بلوچ اسٹوڈنٹس ایکشن کمیٹی ملیر ہنکین ءِ لس دیوان برجم دارگ بوتگ۔ محمد شاہ بلوچ کارمستر ءُ سابرہ بلوچ کارگُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ملیر ہنکین ءِ لس دیوان کارمستر محمد شاہ بلوچ ءِ سروکی ءَ برجم دارگ بوتگ۔ دیوان ءِ ھاسیں مہمان بُنجاہی کُمک کار گُشاد تنویر بلوچ بوتگ۔
دیوان ءِ بُن گپ بُنجاہی سرکیولر، گوستگیں ہنکینی اھوال، نگدی بہر، گلکاری، ھندی ءُ میاں اُستمانی سیاسی جاورھال ءُ آوکیں گامگیج بوتگ اَنت۔ دیوان ءِ تہ ءَ کُلیں بُنگپانی سرءَ دلجمیں باوست ءَ پد آوکیں گامگیج ءَ پہ دیمتری کارانی ھاتر ءَ پیسلہ زیرگ ءَ پد آوکیں زمہ وار گچین کنگ بوتگ اَنت۔
نگدی بھر ءَ سنگتاں تران کنان ءَ گُشت کہ پہ سیاسی ادارہانی دیمروئی ءَ یک شئے کہ باز ارزشت داریت آ نگد اِنت۔ ہرچ ہما ادارہ ءِ تہ ءَ نگدی عمل مُھکم بیتگ آھاں روچ پہ روچ دیمروئی کُتگ ءُ پہ راجمان ءَ مٹی ءِ مانزمان بیتگ اَنت۔ نگد ہما اوزار اِنت آ ادارہ ءُ سیاسی سنگتانی پلگارگ ءُ دیمروئی ءَ کُمک کنت۔ بیدء نگد ءَ نپری رُدوم ءُ ادارتی دیمروئی اوشت ءِ آماچ بنت۔ ما کہ اے اھد سازیں وھد ءِ بہریں، نودربر سیاسی ادارہی ءِ بستار ءَ مارا نگد سائنسی بستار ءَ وتی اندر ءَ جاہ دیگ ءَ ھوار عملی دروشم ءَ وتی ہمروچیگیں کارانی بہر کنگی ایں دانکیں ما ادارہ ءَ چہ رواج گپتگیں تاواندہیں باوست ءُ روشتاں در کُت ءُ آہانی شرتر کنگ ءَ ادارہ ءَ دیمروئی دات بہ کنیں۔
سنگتان دیمتر ءَ تران کنان ءَ گُشت کہ سیاسی سنگتے ءِ بستار ءَ ما چہ وتی چاگردی ءُ اخلاقی زمہ واریاں ھچ پیم ءَ گستہ بیت نہ کنیں، بلکیں سرپدیں سیاسی سنگتے ءِ بستار ءَ مارا مُدام وتی چاگردی زمہ واری پیلو کنگی اَنت، دانکیں ما وتی چاگرد ءَ چہ پدمنتگ ءُ بے رھبندیں روشت ءُ ساناں پہک کُت بہ کنیں۔ مرچگیں اھد ءِ تہ ءَ ہما ڈُبہ مئے کوپگان اَنت گُڑا ما گوں تچکیں نیت ءُ پہک دلی ءَ وتی زمہ واریاں پیلو بہ کنیں دانکیں بلوچ چاگردی جوڑشت ءِ سپر دو گام دیم ءَ بہ جُنزیت۔ اگاں ما اے تک ءَ نزور بیتیں گُڑا آوکیں پدریچ مئے عملانی سرءَ لنکُک چست کنت ءُ مارا جوابدہ کنت۔
