راجی آ شاعر نا کڑد و مبارک قاضی
نوشتکار: محیم بلوچ
چاگڑد ئٹ شاعر نا کڑد ہر وخت اسہ پُر ارزشت ءُ اثر ئس تخانے، شاعر بیرہ لوز آتا اسہ جادوگر ئس متنے بلکن او چاگڑد نا کل آن بھلا مارشت کروکا بندغ چائنگانے، او تینا ماحول ءِ کڑمبی ئٹ مارنگ و اونا دڑد، خوْشی، اومیت و نااومیتی تے تینا شاعری ٹی مون آ ایسونے۔ ہرا شاعر تینا قلم ءِ ظلم و بے بریبری نا برخلاف بڑز کرینے گڑا او دیہاڑ ئٹ اسہ راجی شاعر ئس پاننگانے و اونا کڑد ایلو عام شاعر آتیان زیات مسونے۔ راجی شاعر آتا کل آن اولی فکر دا مسونے کہ او راجی ویل آتیان نا سرپد آ بندغ تے تینا شئیر آتیٹ سیاسی شعور بشخانے و بیدار کرینے، خاص ہمو بندغ آتے ہرافک تینا چاکڑد ئٹ بیدادی و زوراکی تیان خن تر مسونو۔ راجی آ شاعر مدام تینا شاعری تیٹ ہمو بندغ آتا خن تے ملِنگ کن کوشست کرینے کہ ہرافک تاغتور نا خُلیس آن تینے زند ئنا رُم آن بٹینو۔
داڑان بیدس راجی شاعر بیرہ ویل آتا درشانی ءِ تینا لوز آتیٹ کتنے بلکہ ظلم، زوراکی، و بے بریبری نا برعکس تینا توارے بڑزا کرینے۔ او مدام تینا مخلوق ءِ ظلم ئنا برخلاف آ مزاحمت نا کسر تسونے، چاگڑدے شون کننگ کن تینا لوز آتیٹ مخلوق ءِ عمل نا کسر تسونے۔ او اولس ئٹ شعور ودی کننگ، ظلم ئنا برخلاف بش مننگ و سیاسی مزاحمت نا کسر آتے جوڑ کننگ، راجی شاعر ئنا وڑ و ڈول سیدھا و بے خلیس مسونے، او تینا شاعری نا لوز آتے صاف کُلہو نا وڑ ئٹ سر کرفینو انتئے کہ راجی شاعر نا مسخت لس بندغ آتیٹی تینا ہیت سر کننگ مریک، ہندا خاتر اونا دوی سَفا است ئٹی لگک، او ظلم ئنا برخلاف توار بڑزا کننگ تون اوار اسہ رژنا ءُ مستقبل ئسے نا اومیت ءِ ہم ایتک، اونا کڑد ئنا اسہ بھاز اہم ءُ پلو ئس مریک، راجی شاعر نا کڑد بیرہ قلمی متنے بلکن عملی قربانی اِسکان ہنانے، بھاز آ راجی شاعر آتے اوفتا خیال آتا سوب آن زندان، بے وطنی و پین کیہی سختی تا گواچی مروئی تمانے، ہرا اونا شاعری تیٹی پین کڑمبی ودی کرینے، ہندا سوب ءِ کہ راجی شاعری دیہاڑ نا ہر وڑ ئنا موڑ آتیٹی اولس ئے بش کننگ و توار بُڑز کننگ کن بھلو کڑد ئس ادا کرینے، راجی شاعر آتا شاعری بیرہ تاخ ئٹی نوشتہ کروکا لوز اسکان توروک متنے بلکن برانز، مُچی و سیاسی شیف و بڑزی تیٹی کوک آتا دروشم ئٹ اُلس ئٹ شعور ئنا بشخ ئس جوڑ مسونے۔ ہیت دادے کہ راجی شاعر گواچن ئٹ تینا دور ئنا توار جوڑ مریک انتئے کن او چُپ مفک، او تینا کسب ءِ اسہ چاگڑدی زمہ واری ئس پُہہ مننگ نا وڑ ئٹ کاریم ئٹ اتیک۔ اندا سوب ءِ کہ اونا کڑد وخت ئتون اوار نزور مفک بلکن ہر پوسکنا دور ئٹی پوسکن ءُ معنہ ئس دُوئی کیک۔
بلوچ چاگڑد ئٹ نمیران آ مبارک قاضی اسہ راجی شاعر ئسے، و بلوچ دیہاڑ ئٹ اسہ اندنو کڑداری ءُ پِن ئسے ٹی چائنگک کہ ہرا تینا لوز آتیٹ تینا ڈغار، ڈیہہ و مخلوق نا ویل و جنجال آتے اتیسہ تینا مخلوق ءِ راجی ناجوڑی تیان سرپدی بشخاکہ۔ بلوچ ڈیہہ ئنا زِربند آ سر ڈغار ئنا زِی آ ودی مروکا مبارک قاضی 25 دسمبر 1955 ئٹ ودی مس۔ بنا آن او خوانندہ سیاست ئٹ بشخ الوکو خوانندس ئس، او تینا چاگڑد ئٹ ظلم و بیدادی ءِ خڑک آن خننگ و تینا قلم نا تاغت ئٹ توار بڑز کننگ کن جہد کریکہ۔ قاضی تینا شاعری تیٹی تینا چاگڑد ئٹ مروکا تادی ءِ ٹِک کرسہ ظالم تے چاگڑد ئنا مون آ پاش کریکہ، ہرانا سوب آن او کیہی وار زندان آتا گواچی کننگا۔ قاضی نا قول و عمل ہڑتوماک اسٹ ئسر او ہرا گِڑاتے تینا قلم نا تاغت ئٹ ٹِک کرسہ درشان کریکہ ہمون ہمو ویل آتا ایسری کن عملی دروشم ئٹ کوشست ام کریکہ ہرا اونا کڑدار ئنا کُل آن بھلا بُڑزی ئس۔ قاضی تینا اندا عمل آن چاگڑد ئٹ جہی ویل آتا برخلاف مزاحمتی برانز آتیٹ اولیکو سف ئٹی ئس۔ قاضی تینا شاعری ٹی تیوہ غا بلوچ چاگڑد نا سیاسی راہشونی ءِ کریکہ، اندا سوب آن تینا زِی آ کیہی سختی تے بننگ آ خناکہ ولے دا کُل سختی تیان پر ام او مہکم سلوکو بامڑد ئس اسک۔ جہان نا راستی ءِ مون آ تخسہ او خرین آ دِے ام بس کہ ہرا ننے آن بلوچ چاگڑد نا راجی شاعر مبارک قاضی ءِ جتا کرے۔ قاضی 16 ستمبر 2023 نا دے دا کوڑی آن مدامی رخصت کرے و بلوچ دیہاڑ ئٹ مدام نمیران مس۔ قاضی جسمانی دروشم ئٹ اینو ننتون اوار اف ولے اونا فکر، لیکہ و مسخت اینو ام ہر بلوچ خوانندہ، سیاسی جہدکار، شاعر و ادیب تون اوار ءِ۔ قاضی اینو ام ہمو علمی و چاہنداری دیوان آتا راہشونی ءِ کننگے کہ ہرا دیوان آتا مسخت بلوچ راج ئنا شونداری کن مریک۔
