بلوچ اسٹوڈنٹس ایکشن کمیٹی پَنجگُور ھنکین ءِ ھنکینی لس دیوان برجم دارگ بوتگ۔
عائشہ بلوچ ھنکینی کارمستر ءُ برمش بلوچ ھنکینی کارگُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی پَنجگُور ھنکین ءِ ھنکینی لس دیوان گوستگیں ھنکینی کارمستر نسرت بلوچ ءِ سروکی ءَ برجم دارگ بوتگ۔ دیوان ءِ مہمان ءِ ھاس بنجاہی کمیٹی ءِ باسک سنگت بالاچ بلوچ بوتگ۔
دیوان ءِ بُنگپ بنجاہی سرکیولر، ھنکینی رپورٹ، شرگداری، گَل کاری، ھندی ءُ میان استمانی سیاسی جاورھال ءُ آؤکیں گامگیج بوتگ اَنت۔
جتائیں بُنگپانی سرا سنگتاں تران کنان ءَ گُشتگ بلوچستان ءِ ہمک ھند ءُ دمگانی وتی زمینی راستی ءُ سیاسی لوٹ است اَنت کہ آ چہ دگہ ھند ءُ دمگ ءَ جتا اَنت، پمیشکہ سیاسی زانت ءُ سرپدی ہمیش اِنت کہ ما ہرچ ہما دمگ یا میتگاں کہ سیاست کنگ ءَ اِنت آیانی زمینی راستیانی پھمگ ءَ پد اود ءِ سیاسی لوٹانی ھساب ءَ پروگرام ءُ پالیسی بہ ٹہین ایں۔ ھمے وڈا پَنجگُور ءَ استانی زوراکی، مذہبی ڈسکورس ءُ ایندگہ سیاسی چست ءُ ایر باز اِنت کہ آیانی سان نودربر ءُ نودربر سیاست ءِ سرا کپ اَنت۔ ایش سیاسی چست ءُ ایرانی پہمگ ءُ سیاسی دورچاری ءِ بنیات ءَ پالیسی ٹہینگ لوٹیت داں ما وتی سیاسی عمل ءَ برجاہ داشت بکنیں ءُ نودربرانی پگری ھیلکاری ءِ عمل ءَ دیمروئی دات بہ کنیں۔
دیمترا سنگتاں تران کنان ءَ گُشت پَنجگُور ءَ نودربر سیاست ءِ دیما بازیں جیڑہ است اَنت کہ آیانی تہ ءَ مستریں جیڑہ وانگی ادارہانی تہ ءَ نودربر سیاست ءِ اسپیس نہ بوھگ اِنت کہ ایشی ءِ سبب ءَ بازیں نودربر ادارہے بھر بوھگ ءَ نہ اِنت۔ اے میان ءَ سنگتانی مستریں جہد وانگی ادارہانی تہ پہ نودربر سیاست ءَ اسپیس جود کنگ بہ بیت۔
دیمتر ءَ ھنکین ءِ کارانی ھاتر ءَ جتائیں پیسلہ زورگ بوت کہ آیانی تہ ءَ گَل کاری ءِ واستا ترتیب ٹہینگ بوت کہ بازیں جاہاں گَل سر نہ اِنت اود ءَ گَل کاری کنگ ءِ جہد بیت ءُ ایشی ءَ ھوار ھیلکاری دیوانانی ڈومین، نوشت اسٹڈی سرکل، بلوچستان کتاب کاروان ءِ نام ءَ کتاب مراگاہ، زہگانی واستہ گام کلاس واجہ عبدالقیوم ءِ زند ءُ ازم ءِ سرا دیوانے اڈ دیئگ ءَ ھوار بلوچ لٹریسی کمپیئن ءِ وسیلہ ءَ ایس بی کے پَنجگُور کیمپس ءُ ڈجیٹل لائبریری ءِ رپورٹ یکجاہ کنگ ءُ رسانکدر ءَ شنگ کنگ بنت ءُ بی ایل سی ءِ چیردستی ءَ وانگی مراگشے ءُ ایجوکیشنل واک ءِ ھم اڈ دیئگ بیت۔
جتائیں بنگپانی سرا گوں دلجمی ءَ گپ ءُ تران ءَ پد آوکیں گامگیج ءِ بُنگپ ءِ تہ ءَ گوستگیں ھنکینی کابینہ ھلاس کنگ بوت ءُ پہ نوکیں کابینہ ءَ سنگت گچین کنگ بوت اَنت۔ نوک گچین بیتگیں کابینہ ءَ عائشہ بلوچ کارمستر، زید کمک کارمستر، برمش بلوچ کارگشاد، کامل بلوچ کمک کارگشاد ءُ شیراز ھالرسانی کارگشاد گچین کنگ بوت اَنت۔ دیوان ءِ گُڈسرا نوک گچین بیتگیں ھنکینی کابینہ ءَ گَل ءِ سوگند دیئگ ءَ پد دیوانے ھلاسی ءِ جار جنگ بوت۔
بُنجاہی جارکش : بلوچ اسٹوڈنٹس ایکشن کمیٹی