گلکاری ءِ تہ ءَ سنگتاں تران کنان ءَ گُشت کہ چُشکہ بازیں گُپتمانانی سوب ءَ مئے ورنائیں پدریچ بازیب جیڑہ ءُ گپچلانی آماچ اِنت کہ آئی ءِ سبب ءَ ورنا ءُ نودربرانی تہ ءَ جُتائیں پدمنتگیں روشت ءُ تب جاہ کنگ ءَ اَنت۔ باید ہمیش اِنت کہ ما اے پدمنتگیں رواجاں ایر بہ جنیں ءُ ورناہاں گیش وانگ ءُ زانشت ءِ نیمگ ءَ بہ بریں۔ ہمے گُپتمان ءُ رواجانی سوب ءَ مئے سیاسی سرکل ءِ تہ ءَ بازیں روشت وجود دار اَنت چوشکہ نہ وانگ، وتی وانگ ءُ زمہ واریانی سر ءَ سنگین نہ بیگ، جتائیں سِلکاریانی آماچ بیگ، بے عملی ءُ ہُشک ءَ نندگ ندارگ چارگ ہوار اَنت ءُاے ھچ پیم ءَ مئے دیمروئی ءِ ھک ءَ نہ اَنت۔ گُڑا پہ دیمروئی ءَ مارا چہ ھُنڈالاں اے پیمیں روشت، سان ءُ تب در کنگی اَنت۔ مارا لوٹیت کہ ما وتی راجمان ءِ تہ ءَ ہمے بے وانگی ءِ رواجانی پروش دیگ ءَ پہ مھلوک ءَ سرپدی بہ دئیں دانکہ گیش ءَ چہ گیش ورنا الم ءُ زانشت ءِ نیمگ ءَ بیا اَنت۔ پرچاکہ وھدے ورنا چہ وانگ ءُ زانگ ءَ دیر بنت گُڑا مئے باندات تہاری ءِ نیمگ ءَ سپر کنت۔
سنگتاں ملیر ءِ سرءَ تران کنان ءَ گوشت کہ ملیر بلوچ راج ءِ ہما ہنکین اِنت کہ ادءَ مزنیں سر ودی بیتگ ءُ اد ءَ بلوچ ءِ بندپتری نشان نکش اَنت، شہری زِندگی ءَ ابید ہم بلوچ ءِ دود ءُ زبان رک اِتگ اَنت بلے بازیں ھدے ءَ بازیں رواجے نزور ہم بیتگ کہ اِشانی سر ءَ ورنا جہد کنگی اِنت۔ ورنایاں لوٹ ایت کہ اد ءَ زہگانی وانینگ، نودبرانی وانگ ءُ زانگ ءِ سر ءَ سرپدی ءَہوار ایدگہ راجمانی کارانی تہ ءَ وتی زمہ واریاں پیلو بہ کن اَنت۔ اے مئے سر ءَ اِنت کہ وتی ہنکین ءَ زانشتی چاگردے ودی بہ کنیں ءُ ورنایاں راجی تک ءَ یکجاہ بہ کنیں دانکہ آ زانت ءُ زانشت ءِ پِڑ ءَ دیمءَاتک بہ کن اَنت۔ پرے ہاتر ءَ زانشتی مراگش، زانشتی باوست ءُ ایدگہ عمل برجم دارگی اَنت داں سنگتانی یکجاہی ءَ گوں یک باسمائیں چاگردے ودی بہ بیت۔
دیوان ءِ سرجمیں بُنگپانی سرءَ گپ ءُ ھبر ءَ پد آوکیں گامگیج ءَ گوستگیں کابینہ ھلاس کنگ ءُ نوکیں زمہ وار گچین کنگ بوتگ اَنت۔ نوک گچین بیتگیں زمہ وارانی تہ ءَ محمد شاہ بلوچ کارمستر، شبیب بلوچ کُمک کارمستر، سابرہ بلوچ کارگُشاد، صباء بلوچ کُمک کارگُشاد ءُ تنویر بلوچ ھالرسانی کارگُشاد گچین کنگ بوتگ اَنت۔ بُنجاہی سنگت ءَ نوک گچین بیتگیں سنگتاں سوگند دات اَنت ءُ دیوان ءِ کُلیں بُنگپانی سرجم بوگ ءَ پد دیوان آسر کنگ بوتگ۔
بنجاہی جارکش: بلوچ اسٹوڈنٹس ایکشن کمیٹی
