوں ورنایاں دیم پہ دیم اِنت، برے سیاسی مردمانی نِزوریانی سر ءَ نگد کنگ ءَ اِنت، برے لبزانکارانی ردیاں گشینگ ءَ اِنت، برے راجمانی جیڑہانی سر ءَ نبیسگ ءَ اِنت ءُ برے سیاسی چِست ءُ ایرانی تہ ءَ نبشتہی دروشم ءَ رہشونی کنگ ءَ اِنت۔
ورنایاں نیم بُندگیں کارانی سر ءَ آئی ءِ شئیر
سر سُچگ بے ننگی ءِ بے آسریں
پھک سُتکینے کہ پُر تئی سِرمُگ اِنت
اے شئیر ءِ تہ ءَ سید ہما نیم شلونگیں کارانی سر ءَ نگد کنگ ءَ اِنت کہ نیم شلونگیں کار شہمیں بروردے نہ دیے اَنت بلکیں کارے کہ بیت گڑا دلجمیں رنگے ءَ بہ بیت دانکہ سیت ءُ نپیں آسرے بہ دنت۔ اے نادراہی انچوشکہ گوست ءَ بیتگ روچ ء مرچی ہم گِندگ بیت پمے ہاتر ءَ بازیں جیڑہ ءُ جنجالے زانشتی دروشم ءَ گشینگ نہ بیتگ ءُ آہانی سر ءَ شہمیں دیدانکے نہ گواہ ایت۔
سید ءِ تہ ءَ دلپروشی ءِ وڑیں ہیال گِندگ نہ بیت بلکیں آ ہمے ہیالاں ایر جنت ءُ ورنا ءُ مہلوک ءَ پہ دیم ءَ جُنزینگ ءِ سکین دنت۔ انچوشکہ آ وت جہد کنگ ءِ ہاتر ءِ ھُدوناک اِنت ءُ کس یے ءِ بے سریں بٹاکاں کِمار کنگ ءَ نہ اِنت ءُ وتی مادنیں راہے گِپتگ روان اِنت، ہمے ھساب ءَ آ پہ ورنایاں چوش گوش ایت۔
ورنایاں سید نازین کہ دیم ءِ گُلیں اُوست اَنت
پیچ پتر ءَ پُرس ئیگ ءَ ایر منتگ ءُ ژندانی
راجمانی آشوب ءِ سر ءَ آئی ءِ اے شئیر بازیں چِزے گِشین ایت
دشت ءِ گرماگی شمالاں رُپت اِتاں
چنڈ اِتین اَنت اِش ماں مِسکیں کِلگَاں
پہ مڑاہ ہر پُرشتگیں پوڑ ءِ شما
نوکیں زِند ءِ نوکیں دہلاں جہ جتیں
دشت ءِ گرماگی شمال وہدے کئیت گڑا آ راجمان ءِ سرجمیں گند ءُ گسڑاں وتی تہ ءَ روپان کنت۔ سرجمیں میتگ ءُ کلگاں گولان ءَ آہاں چنڈین ایت۔ ہستیں زِند ءَ چہ نوکیں دہل جہ بہ جن اَنت ءُ نوکیں کِشکے بہ ساز اَنت۔ اے ہما مٹی ءُ آشوب ءِ گپ ءَ اِنت کہ آئی ءِ تہ ءَ ہمک وڑیں ترندی ءُ گرانی کئیت ءُ چہ ہمے گرانیاں نوکیں زِند جوڑ بیت۔ اے آئی ءِ ہما ہیال ءُ پِگر اِنت کہ ہمک راجمان ءِ کواساں پہ نوکیں مٹی ءُ گہتری ءِ ہاتر ءَ پہ وتی راجمان ءَ جیڑ اِتگ۔ چہ ہمے عمل ءَ آہاں وتی راجمان نہ تہنا رکینتگ بلکیں پہ گہتری ءَ دیمروئی داتگ۔
سید ہما دور ءِ سیاسی مردمانی سر ءَ نگد کنت ءُ آہاں گوش ایت۔ چوشکہ
یارُک ءَ شال پہ بد زردی ئیں جوراں لب اِت
شہرء پنجگور کئے ءَ تربت ءِ بازار جتگ
اے نگد ہما نزوریانی سر ءَ اِنت کہ ہما دور ءِ مردماں دیرچاری نہ کتگ ءُ وتی بازیں چِزے ببا داتگ۔ وتی لب ءُ بد زردیاں گوں وتی ڈیھ اِش دست ءَ برائینتگ، یاکہ چہ وتی نزوری ءُ نابودیاں بلوچ راجمان ءِ ہستانک اِش داشت نہ کتگ۔ ایشی ءَ ہوار گوادر ءِ برگ ءِ سر ءَ سید ءِ ہیال ہم انچیں دانک اَنت کہ گوست ءِ گواچن اَنت ءُ ہست ءِ راستی ءَ پدر بیتگ اَنت۔ سید ءِ دیرچاری ءُ سیاسی نگاہ بیتگ کہ ہما وہد ءَ آئی ءَ اے پیمیں جیڑہ مار اِتگ ءُ درنگاز اِتگ اَنت۔ اد ءَ چہ ہمے پدر بیت سید ءَ سیاسی چِست ءُ ایرانی سر ءَ نہ تہنا نگاہے داشتگ بلکیں آہانی سر ءَ نبشتہ کتگ ءُ راج ءِ رہشونی کنگ ءِ جہد کتگ۔
