بلوچ اسٹوڈنٹس ایکشن کمیٹی نال ہنکین ءِ ہنکینی لس دیوان برجم دارگ بوتگ۔ زمیر بلوچ کارمستر ءُ نورزیب بلوچ کارگُشاد گچین کنگ بوتگ اَنت۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نال ہنکین ءِ ہنکینی لس دیوان ساحل بلوچ ءِ سروکی ءَ برجم دارگ بوتگ۔ دیوان ءِ مہمان ءِ ھاس بُنجاہی کمیٹی ءِ باسک نادر بلوچ بوتگ۔
دیوان ءَ بُنجاہی سرکیولر، گوستگیں ہنکینی اھوال، نگدی بھر، گلکاری ءَ ہوار ھندی ءُ میاں اُستمانی سیاسی جاورھال ءِ بُنگپانی سرءَ دلجمیں باوستے ءَ پد آوکیں گامگیج ءَ گوستگیں کابینہ ھلاس کنگ ءُ پہ نوکیں کابینہ ءَ سنگت گچین کنگ بوتگ اَنت۔
بنجاہی سرکیولر ءُ ہنکینی اھوال ءِ سر ءَ سنگتانی دلجمیں باوست ءَ پد نگدی نشست ءِ سرھال بندات کنگ بوت۔ سنگتاں نگدی بہر ءَ تران کنان ءَ گُشت، نگد ہما بارگ ءُ ساچستی کشک اِنت کہ ہمک سیاسی ادارہ ءُ نپر ءَ چرے راہ ءَ الم سپر کنگ لوٹیت۔ پرچاکہ سیاسی ادارہ ءُ پروگرام بیدے نگد ءَ چو اوشتاتگیں آپ ءَ بیت کہ وھد ءِ ہمرائی ءَ گہیت ءُ بوہ کنت۔ ءُ نگد ہما تچک ءُ تیوگیں وسیلہ اِنت کہ آ سیاسی عمل ءَ را جان بکشائیت۔ سنگتاں نگد کنان ءَ گوشت، مرچی کہ بلوچ چاگرد ءِ چاریں آتراپ جیڑہاں مان پوشتگ، سیاسی ادارہ ءُ ھاس باسمائیں ورنائی ءِ بستار ءَ مارا اے کلیں پدمتگیں روشت الکاپی ءَ پد جنگ ءُ توجیل کنگی اَنت۔ پرچاکہ اے روشت روچ پہ روچ بلوچ ءِ آئندگیں باندات ءِ مجگ ءَ تہنا ھالیگیں زھن جوڈ کنگ اِنت۔ ءُ چاگرد انچیں نادرواھیانی آماچ اِنت کہ بلوچ ءِ ربیدگی چاگرد ءِ چھرگ ءَ ہم نہ جنت۔ اے کلیں چیزانی ھوالہ ءَ چو نہ سرپدی مئے سیاسی چاگرد ءِ واستہ ھم تاوانے کہ مارا سیاسی باسک ءِ ئے بستار ءَ ایش درجنگی اَنت ءُ ایشانی توجیل سازی جیڑگی انت۔
دیمتر ءَ سنگتاں گلکاری ءَ تران کنان ءَ گُشت، مرچیگیں اھد ءَ ھما راج زندگ مان اَنت کہ آئی ءِ ورنا ءُ باندات تیزگامیں دنیا ءِ راستی ءَ سرپد بنت ءُ وتی کلیں تاکت ءَ وتی راجی باندات ءِ ھاترا ندر کن اَنت۔ اگاں کجام وھد ءَ ورنا سست مزاج، موہ پرست ءُ تہنا وتی زاتی مپاداں چہ وترا در مہ کن اَنت، بزان آ راج دنیا ءِ دنزانی تہ ءَ گار بیت۔ گلکاری ءِ تہ ءَ دیمترا سنگتاں تران کنان ءَ گُشت، مرچی بلوچ چاگرد ءِ تہ ءَ جتائیں پندالانی وسیلہ ءَ بلوچ نودربر وانگ ءُ زانت ءَ چہ دور کنگ بوئگ اَنت ءُ جتائیں چاگردی سلکاریانی آماچ کنگ بوئگ ءَ انت۔ دومی نیمگ ءَ وانکجاھانی تہ ءَ انچیں وانگی چاگرد ءِ دیم ءَ آرگ بوتگ کہ نودربرانی زھنی سلاھیت نزور کنگ بہ بنت۔ بساک نودربر گلی ءِ بستار ءَ مدام جہد ءَ اِنت کہ نوکیں پروگرامانی وسیلہ ءَ بلوچ نودربرانی بودشتانی تراشگ ءُ آھاں وانگ ءُ وانگی نظام ءِ ھوالہ ءَ بلوچ ءِ زمینی راستی آں چہ آشنا بہ کنت۔
دیمتر ءَ سنگتاں ہندی وانگی جاورھال ءِ سر ءَ تران کناں گُشت کہ مئے انچیں میتگ است اَنت کہ اودا مردم چہ الم ءُ زانت ءَ بے سما اَنت ءُ انچیں جاہ است کہ اودا انگت وانگجاہ ہم نیست۔ اے مئے راجی زمہ واری اِنت کہ ما ہرچ ہما جاہ کہ اودا وانگجاہ نیست، مھلوک ءُ ھاس ورنا آں الم ءُ زانت ءِ نیمگ ءَ گور بہ کنیں۔
کلیں سرھالانی سرا گوں دلجمی تران ءَ پد آوکیں گامگیج ءِ تہ ءَ گوستگیں کابینہ ھلاس کنگ بوت ءُ پہ نوکیں کابینہ ءَ سنگت گچین کنگ بوت اَنت۔ گچین بوتگیں سنگتانی تہ ءَ زمیر بلوچ کارمستر، حامد بلوچ کمک کارمستر، نورزیب بلوچ کارگشاد، مُسّور بلوچ کمک کارگشاد ءُ ساحل بلوچ ھالرسانی کارگشاد گچین کنگ بوت اَنت۔
دیوان ءِ گڈسر ءَ بنجاہی سنگت ءَ نوک گچین بوتگیں ہنکینی کابینہ ءِ سنگتاں سوگند دات ءُ دیوان ءِ آسر کنگ بوت۔
بنجاہی جارکش: بلوچ اسٹوڈنٹس ایکشن کمیٹی
