بلوچ اسٹوڈنٹس ایکشن کمیٹی ٹنڈوجام ھنکین ءِ ھنکینی لس دیوان برجم دارگ بوتگ۔ حلیم بلوچ ھنکینی کارمستر ءُ صلالدین بلوچ ھنکینی کارگشاد گیچین کنگ بوتگ اَنت۔
بلوچ اسٹوڈنٹس ایکشن کمیٹی ٹنڈوجام ھنکین ءِ ھنکینی لس دیوان برجم دارگ بوتگ۔ حلیم بلوچ ھنکینی کارمستر ءُ صلالدین بلوچ ھنکینی کارگشاد گیچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی ٹنڈوجام ھنکین ءِ ھنکینی لس دیوان ھنکینی کمک کارمستر حلیم بلوچ ءِ سروکی ءَ برجم دارگ بوتگ، دیوان ءِ مہمان بنجاھی کمیٹی ءِ سنگت عدنان بلوچ بوتگ۔ دیوان ءِ تہ ءَ بنجاھی سرکیولر، ھنکینی اھوال، نگدکاری، گل کاری، ھندی ءُ میان استمانی سیاسی جاور ھال ءُ آؤکیں گامگیج ءِ بنگپ ہوار بوتگ اَنت۔ دیوان ءَ درستیں بن گپانی سر ءَ گپ ءُ تران کنگ ءَ پد آؤکیں گامگیج ءِ تہ ءَ گوستگیں کابینہ ھلاس کنگ بوتگ ءُ پہ نوکیں کابینہ ءِ ھاتر ءَ سنگت گیچین کنگ بوتگ انت۔
دیوان ءِ تہ ءَ نگدی بہر ءَ سنگتاں تران کنان ءَ گوشتگ کہ مدامی ءَ نگد کنگ پہ ادراہ ءِ کاراں یک نیکیں پالے، ءُ ھمک دیواناں کہ نگد بیت گڑا چہ اودا کارانی واستہ شوکتریں پروگرام دیما کئیت۔ نگد وت یک ھنچیں عملے کہ چہ آئی ءَ گوستگیں سیاسی کوتاھی ءُ نزوریانی نشاندہی کَنگ ءَ ہوار آوانی کشّگ ءِ واستہ گامگیج زُورگ بیت۔ چُشکہ نگد وت سکتیں عملے نگد کنوک ءُ گوشداروک دوئیناں سگ ءُ اُوپار لوٹیت ءُ نگد گوں نیک دلی ءُ ساپ نیتی ءَ کنگ بیت۔ گڑا ھما ردی کہ مروچی بوتگ اَنت آ نہ تہنا شر کنگ بنت بلکیں، دیمترا دوبر کنگ مہ بنت گُڑا اِدارہ ءَ سرسہبیں رنگے ءَ دیمروئی کنگ ءَ چہ کَس داشت نہ کَنت۔ مرچی اگاں ادارہ اے جاگہ ءَ اتکگ سر اِنت اے ھمے پُختہ ءُ دانائی نگد ءِ برورد اِنت۔ چُشکہ مئے کارانی سوبمندی ءُ بے سوبی تہنا گوں مئے کارانی سر ءَ ھورت چاری ءُ نگد ءَ بندوک انت۔ پمیشکہ اے راستی پہمگ لوٹیت ءُ ھمے ترز دیم ءَ کارانی تہ ءَ اوں گچین کنگ لوٹیت۔
دیمتِر ءَ گل کاری ءِ بہر ءَ سنگتاں وتی شور ءُ سَلاہ دیوان ءِ دیمءَ ایر کُت اَنت، سنگتاں تران کناں ءَ گُشتگ کہ مرچی ما سندھ ءِ ھما ھند ءَ وانگ ءَ اَتکگ انت کہ بلوچانی مزنیں کچے ءَ مردم ھمدا آباد اَنت، گڑا اے مئے زمہ واری بیت کہ مارا وتی کار ءُ پروگراماں ھنچیں وڑے ءَ دیم ءَ برگی اَنت کہ اے ھند ءِ نہ تہنا نودربر بلکیں لس ورنا مئے گوں ءَ ھمراہ داری کُت بہ کن انت ۔ چُشکہ اداراہ ءِ ھمے کار ءُ پالیسیانی برورد اِنت کہ مرچی ٹھٹہ ءُ ٹنڈو ءِ نندوکیں ورنا ءُ نودربرے مزنیں کَچے ءَ مئے گوما ھمبراہ اَنت، ءُ مئے اداراہ ءِ لیڈرشپ ءِ بہر اَنت۔ بلے چُشکہ سیاست یک اَنچیں عملے کہ یک دابے ءَ نہ جُنزیت بُرزی ءُ جہلی ھمیشانی بہر اَنت۔ نودربر سیاست ءِ یک مستریں راستی یے ھمیش انت کہ سوبمندی ءِ روچان گَل بوھگی ءُ نندگی نہ اِنت ءُ سختی ءِ روچان دست سرا کَنگی ءُ نندگی نہ اِنت، بلکین وترا ھمک جاورانی واستہ وت ءَ تیار کنگی انت، ءُ ھما ھساب ءَ کار کنگی اِنت۔ اے نودربر سیاست ءُ سیاسی گلانی واستہ وھد ءِ مستریں زرورت اِنت۔
کلیں سرھالانی سر ءَ گوں دلجمی ءَ تران کنگ ءَ پد گُڈی بُنگپ آؤکیں گامگیج اَت، کہ ایشی تہ ءَ گوستگیں کابینہ ھلاس کنگ بوتگ ءُ نوکیں کابینہ ءِ ھاتر ءَ اے سنگت گیچین کنگ بوت انت؛ کارمستر حلیم بلوچ، کمک کارمستر چاکر بلوچ، کارگشاد صلالدین بلوچ ، کمک کارگشاد رھمان بلوچ ءُ ھالرسانی کارگشاد وسیم بلوچ گیچین کنگ بوتگ انت۔ بنجاھی سنگت ءَ نوک گیچین بوتگیں ھنکینی سنگت سوگند دات انت ءُ دیوان آسر کنگ بوتگ.
بنجاہی جارکش: بلوچ اسٹوڈنٹس ایکشن کمیٹی
