بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی خضدار ہنکین ءِ نیمگ ءَ یک مزنیں وش آتکی مراگش ءِ برجم دارگ بوتگ۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی خضدار ھنکین ءِ نیمگ ءَ پہ نوک آوکیں نودربرانی واستہ یک وش آتکی مراگش ءِ برجم داراگ بوتگ۔ اے مراگش ءِ ھاسیں مہمان بنجاہی ھالرسانی کارگشاد سنگت فہد بلوچ ءُ واجہ ڈاکٹر باری آجو بوتگ انت۔ دیوان جتائیں بہرانی تہ ءَ بوتگ کہ آوانی تہ ءَ گشتانک، پینل ڈسکشن، پٹ و پولی تاک، ٹیبلو، شعر ءُ شاعری، ڈاکومنٹری، بلوچی چاپ ءُ گڈ سر ءَ ساز و زیملی دیوان ءَ پد اے مراگش آسر بوتگ۔
مراگش ءِ بندات چہ راجی سوت ءَ بوتگ۔ دیمتر ءَ اولی بہر پٹ ءُ پولی تاک ءِ وانگ بوتگ کہ بلوچ دود ءُ ربیدگ ءِ سر ءَ بوتگ ءُ دومی بہر ءَ دو ڈاکومنٹری پیشدارگ بوتگ اَنت کہ ایشانی سرھال، بلوچستان کتاب کاروان ءُ نمیرانیں سنگت زاہر جان سر ءَ بوتگ اَنت۔ مراگش ءِ سیمی بہر پینل ڈسکشن بوتگ کہ آئی تہ ءَ مہماندار ہنکینی کمک کارمستر سنگت وسیم بلوچ بوتگ ءُ مہمان ہنکینی کمک کارگشاد سنگت صفیہ بلوچ، بساک نال ہنکین ءِ ہنکینی کارگشاد سنگت ساہل بلوچ، شہید پروفیسر رزاق بنزہ ءِ بنزہی کارمستر سنگت ناہیدہ بلوچ ءُ بیوٹک بنزہ ءِ بنزہی کار گشاد سنگت بدر بلوچ بوتگ انت ءُ پینل ڈسکشن ءِ سرھال سیاست، بلوچ نودربر سیاست ءُ گل بوتگ، اے سرھال ءِ سر ءَ گوں دلجمی ءَ باوست بوگ ءَ پد گڈ سر ءَ نندوکیں مردماں وتی جُست ایر کتگ انت کہ آوانی پسّو دئیگ ءَ پد اے بہر ھلاس کنگ بوتگ۔ مراگش ءِ چارمی بہر بلوچی چاپ ءُ سریابی چاپ بوتگ کہ سنگتاں گوں وتی شوکیں چاپ ءَ دیوان گیش شوکتر ءُ وش کتگ۔ مراگش ءِ دیمی بہر تران بوتگ اَنت کہ بنجاہی ھالرسانی کارگشاد سنگت فہد بلوچ ءُ واجہ ڈاکٹر باری آجو ءَ جتائیں سرھالانی سر ءَ وتی ھیال ایر کتگ اَنت۔
اولی تران واجہ ڈاکٹر باری آجو ءِ بوتگ کہ آئی تران کناں ءَ گشتگ کہ من کلّاں پیش نوک آؤکیں نودربراں ءَ مراد بادی دیاں کہ آواں بیوٹک ءُ جے ایم سی ءَ وتی داکلہ گپتگ اَنت۔ آئی دیمتر ءَ تران کنان ءَ گشت کہ مرچی بلوچ ورنایاں اے سرپد بوھگ لوٹیت کہ ابید ءِ سیاسی زانت ءُ تربیت ءَ کسّے شعوری بیداری ءِ نیمگ ءَ شُت نہ کنت، اے مارا نہ تہنا سرپد بوگی انت بلکہ مارا لوٹیت کہ ما کل گوں سیاسی سپر ئے ءَ بندوک بہ بئیں۔ آئی ءَ تران کنان ءَ گشت کہ سنگت وتر ءَ سرپد بہ باں کہ یک بلوچ نودربر ئے ءِ بستار ءَ مئے زمہ واری چے انت ءُ کجام کار اِنت کہ مارا کنگی انت کہ آ مارا بلوچے کنت۔ من ھمے سرپد باں کہ انسان وت نفسیاتی بنیات ءَ سرپد بیت کہ وھد ءِ ھمرائی ءَ اے ھمے سیاسی چست ءُ ایریانی تہ ءَ ہوار بوگ مارا شوکیں انسان ءَ ہوار بلوچ جوڑ کنت۔ ڈاکٹر ءَ انسان ءِ نفسیات ءِ سر ءَ تران کنان ءَ گشت کہ بلوچ ورنا نفساتی ھوالہ ءَ وت ءَ کہ سرپد بنت گڑا آ وت ءَ پگری ھوالہ ءَ گیش مہکم کن انت، چیاکہ اے انسانی نفسیات انت کہ مردم ءَ ہر وڈیں اڈ ءُ جنجالانی سر ءَ گیش تیار کنت ءُ انسان مہکم بیت۔
