بلوچ اسٹوڈنٹس ایکشن کمیٹی نصیر آباد ہنکین نا ہنکینی لس دیوان اڈ تننگا۔ الطاف بلوچ ہنکینی کارمستر و جمیل بلوچ ہنکینی کارگشاد گچین کننگار۔
بلوچ اسٹوڈنٹس ایکشن کمیٹی نصیر آباد ہنکین نا ہنکینی لس دیوان اڈ تننگا۔ الطاف بلوچ ہنکینی کارمستر و جمیل بلوچ ہنکینی کارگشاد گچین کننگار۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نصیرآباد ہنکین نا ہنکینی لس دیوان کارمستر الطاف بلوچ نا کماشی ٹی اڈ تننگا۔ دیوان ئٹ ساڑی آ مہمان بنجاہی کمیٹی نا باسک رحمان بلوچ و سہیل بلوچ ئسر۔
ہنکینی لس دیوان ئٹ بنجاہی سرکیولر، ہنکینی رپورٹ، نغد کاری، گل کاری، ہندی و جہانی سیاسی حالیت آتا زی آ اُست جمی ئٹ گپ و تران کننگ آن گُڈ دیوان نا گُڈیکو بشخ بروکا گامگیج ئٹ تدوکا کابینہ ایسر کننگا و ہنکینی کابینہ کن پوسکنو سنگت گچین کننگا۔
دیوان نا بنداوی بشخ دنچا بنجائی سرکیولر و ہنکینی رپورٹ آتا زی آ شرہ کننگ آن پد، دیوان نغدی بشخ آ بس، ہراٹی سنگتاک بشخ ہلیسہ نغد ئنا ارزشت ئنا بابت ئٹ ہیت کریر۔ سنگتاک ہیت کریسہ پاریر کہ نغد سیاسی ادارہ آتا ہمو آٹی چائنگک کہ ہرا ادارہ نا ساخت ءِ مدام زندہ تخک۔ سنگتاک ہیت کریسہ پاریر کہ دا انسان نا فطرت ءِ کہ او مدام تینا ہر عمل ئٹ ردی کیک ولے اندا ردی تے ہراتم بندغ پام کتئو و دافتے ایسری نا نیمہ غا دننگ کتو گُڑا او نسخان نا نیمہ غا کائک۔ اندن ادارہ تیٹی ہم بندغاک ردی کیرہ، و اگہ دا ردیک نشان کننگ متور گُڑا ادارہ غاتا جوڑ مروکا آٹی ہم پِنّک۔ ولے اینو ننے تینا سنگت آتیٹی دا گِڑا خننگ ئٹ بریک کہ اوفک مدام تینا سیاسی عمل ئٹ نغد ئنا ارزشت آن سرپد ءُ، و نغد کننگ و نغدے بننگ نا سیاسی جیرت تخرہ ہرا ننا سیاسی ادارہ نا کلآن بھلا سرسہبی چائنگک۔ مون مستی سنگتاک نغد کریسہ پاریر کہ سیاست نا کلآن بھلا مسخت تیوہ غا ہند ئنا مخلوق ءِ اسہ جاغہ آ کننگ و اوفتے سیاسی شعور بشخنک ءِ، گُڑا دا مسخت ءِ پورو کننگ کن ننے تینا ادارہ ءِ وسعت تروئی ءِ، وننے تینا ہند ئنا ہر بندغ اسکان سر مروئی ءِ ولے دا نیام ئٹ بھاز حساب ئٹ خننگ آ بریک کہ ادارہ نا سنگتاک دا حوالہ ئٹ نزوری کرینو، ہراتم کہ نن دنو نزوری کینہ و دافتے ہمو وخت آ ہلپنہ گڑا دا ننا سیاسی عمل ئٹ اسہ بشخ ئس جوڑ مریسہ کیک و نن مدام ردی کریسہ کرون۔ اندا سوب آن ننا سنگتاک کہ دا ردی تے ہلتنو گڑا اوفک پین ہم ردی کرینو ہرا ننا ادارہ جاتی نزوری چائنگک، ہرا خواننگ یاکہ علمی حوالہ ئٹ نزور مننگ ءِ۔ سیاسی باسک آتا سیاسی ردوم و شونداری ہموتم مننگ کیک ہراتم نن تینے علمی حوالہ ئٹ زیات مہکم و چاہندار کین۔ دا ہمو بُنداوی ردیک ءُ ہرافتا زی آ نغد کریسہ ننے ایسر کروئی ءِ۔ کل سنگت آتا نغدی ٹِک ئنا زی آ اُست جمی ئٹ ہیت و گپ کننگان پد، نغدی بشخ بند کننگا۔