نہ بیتگ مادنیں راہ ءَ کسے گار
نہ تَراں ہرکس ءَ پھک ءَ جواب اِنت
سید ءِ گور ءَ مادنیں راہ بلوچ، بلوچی ءُ بلوچستان اِنت، پہ آہاں جہد کنگ اِنت۔ اے آئی ءِ سیاسی باسمائی اِنت کہ آ درستیں گپانی گوشدارگ ءَ پد ہم اوشتاتگ ءُ وتی راہ ئِے یلہ نہ داتگ، آئی ءَ زانتگ ہم کہ راجمان ءَ گوں گھگیری کنگ ءِ آسر آئی ءِ مرگ ہم بیت کنت، بلے مرگ ءَ ابید آئی ءَ وتی زِند ءَ ہمک وڑیں ازاب سگ اِتگ۔ آ زہنی، اخلاقی، مالی ءُ لبزانکی ازابانی زد ءَ بیتگ بلے آئی ءَ زانتگ کہ اے مادنیں راہ ءَ آ گار نہ بیت بلکیں مِنزلے الم کئیت پمیشکا آئی ءَ مہلوک پھک جواب کتگ ءُ پُشت ءَ نہ تَرگ ءِ فلسفہ ءِ سر ءَ اوشتاتگ۔ اے ہمے اوشتگ ءُ جہد کنگ ءَ سکین بیتگ کہ آئی ءَ یک ءُ تہنا اینچو کار سرجم کتگ ءُ پہ وتی زاتی زِند ءَ ہچ کٹ ءُ نپ ئِے نہ لوٹ اِتگ۔
اے سرجمیں باوستاں پد آئی ءِ جِند ءِ دیرچاری ءُ اوشتگ بلوچ راج دپتر ءِ تہ ءَ نکش اِنت کہ آ ناں تہنا لبزانکار بلکیں ہمک پِڑ ءِ مردمانی ہاتر ءَ سکینے کہ اگاں دل ءُ سِتک کسے کارے بہ کنت، گڑا آئی ءَ گوں گورجیگیں شُمُک ءِ نادراہی ہم داشت نہ کنت۔ سید کساس بیست ءُ شش سال ءَ شُمُک ءِ نادراہی ءِ آماچ بیت بلے وشتریں گپ اِش اِنت کہ آئی ءِ سرجمیں کار ہمے میان ءَ سرجم کتگ اَنت۔ آ وتی پِت ءُ پیُرکی زمیناں بھا کنت بلے علاج کنگ ءِ جاہ ءَ بلوچی زُبان ءِ سر ءَ ہرچ اِش کنت، ہما دور ءِ مردم آئی ءَ بد ءُ رد کن اَنت ءُ آئی ءَ گژدال لیک اَنت بلے سید ءِ راجی سِنچ ءُ سما ہمنچو تونگر بیت کہ آ یک ءُ تہنا کُلیں مہلوک ءِ دپاں دار ایت ءُ وتی کار ءَ برجاہ دار ایت۔ سید ءِ ہما کار کہ آئی ءَ نپری بنیاد ءَ کتگ اَنت، روچء مرچی یک لبزانکی ادارہ یے ہم کُت کنگ ءَ نہ اِنت۔ اے بدبھتی یے یاکہ نابودی ھُدا بہ زانت ءُ ہما سیالداریں مردم ءُ ادارہ بلے پہ راج ءَ درونتے ءُ جوریں شِگانے کہ آئی ءِ کنڈ ءِ پُر کنگ وتی جاہ ءَ آئی ءِ نیم سریں کار ہم کنگ نہ بیتگ۔
سید یک لبزانکاری ءَ ابید سیاسی کواسے کہ مادنیں راہ ئِے گِپتگ ءُ وتی جہد ءَ ہمنچو سِتک دار ایت کہ ہچ بدیں گپ ءُ عملاں چک ءُ پد نہ بیت۔ مردمانی گُشگاں کِمار نہ کنت ءُ انچیں کاراں گوں گُلائش اِنت کہ آ باندات ءِ گہتری ءُ پدریچ ءِ دیمروئی ءِ مانزمان اَنت۔ آئی ءِ جہد ءُ فلسفہ ہمنچو تونگر اِنت کہ اگاں آ پہ سِتک ءُ دل زیرگ بہ بیت گڑا مئے بازیں راجی کارے پیلو بیت کنت۔