مراگش ءِ دومی تران بنجاہی ھالرسانی کارگشاد سنگت فہد پلوچ ءِ بوتگ، سنگت ءَ وتی تران بندات کنان ءَ گشت کہ کلّاں پیش من اے ادراہانی تہ ءَ نوک اتکگیں نودربراں وش آتک کنیں ءُ مراد بادی پیش کنیں۔ کہ آواں جتائیں جاہاں چہ جتائیں پند برّتگ ءُ مروچی اے جاہ ءَ سر بوتگ اَنت۔ اے آوانی واستہ وش بہتی ءَ ہوار یک مستریں زمہ واری ءِ؛ وش بہتی ءِ اے واستہ کہ ایش وتی چکّاس ءِ تہ ءَ سرسہب بوتگ انت ءُ زمہ واری اے واستہ کہ ایش راج ءِ ورنا اَنت ایشاں گوں گیشیں اُمیت بندوک اَنت۔ پمیشکہ اے ورنایاں وتی راجی لوٹ ءُ شعوری سرپدی ءَ گوں وتی وانگ، سیاسی چست ءُ ایری نہ تہنا سرپد بوگی انت بلکہ ایشانی تہ ءَ عملی رنگ ءَ ہوار بوگ ءُ کار کنگی انت۔ پمیشکہ ما مدام ھمے گُشیں کہ وانگی ادارہانی تہ ءَ ھاس پہ بلوچ ءَ شوکیں علمی، پگری ءُ شعوری ترتیب ءِ واستہ سیاسی ادارہ مبیت گڑا اودا ورنا زوالی ءِ نیمگ ءَ رو اَنت۔ ورنا راج ءِ سِرین ءِ ھڈ گشگ بنت، آوانی تہ ءَ سیاسی ءُ راجی سنچ بوگ الّمی انت۔ سنگت ءَ گشت کہ مروچیگیں ھالتانی تہ ءَ باز جاہ ءَ گندگ بیت کہ مئے ورناھاں وتی ورنائی ابرم گار ءُ بےھال کتگ۔ پہ درور؛ اگاں یک وانگی ادارہ ءِ ایڈمنسٹریشن گشیت کہ ورنا ھچ وڑیں چست ءُ ایری ءُ سیاسی ءُ علمی شعور ءِ تربیت ءِ گت مکن اَنت ءُ ہوار مہ بنت، گڑا مئے ورناھاں اوں ھمے گپ زرتگ جاہ داتگ کہ ھچ کنگی نہ انت۔ اے وتی تہ ءَ سکّیں ھرابیں تب ءِ کہ ما ایشی ءَ کمار کنگ ءَ نہ ایں۔ اگاں کسّے پولیٹیکل سائنس وانگ ءَ انت آئی ءَ گشگ بیت کہ تئو سیاسی تھیوریانی سر ءَ گپ مکن، تئو سماجی چست ءُ ایرانی سر ءَ باوست مکن، گڑا آ سیاسی سائنس وانگ ءَ انت پرچہ، اگاں کسّے انٹرنیشنل ریلیشن وانگ ءَ انت آ جہانی سیاست ءُ آوانی سیادی ءِ سر ءَ باوست مکنت آوانی قانود، تھیوریانی ءُ ابرم ءِ سر ءَ گپ مکنت گڑا وانگ پرچہ بہ بیت۔ ھمے وڑ ءَ اگاں یک ڈاکٹر ءِ کہ وتی سماج ءَ سرپد بوت مکنت آئی نادراہیاں پہمت مکنت یاکہ آوانی سر ءَ گپ ءُ باوست مکنت گڑا آ ٹیکنیشن ءِ گشگ بیت ناکہ یک مسیحا ءِ کہ یک ڈاکٹرے ءَ بوگی انت، یک راجی ڈاکٹرے ءَ را مدام راجی شعور ءِ بنیات ءَ چاگردی نادراہی سرپد بوگی اَنت، یک انجینیئر ءِ کہ آ ایندگہ چیزانی جوڑ کنگ ءِ سر ءَ کار کنت بلے بلوچ چاگرد وڑیں چاگرد ءِ تہ ءَ انت ءُ چاگری پُرشت ءُ پروشاں سرپد مہ بیت آ کجام بنیات ءَ وتی ھمے چاگرد ءِ تہ ءَ ماڈی جوڑ کت کنت؟ اے ھما بنکی زمہ واری اَنت کہ مارا سرپد بوگی اَنت، بلے ما وتی چاگردی نادراہی، سلکاری ءُ ایندگہ پُرشت ءُ پروشاں چہ ناآشنا ءُ ناسرپد ایں اے مئے واستہ بدیں پالے۔ اے مئے ورناہاں سرپد بوگ ءُ ایشانی بگیری ءَ اوشتگی انت۔
مراگش ءِ دیمتری بہر شعر ءُ شاعری ءِ بہر بوتگ کہ ورنائیں شاعراں وتی شعر ونتگ ءُ اے بہر آسر کنگ ءَ پد دیوان ءِ دیما بلوچستان ءِ سر ءَ یک ٹیبلو ءِ سنگتاں پیش داشتگ ءُ دیوان ءِ اولی مزنیں بہر سرجم بوتگ۔ گڈ سر ءِ بہر ساز ءُ زیمل ءِ بوتگ اے بہر ءَ ورنائیں گشندہاں وتی وش تواری ءَ چہ دیوان گیش زیبدار کتگ۔ دیوان ءِ گڈ سر ءَ ہنکینی کارمستر سنگت مبارک بلوچ ءَ مراگش ءّ اتکگیں مہمان ءُ ایندگہ سنگتانی منت گپتگ ءُ بلوچ نودربر سیاست ءِ سر ءَ وتی ہیال درشان کتگ اَنت۔
مراگش ءِ کُلیں بہرانی سوبمندی ءَ گوں برجم دارگ ءَ پد مراگش آسر کنگ بوتگ۔
بلوچ اسٹوڈنٹس ایکشن کمیٹی خضدار ہنکین