مون ئنا ٹِک گل کاری ئس کہ ہراٹی سنگتاک ہیت کریسہ پاریر کہ گل کاری گل ئنا فیصلہ سازی نا بھلا وسیلہ ءِ دا بشخ ئنا ارزشت ءِ پُہہ مننگ ہر سیاسی خوانندہ و ورنا کن المی ءِ۔ سنگتاک گل کاری ئٹ تینا گل کاری نا زی آ نوشتہ کروک آ ڈرافت آتے دیوان نا مون آ خوانار۔ دیوان ئٹ ساڑی آ بنجاہی سنگتاک ہیت کریسہ پاریر کہ سیاسی ادارہ غاتا دیمروئی و شونداری نا بھلا وسیلہ گل کاری ءِ کہ ہراٹی سنگتاک تینا تاغتور آ سَلاہ و مشورہ آتے تخیرہ ہرافتے کاریم ئٹ ہتیسہ سیاسی ادارہ غاک سرسہب مریرہ۔ گل کاری نا دا عمل سیاسی ادارہ آتے وسعت تننگ و تیوہ غا چاگڑد اسکان سر کننگ نا عمل چائنگک۔ گُڑا ننے خوانندہ سیاسی ادارہ ئسے نا بستار ئٹ گل کاری نا ارزشت ءِ پُہہ مروئی ءِ، و تینا ادارہ ءِ تیوہ غا چاگڑد ئنا ہند ہند اسکان سر کروئی ءِ تانکہ ننا مخلوق ادارہ نا بشخ مرسہ سیاسی تربیت ءِ الینگ کے۔
بنجائی سنگت مون مُستی تران کریسہ پاریر کہ اینو نا ساڑی آ وخت ئٹ خننگ ئٹ بریک کہ ننا سیاسی پروگرام آک سلینگ نا گواچی مسونے ہرانا بھازا سوب آک ءُ، ہرافتیٹی اسٹ مخلوک نا چاگڑی حوالہ ئٹ اسہ دم در ءُ گمان ئسے نا گواچی مننگ ام اوارے، ہرا اسہ سیاسی باسک ئسے تون اوار ایلو لس مخلوک کن ام نسخاندہ ءُ عمل ئسے۔ اینو ننے تینا تہہ ئٹ سیاسی جیرت ودی کروئی ءِ و سیاست ءِ گواچن نا بنیات آ پُہہ مروئی ءِ۔ نن ہموتم آ تینا ادارہ ءِ مہکم کننگ آ سرسہب مرون ہراتم ننا جند آک مہکم مریر، گُڑا ساڑی آ وخت ئٹ المی ءِ کہ ننے تینا تہہ ئٹ سیاسی جیرت ودی کروئی ءِ او تینا ہند آتیٹ چنکو و بھلو پروگرام اڈ تروئی ءِ۔ کل سنگت آتا گپ و تران آن پد گل کاری نا ٹِک ایسر کننگا۔
دیوان نا کُل بشخ آتا زی آ اُست جمی ئٹ تران آن گُڈ دیوان نا گُڈیکو بشخ بروکا گامگیج ئس کہ ہراٹی تدوکا کابینہ ایسر کننگا و پوسکنا ہنکینی کابینہ کن کارمستر الطاف بلوچ، کمک کارمستر صدام بلوچ، کارگشاد جمیل بلوچ، کمک کار گشاد مشتاق بلوچ و حوالکار طارق بلوچ گچین کننگار۔
ہنکینی کابینہ نا پوسکن گچین مروکا سنگت آتے بنجاہی سنگت سوغند تس و انداکان کارمستر نا رزا ئٹ دیوان ایسر کننگا۔
بنجائی ترجمان: بلوچ اسٹوڈنٹس ایکشن کمیٹی
