گام؛ مئے جہد پہ راج ءِ زہگاں
گام؛ مئے جہد پہ راج ءِ زہگاں
کماش اُزیر بلوچ، بلوچ اسٹوڈنٹس ایکشن کمیٹی
گام زہگانی یک تاکے کہ بلوچی ءُ براہوئی زُباناں چاپ ءُ شِنگ کنگ بیت۔ تاک ءِ تہ ءَ زہگانی نبشتہ کتگیں نِکان اَنت کہ آہانی تہ ءَ جتائیں زانشتی، گیدی، راجمانی، سائنسی ءُ ایدگہ سرہالانی سر ءَ نبشتانک، آزمانک ءُ گیدی کسہ، چاچ ءُ بتل، گُشتن ءُ وشکند، جتائیں بلوچ نبشتہ کارانی زِندنامگاں ہوار ایدگہ سرہالانی سر ءَ نبشتانک ہوار اَنت۔
زہگانی لبزانک پہ راجاں دنیا ءِ تہ ءَ مزنیں ارزشتے دار ایت ءُ ہمک راج ءَ وتی زہگانی ہاتر ءَ لبزانک ودی کتگ دانکہ یکے وَ آ وتی ماتی زُباناں در بہ بَر اَنت ءُ بہ وان اَنت ءُ دومی وتی راجی زانشت ءَ گوں نزیک بیان ءَ وتی یاداشت ءَ بہ رکین اَنت۔ چوشکہ زہگ راجمان ءِ ہما بنیادی مِنُک زانگ بنت کہ چہ آہاں آوکیں پدریچ جوڑ بیت۔ وہدیکہ آ وانینگ بہ بنت گڑا ہمے دیم ءِ پدریچ بیت کہ آئی ءِ یاداشت چہ جِند ءِ زانشت (انڈیجینئس نالج) ءَ گوں بندوک بیت ءُ دیمتر ءَ وتی راجمان ءُ راج ءَ بڈ ءَ بست کن اَنت۔ چوشیں راجانی لڑ مزن اِنت کہ آہاں وتی دیمروئی ءِ سپر ءَ وتی زہگ درس داتگ اَنت چوشکہ اپریکہ ءِ بازیں مُلک، سوشلزم ءِ زمانگ ءَ مزن نامیں سویت یونین، اشیا ءُ یورپ ءِ بازیں چیر تر اِتگیں راجاں وتی راجی ہستانک ءِ رکینگ ءَ پہ بنیاد ءَ کار کنگ بِندات کتگ ءُ وتی زہگانی ہاتر ءَ جتائیں سرہالانی سر ءَ لبزانک ودی کتگ ءُ آ وانیتگ اَنت۔
مئے یکے وَ زُبان مرگ ءِ ھرجان کنگ بیگ ءَ اِنت ءُ دومی مئے جِند ءِ زانشت گار ءُ گُمسار کنگ بیگ ءَ اِنت، بہ زاں مئے ہستیں پدریچ ءِ یاداشت کور کنگ بیگ ءَ اَنت۔ پمیشکا ما اے گپچلانی تہ ءَ تہنا تماشائی مہ بیں ءُ ندارگ مہ چاریں بلکیں پہ راجی ہستانک ءُ راجمان ءِ رکینگ ءَ چہ وتی بُن روتگاں کار بِندات بہ کن ایں ءُ منی نِز ءَ اشی ءِ مستریں کاراں چہ یکے زہگاں وتی جِند ءِ زانشت ماں جِند ءِ ماتی زُباناں وانینگ ءُ دربرائینگ اِنت۔
ہمے کار ءِ رِد ءَ بلوچ اسٹوڈنٹس ایکشن کمیٹی ءَ زہگانی تاک “گام” ءِ چاپ ءُ شِنگ کنگ ءِ ڈُبہ زُرتگ۔ مئے مکسد ہمیش اِنت کہ گام ءِ وسیلہ ءَ ما وتی زہگاں جِند ءِ زانشت ءَ گوں آژنا بہ کنیں ءُ آہاں بہ وانین ایں دانکہ مئے ہستیں پدریچ ءِ یاداشت رک اِت بہ کنت۔
ہستیں ڈیجیٹل دور ءَ کہ ہمک مواد پہ آسانی ءَ چاگردی رسانکدر ءَ رست کنت، بلے زہگانی ہاتر ءَ موادانی ڈیجیٹل کنگ ءَ ما راجی بستار ءَ کم دلگوش کتگ۔ پرے ہاتر ءَ ما گام ڈیجیٹل ءِ بنگیج ایر کتگ کہ آئی ءِ تہ ءَ گام تاک ءِ زہگانی لبزانک ڈیجیٹل دروشم ءَ رسانکدر ءَ شِنگ ءُ تالان کنگ بنت۔ ما جہد کنیں کہ بلوچی ءُ براہوئی زُباناں ہستیں زہگی لبزانک ءَ ڈیجیٹل دروشم ءَ وتی راج ءِ زہگاں سر بہ کنیں داں ما وتی گیدی کسہ، راجی لبزانک ءُ راج ءَ گوں بندوکیں ایدگہ تک ءِ لبزانک ءَ وتی یاداشتانی تہ ءَ رکینت بہ کنیں۔
اے رد ءَ کُلیں بلوچ ورنا ءُ مہلوک ءِ زمہ واری بیت ھاس اُستاد، پِت ءُ مات، برات ءُ گُہارانی زمہ واری بیت کہ گام ءَ لوگ ءُ میتگ، شہر ءُ کوچگاں وتی زہگاں بہ وانین اَنت ءُ ڈیجیٹل مواداں وتی زہگاں سر بہ کن اَنت۔ ما جہد ءُ عمل کنیں، مئے پلہ مرزی کنوک ءُ جہد ءِ دیم ءَ بروک مئے راج اِنت۔
مئے جہد پہ زانشت ءُ یکمُشتی ءَ برجاہ بیت۔
