بلوچ اسٹوڈنٹس ایکشن کمیٹی ءِ اولی بنجائی کمیٹی دیوان کماش اُزیر بلوچ ءِ سروکی ءَ برجم دارگ بوتگ۔
گل بلوچستان ءِ جتائیں ہند ءُ دمگاں سیاسی ءُ لبزانکی مردمانی یات ءَ لٹریری فیسٹیول اڈ دیگ ءُ بلوچ لٹریسی کیپمئین ءِ وسیلہ ءَ بلوچستان ءِ دمگاں اسکولانی فعال کنگ ءُ سائنس اگزیبشن اڈ دیگ ءَ ہوار بلوچ ورنایاں زانشتی، سیاسی ءُ تکنیکی پِڑاں رہشونی ءَ کنت۔
کسانیں مدتے ءَ بلوچ ورنایانی گوں گل ءَ ہوار بوگ ءُ مہلوک ءِ گل ءِ سرءَ بیسہ دارگ گل ءِ پِگری ءُ جوڈشتی مہکم بیگ ءِ درور اِنت۔ گل ءِ سنگت ہمے بیسہ ءِ شرپ ءَ وت ءَ مہکمیں ءُ بودناکیں ورنا کنان ءَ راجی زمہ واریاں پیلو بہ کن اَنت۔
کماش اُزیر بلوچ
بلوچ اسٹوڈنٹس ایکشن کمیٹی ءِ اولی بنجائی کمیٹی ءِ دیوان بنجائی کماش اُزیر بلوچ ءِ سروکی ءَ جم دارگ بوتگ۔ دیوان ءِ تہ ءَ پجاری نشست، گل کاری ءُ آؤکیں گامگیج ءِ سرھالانی سرءَ گوں دلجمی ءَ تران کنگ بوتگ۔ پجاری نشست ءَ پد گل کاری ءِ سرھال ءِ سرءَ گل ءِ بنجائی لس مجلس ءَ بوتگیں کلیں ھبر ءُ داتگیں شَور ءُ سلاہانی سرءَ دلجمی ءَ گپ ءُ تران کنگ بوتگ۔
دیوان ءِ تہ ءَ بنجائی کماش اُزیر بلوچ ءَ گپ کنان ءَ گشت کہ اے مئے ءُ شمئے واستہ یک وش بہتی یے کہ گل ءِ سنگتاں مئے سرءَ اے بیسہ داشت ءُ مارا وتی رہشون بوگ ءِ موہ دات کہ ما بلوچ ورنایانی رہشونی ءَ کنان ءَ آہاں منزل ءَ سر کنگ ءَ وتی ہمک جہد ءُ کوشست ءَ کنیں۔ بلئے ایشی ہمرائی ءَ اے مئے ءُ شمئے سرءَ یک مستریں زمہ واری یے زانگ بیت کہ ما ہمے ورنایانی رہشونی ءَ کنان ءَ آوانی علمی، سیاسی، پگری ءُ تکنیکی ہیلکاری ءَ یک جوانیں ءُ جانداریں دروشمے ءَ نہ تہنا برجاہ بہ داریں بلکیں وتی ہمک وھد ءِ مستریں ءُ ھاسیں پروگرامانی بہر کنان ءَ دلگوشی بہ دئیں۔ گل ءِ چارمی بنجائی لس مجلس ءِ گوں سوبمندی ءَ برجم دارگ، ہستیں ءُ گوستگیں سنگتانی مھنت، مخلصی ءُ گل ءِ کاراں گوں سنجیدگی ءَ برجم دارگ ءِ برورد اِنت۔ آوانی داتگیں پروگرام ءُ پیسلہ سازی ءُ گل ءِ ہمک باسک ءِ گوں مخلصیں رنگے ءَ کاراں ھوار بوگ ءُ گوں دلجمیں رنگے ءَ ایشانی سرجم کنگ ءِ بنیات ءَ گل مدام وتی کار ءُ پروگراماں دلجمیں رنگے ءَ سرجم کنت۔
بنجائی کماش ءَ گپ کنان ءَ گشت کہ کسانیں مدتے ءَ بلوچ ورنایانی گوں گل ءَ ہوار بوگ ءُ مہلوک ءِ گل ءِ سرءَ بیسہ دارگ گل ءِ پِگری ءُ جوڈشتی مہکم بیگ ءِ درور اِنت۔ گل ءِ سنگت ہمے بیسہ ءِ شرپ ءَ وت ءَ مہکمیں ءُ بودناکیں ورنا کنان ءَ راجی زمہ واریاں پیلو بہ کن اِنت۔ گل ءِ زمہ واری زورگ بگندے سر زاہر ءَ لہتے اگدہ اَنت بلے اے مزنیں راجی ڈُبہ ءُ زمہ واری اَنت کہ مئے کوپگان اَنت ءُ اشانی پیلو کنگ ءَ کہ ما سوگند وارتگ اے راجی زمہ واریانی پیلو کنگ ءِ ہما منگ نامگ اِنت کہ آ گوں پگری پُھتوئی ءُ یکشلیں جہد ءَ بندوک اِنت۔ پمیشکا مارا وت ءَ پگِری ہوالہ ءَ پُھتو ءُ ہاٹیگی ہوالہ ءَ مہکم بیگ ایں ءُ اے زانشتی کاروان دیم ءَ جُنزینگی ایں۔ ما یک ہنچیں وھدے ءَ راجی زمہ واری وتی کوپگاں زُرتگ کہ اے وھد مارا چہ باز لوٹ کنت ءُ ہمے لوٹانی رِد ءَ اوشتگ ءُ دیم ءَ جُنزگ مہکمیں سیاسی جہدکارے ءِ چیدگ اِنت۔ مروچی کہ من ءَ اے زانشتی کاروان بساک ءِ دروشم ءَ گوں بودناکیں ءُ مہکمیں ورنایاں رستگ گڑا من چہ پِگری سنگتاں ہمے امیت داراں کہ آ وتی دلگوشیاں سرجم ءَ گوں گل ءِ کار، راجی زلورت، سیاسی لوٹ ءُ ورنایانی سیاسی ءُ پگری ہیلکاری ءَ بندوک کن اَنت، گڑا من سدک باں کہ مئے اے کاروان زانشتی ءُ علمی منزل ءِ نیمگ ءَ سپر جنان ءَ یک مہکم ءُ توانگریں راجی گلے ءِ بستار ءَ بلوچ ورنایانی مہکمیں توار ءُ پتر بیت۔
گلکاری ءِ سرءَ بنجائی سنگتاں تران کنان ءَ گشت کہ گل وتی ہمک بنجائی لس مجلس ءَ گیش ارزشت دار ءُ مستر بوان ءَ ہمک وھد ءَ گیش توانگر ءُ مہکم بیت، ایشی ءِ مستریں سوب گل ءِ وتی سنگتانی پگری ہیلکاری، ورنایانی وانگی ءُ ایندگہ نودربر ھکانی پہریزگ، زانشتی ءُ ادارہ جاتی پیسلہ ءُ پروگراماں ہوار راج ءِ ہمراہ داری ءُ بیسہ اِنت۔ گل ہمک وھد ءَ ہمے جہد ءَ کنت کہ ورنایانی علمی، پگری، زانشتی، سیاسی ءُ سائنسی ہیلکاری ءَ یک جانداریں رنگے ءَ دیما برت بہ کنت۔ ما کہ اے جاہ ءَ مروچی اتکگ ءُ سر بوتگیں اے یک ابرمی دادے نہ یے بلکیں تنظیم کاری ءِ تہ ءَ وتی سرجمیں دلگوشی دئیگ ءُ ہمک پیسلہ ءُ پروگراماں گوں مخلص بوگ ءِ برورد اِنت۔ مئے سنگتانی گوں تنظیم ءَ ستک ءُ ورنایانی مئے سر ءَ بیسہ مئے گام جنگ ءِ مستریں جزبگ اَنت۔
گڈی سرھال آؤکیں گامگیج ات کہ ایشی تہ ءَ بنجائی مجلس ءَ اتکگیں سنگتانی تجویز ءُ شورانی سرءَ گپ ءُ تران ءَ پد جتائیں پروگرامانی سرءَ پیسلہ زورگ بوت کہ ایشانی تہ ءَ بلوچستان ءِ جتائیں ہند ءُ دمگاں بلوچ سیاسی ءُ لبزانکی مردمانی یات ءَ لٹریری فیسٹیول اڈ دئیگ، بلوچ ہنداں وانگی ءُ لٹریسی کچ ءِ ودینگ ءِ واستہ بلوچ لٹریسی کیمپئین ءِ وسیلہ ءَ اسکولانی فعال کنگ ءُ بندیں اسکولانی ڈیٹا یکجاہ کنگ ءُ ایشانی پچ کنگ ءِ واستہ کیمپئن جنزینگ، بلوچستان ءِ تہ ءَ وانگی دود ءِ ودی کنگ ءِ ھاترءَ جتائیں وھداں بلوچستان کتاب کاروان ءِ نام ءَ کتاب میڑہ برجم دارگ، بلوچ ورنایاں گوں نوکیں جہانی لوٹاں آژناء کنگ ءُ سائنسی پڑ ءَ آوانی بودشتاں گیش کنگ ءِ ھاتر ءَ سائنس ایگزیبیشن برجم دارگ، زہگانی ہاتر ءَ لبزانک ودی کنگ، بلوچستان ءِ کوھن کدگ ءُ گیدی کسہانی سر ءَ جتائیں دروشماں تامربند جوڈ کنگ، ورنا ءُ زہگاں پہ ڈیجیٹل لٹریچر ءَ سر ءَ کار کنگ، بلوچ ءِ ماتیں زُبانانی سر ءَ لبزانکی جہد کنگ، ءُ 8 مارچ ءَ زالبولانی سرا پروگرام اڈ دئیگ ءَ ہوار ایندگہ پروگرامانی سر ءَ کار کنگ ءِ ہوالہ ءَ جتائیں پیسلہ زورگ بوت انت۔
سرجمیں بنگپانی سر ءَ دلجمی ءَ گوں تران کنان ءَ پد چہ کماش ءِ اجازت ءَ دیوان آسر کنگ بوت۔
بنجائی جارکش: بلوچ اسٹوڈنٹس ایکشن کمیٹی
